ސަރުކާރާއެކު އިދިކޮޅު ސިޔާސީ ޕާޓީ ތަކާއި ކުރީގެ ރައީސް މައުމޫން އަބްދުލްގަތްޔޫމްއަށް ސަރުކާރުން ދެއްވާފައިވާ މަޝްވަރާގެ ދައުވަތު ގަބޫލުކޮށް ސަރުކާރާއެކު މަޝްވަރާގެ މޭޒަށް ދެން ދާނީ އެންމެ ފުރަތަމަވެސް ޖަލަށް ލާފައިވާ ސިޔާސީ ލީޑަރުން ޖަލުން މިނިވަން ކުރުމުން ކަމަށް އިދިކޮޅު ޕާޓީ ތަކުން ބުނެފިއެވެ.
އިދިކޮޅު ފަރާތްތަކުން މިއަދު ނެރެފައިވާ ގުޅިފައިވާ ބަޔާނުގައި ބުނެފައި ވަނީ ރައީސް ޔާމީން އިދިކޮޅު ފަރާތްތަކާއެކު މަޝްވަރާއަށް ދައުވަތު ދެއްވުމުގައި އެމަނިކުފާނުގެ އިޚްލާސްތެރިކަން އެންމެ ފުރަތަމަވެސް ދެއްކެވުމަށެވެ. އެގޮތުން ރައީސް ޔާމީންގެ އިޚްލާސްތެރިކަން ދެއްކެވުމަށް އެންމެ ފުރަތަމަވެސް ކުރައްވަން ޖެހިވަޑައިގަންނަވާ ކަމަކީ ޖަލަށް ލާފައިވާ އިދިކޮޅު ސިޔާސީ ލީޑަރުން ޖަލުން ނެރެ މިނިވަން ކުރުން ކަމަށާއި ސަރުކާރުން މަޝްވަރާގެ ވާހަކަ ދައްކަން ޖެހޭނީވެސް އެއަށް ފަހު ކަމަށް އިދދިކޮޅުން މިއަދު ނެރުނު ބަޔާނުގައި ބުނެފައިވެއެވެ.
"މީގެކުރިންވެސް އެކިފަހަރު މަތިން ވަނީ ސިޔާސީ ޕާޓީތަކުން ރައީސް ޔާމީންގެ ސަރުކާރާއެކު މަޝްވަރާގެ މޭޒުދޮށަށް ގޮސްފައެވެ. އަދި އދގެ ސީދާ ބައިވެރިވުމާއެކު އެޖަމްއިއްޔާއިން މީޑިއޭޓް ކުރައްވައިގެންވެސް ސަރުކާރާއެކު މަޝްވަރާތައް ހިންގޭތޯ ޕާޓީ ތަކުން ވަނީ ބައްލަވާފައެވެ. އެހެން ނަމަވެސް އެއިން ކޮންމެ ފަހަރަކުވެސް، ސަރުކާރުން ބަހަނާތަކެއް ދެއްކެވުމަށް ފަހު އެ މަޝްވަރާތައް ވަނީ ފެއިލް ކޮށްލައްވާފައި،" ބަޔާނުގައި ބުނެފައިވެއެވެ.
ގުޅިފައިވާ އިދިކޮޅު ފަރާތްތަކުން ނެރުނު ބަޔާނުގައި ބުނެފައި ވަނީ ސަރުކާރުން މަޝްވަރާއަށް ގޮވާލީ އިޚްލާސްތެރި ކަމެއް ނެތި ކަމަށާއި މަޝްވަރާއަށް ގޮވާލައްވާއިރު ޤާނޫނު އަސާސީ އާއި ޤާނޫނު ތަކަށްވެސް ބެއްލެވުމެއް ނެތި ރައީސް ޔާމީން ވަނީ ގުޅިފައިވާ ސިޔާސީ ޕާޓީ ތަކުގެ އިދިކޮޅު ލީޑަރުން ޖަލަށް ލައްވައި، އިދިކޮޅު ފަރާތްތަކަށް ނިސްބަތްވާ ރައްޔިތުންގެ މަޖިލީހުގެ މެމްބަރުގެ މައްޗަށް އެއްވެސް އަސާސެއް ނެތް ތުހުމަތުތަކާއެކު ދައުވާ ކުރައްވަމުން ކަމަށެވެ.
އިދިކޮޅު ސިޔާސީ ލީޑަރުން ޖަލުން މިނިވަން ނުކުރަނީސް ސަރުކާރާއެކު މަޝްވަރާއަށް ނުދާނެ ކަމަށް އިދިކޮޅު ފަރާތްތަކުން ބުނިއިރު ސަރުކާރުން އިދިކޮޅު ފަރާތްތަކަށް މަޝްވަރާގެ ދައުވަތު ފޮނުއްވީ ހުސްވި މަހުގެ ތިރީހުގައެވެ. މަޝްވަރާގެ ދައުވަތު ސަރުކާރުން ފޮނުވިއިރު އެދިފައި ވަނީ ޖަވާބު 7 ދުވަހުގެ ތެރޭގައި ލިޔުމަކުން ހުށަހެޅުމަށެވެ. ނަމަވެސް މުއްދަތު ފާއިތުވީއިރު ސިޔާސީ އެއްވެސް ޕާޓީއަކުން ޖަވާބު ފޮނުވާފައި ނެތް ކަމަށް ސަރުކާރުން ވަނީ ބުނެފައެވެ.
