ގޭގަތިބެގެން އާމްދަނީ ހޯދަންކުރާ މަސައްކަތް ރަޖިސްޓްރީ ކުރަން ނުޖެހޭ ކަމަށް އިކޮނޮމިކް މިނިސްޓްރީން ވިދާޅުވެއްޖެއެވެ. މިކަން ހާމަކޮށްފައިވަނީ މިރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމަގައެވެ. ނޫސްވެރިންނަށް މައުލޫމާތު ދެއްވަމުން އިކޮނޮމިކް މިނިސްޓްރީގެ ރަޖިސްޓްރަރ އޮފް ކޮމްޕެނީސް މަރިޔަމް ވިސާމް ވިދާޅުވީ ގޭގަ ތިބެގެން ކުރާ މަސައްކަތް ގާނޫނު ނަންބަރު 18/2014 ގެ ނުވަވަނަ މާއްދާގެ ހ. ގެ ދަށުން އެފަދަ މަސައްކަތް އިސްތިސްނާ ވާ ކަމަށެވެ. މިފަދަ މީހުންނަކީ އާމްދަނީ ހޯދަން އަމިއްލަ އަށް މަސައްކަތްކުރާ އަދި ޚިދުމަތް ފޯރުކޮށްދޭން ވަޒީފާގައި މީހުން ގެންގުޅޭ މީހުން ނޫންކަމަށް ވިސާމް ވިދާޅުވިއެވެ.
އެހެން ނަމަވެސް އާމްދަނީ ހޯދުމުގެ ގޮތުން އަމިއްލަ ގޭގައި ފަށާ މަސައްކަތްވެސް ރަޖިސްޓަރީ ކުރުމުގެ ފުރުސަތު އޮތް ކަމަށާއި، ކުންފުންޏެއް ނުވަތަ ޕާޓްނަރޝިޕެއްގެ ގޮތުގައި ނުވަތަ ކޯޕަރޭޓވް ސޮސައިޓީއެއްގެ ގޮތުގައި ރަޖިސްޓްރީ ކުރެވިދާނެ ކަމަށެވެ.
