ޙައްޖުގެ އަޅުކަން އަދާކުރަން ރާއްޖެއިން ދިޔަ ޙައްޖާޖީން މުޒްދަލިފާ އިން މިނާއަށް ދިޔަ މަގުމަތީގައި ގެއްލުނު ދެނމީހުންގެ ތެރެއިން އެކަކު ފެނިއްޖެއެވެ.
މުޒްދަލިފާއިން މިނާއަށް އައި މަގުމަތީގައި މަގު އޮޅިގެން ގެއްލުނު ދިވެހި ޙައްޖު ވެރިންގެ ތެރެއިން ފެނުނީ ނ. ވެލިދޫ، އަމީނާ ޙަސަން (63 އަހަރު) އެވެ. އޭނާ ފެނުނީ މިނާގައި ހުންނަ މަސްޖިދުލް ކުވައިތު ކައިރިން ކަމަށްވެއެވެ. އެއީ މުޒްދަލިފާއާވީ ކޮޅުގައި ހުންނަ މިސްކިތެކެވެ.
ގެއްލުނު މީހުންގެ ތެރެއިން އަދިވެސް ނުފެންނަނީ އުމުރުން 71 އަހަރުގެ ޅ. ނައިފަރު މީހެކެވެ. 71 އަހަރުގެ މި ފިރިހެން މީހާއާއެކު އޭނާގެ އަންހެނުންވެސް ޙައްޖަށް ދިޔައެވެ. ނަމަވެސް އަންހެން މީހާ މިހާރު ހުރީ މިނާގައި ކަމަށްވެއެވެ. ވެލިދޫ މީހާ އާއި ނައިފަރު މީހާގެ އިތުރުންވެސް ބަޔެއް މީހުން މުޒްދަލިފާއިން މިނާއަށް އައި މަގުމަތީގައި މަގު އޮޅިގެން ގެއްލުނެވެ. ނަމަވެސް އެމީހުން ވަނީ ފެނިފައެވެ.
