މިމަހުގެ ތެރޭގައި ރާއްޖޭގައި ބާއްވާ ދުނިޔޭގެ ސިއްޙަތު ޖަމްއިއްޔާގެ ކޮމިޓީ ބައްދަލުވުމަށް ކުރިން ވަޑައިގަންނަވަން ނިންމަވާފައިވާ އިންޑިޔާގެ ހެލްތް މިނިސްޓަރު ޖަގަތް ޕަރަކާޝްގެ ދަތުރުފުޅުވެސް ކެންސަލް ކުރައްވައިފި ކަމުގެ މައުލޫމާތު ލިބިއްޖެއެވެ.
މައުލޫމާތު ލިބިފައިވާ ގޮތުގައި އިންޑިޔާގެ ހެލްތް މިނިސްޓަރު ރާއްޖެ ވަޑައިގަންނަވަން އޮތް ދަތުރުފުޅު ކެންސަލް ކުރެއްވި ނަމަވެސް މި ބައްދަލުވުމަށް ރާއްޖެ ވަޑައިގަންނަވާ އިންޑިޔާގެ މަޝްހޫރު ފިލްމީ ތަރި އަމީތާބް އައުން ކެންސަލް ކޮށްފައިނުވެއެވެ. އިންޑިޔާގެ ހެލްތް މިނިސްޓަރު ދަތުރުފުޅު ކެންސަލް ކުރެއްވީ ކީއްވެގެން ކަމެއް ސާފެއްނުވެއެވެ. މިކަމާބެހޭ ގޮތުން ސަރުކާރުގެ އިސްފަރާތަކުން އަދި ރަސްމީ ބަހެއް ބުނެފައި ނުވެއެވެ.
އިންޑިޔާގެ ހެލްތް މިނިސްޓަރ ޖަގަތް ދަތުރުފުޅު ކެންސަލް ކުރެއްވި ކަމުގެ މައުލޫމާތު ލިބިފައިވާއިރު މި ބައްދަލުވުމަށް ރާއްޖެ އައުމަށް ހަމަޖެހިފައި ކުރިން އޮތް މިއަންމާގެ ހެލްތް މިނިސްޓަރުގެ ދަތުރުވެސް ވަނީ ކެންސަލް ކޮށްފައެވެ. މިއަންމާގެ ހެލްތް މިނިސްޓަރުގެ ދަތުރު ކެންސަލްކުރީ އޭނާ ރާއްޖެ ނޭރުމަށް ދިވެހިންގެ ތެރެއިން އެތަކެއް ބަޔަކު ގޮވަމުން ދަނިކޮށެވެ.
ރާއްޖޭގައި ބާއްވާ ބައްދަލުވުމަކީ ހުޅަނގު އޭޝިޔާގެ ސިއްޙީ ކަންކަމާ މަޝްވަރާ ކުރުމަށް ބާއްވާ ޑަބްލިޔޫއެޗްއޯގެ ސީރޯ ކޮމެޓީގެ 70 ވަނަ ބައްދަލުވުމެވެ. ބައްދަލުވުން މާދަމާ ފެށޭއިރު ބައްދަލުވުން ނިމޭނީ މިމަހުގެ 10 ވަނަ ދުވަހުއެވެ. މި ކޮމިޓީގައި ހުޅަނގު އޭޝިޔާގެ 11 ގައުމެއް ހިމެނެއެވެ. އެއީ ރާއްޖޭގެ އިތުރުން އިންޑިޔާ، ސްރީލަންކާ، ބަންގްލަދޭޝް، އުތުރު ކޮރެޔާ، އިންޑޮނޭޝިޔާ، ބޫޓާން، މިއަންމާ، ނޭޕާލް، ޓިމޯ ލެސްޓްގެ އިތުރުން ތައިލެންޑެވެ.
