ދުނިޔޭގައި ކޮވިޑް- 19 ފެތުރުން އަދިވެސް ކޮންޓުރޯލުވެފައި ނުވާއިރު، 24 ގަޑިއިރުގެ ތެރޭގައި ނޮވެލް ކޮރޯނާ ވައިރަސްއަށް ދުނިޔޭގައި އެންމެ ގިނަ މީހުން ޕޮޒިޓިވް ވުމުގެ އާ ރެކޯޑެއް އިއްޔެ ވަނީ ހެދިފައެވެ.
ދުނިޔޭގެ ސިއްހަތު ޖަމްއިއްޔާ (ޑަބްލިޔުއެޗްއޯ) އިން މިއަދު ހާމަކުރި ގޮތުގައި ފާއިތުވި 24 ގަޑިއިރުގެ ތެރޭގައި ދުނިޔޭގެ ކަންކޮޅުތަކުގައި ގާތްގަނޑަކަށް 2 ލައްކަ 60 ހާސް މީހުން ވަނީ ކޮވިޑް- 19 އަށް ޕޮޒިޓިވްވެފައެވެ. މިއީ އެއް ދުވަހެއްގައި ކޮވިޑް- 19 އަށް ޕޮޒިޓިވްވި މީހުންގެ އަދަދު މިލިއަނެއްގެ ހަތަރު ބައިކުޅަ އެއްބަޔަށްވުރެ (2 ލައްކަ 50 ހާހަށްވުރެ) އިތުރުވި ފުރަތަމަ ފަހަރެވެ. އިއްޔެ ޕޮޒިޓިވްވި މީހުންގެ ތެރެއިން 70 ހާސް މީހުން ޕޮޒިޓިވްވެފައި ވަނީ އެމެރިކާގައެވެ.
ދުނިޔޭގައި މިހާރު 14.2 މިލިއަން މީހުންނަށް ކޮވިޑް- 19 ޖެހިފައިވާއިރު، މި ބަލި އެންމެ ގިނަ ބަޔަކަށް ޖެހިފައިވަނީ އެމެރިކާގައެވެ. އެ ގައުމުގައި މިހާތަނަށް 3.6 މިލިއަން މީހުން ވަނީ މި ބައްޔަށް ޕޮޒިޓިވްވެފައެވެ. މި ބަލީގެ މީހުން ދެވަނައަށް އެންމެ ގިނަ ބްރެޒިލްގައި 2 މިލިއަނަށްވުރެ ގިނަ މީހުން މި ބައްޔަށް ޕޮޒިޓިވްވެފައި ވެއެވެ.
އިއްޔެއަކީ މޭ މަހުގެ 10 ވަނަ ދުވަހަށް ފަހު ދުނިޔޭގައި ކޮވިޑް- 19 ޖެހިގެން އެންމެ ގިނަ މީހުން މަރުވި ދުވަސްވެސް މެއެވެ. އިއްޔެ ކޮވިޑް- 19 ގައި 7360 މީހުން މަރުވެފައި ވެއެވެ. މިއާއެކު، ކޮވިޑް- 19 ޖެހިގެން މިހާތަނަށް ދުނިޔޭގައި މަރުވި މީހުންގެ އަދަދު ވަނީ 6 ލައްކައަށް އަރާފައެވެ. އެމެރިކާގެ ޖޯންސް ހޮޕްކިންސް ޔުނިވަސިޓީގެ ތަފާސް ހިސާބުތަކުން ދައްކާ ގޮތުގައި އިއްޔެއާއި ހަމައަށް ދުނިޔޭގައި 6 ލައްކަ 435 މީހުން މަރުވެފައި ވެއެވެ. ބަލިޖެހުމަށް ފަހު، ބަލިން ފަސޭހަވެފައި ވަނީ 7.9 މިލިއަން މީހުންނެވެ.
ކޮވިޑް- 19 ގެ ހާލަތު އެންމެ ގޯސް ދެ ގައުމު ކަމުގައިވާ އެމެރިކާއާއި ބްރެޒިލްގެ ސިއްހީ ތަޖުރިބާކާރުން ދެކޭ ގޮތުގައި ދެ ގައުމުގައިވެސް ބަލީގެ ހާލަތު ގޯހުން ގޯހަށް ދަނީ މަރުކަޒީ ސަރުކާރުން ބަލި ކޮންޓުރޯލުކުރަން އެކަށީގެންވާ މަސައްކަތެއް ނުކުރާތީއެވެ.
"ޓެސްޓުކުރުމުގެ ގައުމީ ސިޔާސަތެއް ނެތް. މަތިން ފެށިގެން ފިޔަވަޅުތަކެއް އަޅާފައެއް ނެތް. އަސާސީ ފަރުވާގެ ފެންވަރު މަތިންކުރަވެސް ކުރެވިފައިވަނީ ވަރަށް ކުޑަ މަސައްކަތެއް." ބްރެޒިލްގެ ހާލަތާ ބެހޭގޮތު ވާހަކަފުޅު ދައްކަވަމުން ސައުޕާއުލޯގެ ގެޓޫލިއޯ ވަރްގާސް ފައުންޑޭޝަން ޔުނިވަސިޓީގެ ސިއްހީ ފަރުވާއާ ބެހޭ ޕްރޮފެސަރ ޑރ. އެޑްރިއާނޯ މަސޫދާ ވިދާޅުވިއެވެ.
އެމެރިކާގައި ކޮވިޑް- 19 ގެ ދެވަނަ ރާޅެއް އައިސް، ގިނަ ބަޔަކު ޕްޒިޓިވްވަމުން ދާއިރުވެސް، ރައީސު ޑޮނާލްޑް ޓްރަމްޕް ވަނީ މާސްކް އެޅުން މަޖުބޫރު ކުރުމާ ދެކޮޅު ހައްދަވާފައެވެ.
