ދެކުނު އިރުމަތީ އޭޝިއާގެ ބައެއްގައުމުތަކަށް ކުރަމުންދާ ވިއްސާރައިގައި ބަނގުލާދޭޝްގެ ބޮޑު ބައެއްގައި ފެން ބޮޑުވެ އެތައް ލައްކަ ބަޔަކު ހާލުގައި ޖެހިއްޖެއެވެ.
މޫސުމާބެހޭ ފަރާތްތަކުން ލަފާކުރާގޮތުގައި ކުރިއަށް އޮތް 10 ދުވަހުވެސް ވާރޭ ވެހޭނެއެވެ.
ސަރުކާރުގެ އިސްބޭފުޅަކު ވިދާޅުވިގޮތުގައި އިތުރަށް ވާރޭވެހި ކޯރުތަކުގައި ފެންބޮޑުވެ ރަށުތެރެއަށް ފެންގަނޑު ދެމިގެންފިނަމަ ގައުމުގެ 40 ޕަސެންޓުގައި ފެންބޮޑުވެގެންދާނެއެވެ.
"އޭރުން ގައުމުގެ ހާލަތު ވަރަށް ނުރައްކާތެރި ދަރަޖައަކަށްދާނެ." އޭނާ ވިދާޅުވިއެވެ.
ސަރުކާރުގެ ކަމާބެހޭ ފަރާތްތަކުން ހާމަކުރިގޮތުގައި މިއީ ފާއިތުވި 10 ވަރަކަށް އަހަރުގެ ތެރޭގައި އެންމެ ބޮޑު ގެއްލުމެއް ލިބުނު ފަހަރެވެ.
ވާރޭވެހި ފެން ބޮޑުވެ ހާލުގައި ޖެހުނު މީހުންނަށް އެހީވާން ސިފައިންނާއި ފުލުހުންނާއި އާންމުންދަނީ މަސައްކަތްކުރަމުންނެވެ.
ބަނގްލާދޭޝްގެ ފްލަޑް ފޯކާސްޓިން އެންޑް ވޯނިން ސެންޓަރގެ ވެރިޔާ ޢާރިފުއްޒަމާން ބޫޔާން ވިދާޅުވި ގޮތުގައި މިއީ 10 އަހަރުގެތެރޭގައި ކުރުމަތިވި އެންމެ ގެއްލުން ބޮޑު ފެންބޮޑުވުމެވެ.
ޢާރިފުއްޒަމާން ވިދާޅުވިގޮތުގައި ފެންބޮޑުވުމުގެ ގެއްލުން 15 ލައްކައަށްވުރެ ގިނަ މީހުންނަށް ކޮށްފައިވެއެވެ.
ސަރުކާރުގެ އެހެން އޮފިޝަލަކު އޭއެފްޕީއަށް މައުލޫމާތު ދެއްވަމުން ވިދާޅުވީ ބްރަހަމްޕުތުރާ ކޯރުގެ ފެންގަނޑު ވާރޭވެހުމުގެ ސަބަބުން 16 އިންޗިއަށް އުފުލިފައިވާކަމަށެވެ. އަދި ކޯރު ބަންޑުން ވުމުގެ ބިރު ހީވެފައިވާކަމަށް ވެސް އޭނާ ވިދާޅުވިއެވެ.
އޭނާ ވިދާޅުވިގޮތުގައި ފެންބޮޑުވި ސަރަހައްދުތަކުގައި ދިރިއުޅެން އުނދަގޫ މީސްމީހުން ރައްކައުތެރި ސަރަހައްދުތަކަށް ބަދަލުކުރުމުގެ މަސައްކަތް ސަރުކާރުން ދަނީ ކުރަމުންނެވެ.
ބަނގުލާދޭޝްގެ އުތުރު ރަށެއްކަމުގައިވާ ބިޝަމްބަރުޕޫރުގެ މީހުން ބުނިގޮތުގައި އެމީހުންގެ ރަށުގައި ފެންބޮޑުވީ ސޫރުމާ ކޯރު ފުރި ބަންޑުން ވުމުގެ ސަބަބުންނެވެ.
އެސަރަހައްދުގެ މީހުން ރައްކާތެރި ސަރަހައްދުތަކަށް ގެންދިޔައިރު ބައެއްމީހުން އެމީހުންގެ ފެންބޮޑުވެފައިވާ ގެތައް ބެލެހެއްޓުމުގެ ބޭނުމުގައި އެސަރަހައްދުން ނުގޮސް އެބަތިއްބެވެ.
ބަނގްލާދޭޝްގައި 230 ކޯރު އޮވެއެވެ. އޭގެތެރެއިން 53 ކޯރު ވަނީ އިންޑިއާއާ ގުޅިފައެވެ.
މިއަހަރުގެ މޫސުމީ ވިއްސާރައިގައި އިންޑިއާގެ އާސާމުގައި ވެސް ފެންބޮޑުވެ އެތައް ބަޔަކު މަރުވެ 21 ލައްކައަށްވުރެ ގިނަމީހުންނަށް ގެއްލުން ލިބުނެވެ.
އާސާމުގައި މީހުންނަށް އެހީތެރިވާން އުފައްދާފައިވާ ޓީމުގެ ވެރިޔާ އަބީޖީތު ކުމާރު އޭއެފްޕީއާ ވާހަކަދައްކަމުން ބުޏްޏެވެ.
"އަޅުގަނޑުމެންނަށް ކުރިމަތިވެފައިވަނީ ދެ ޗެލެންޖެއް. ފުރަތަމަ ކަމަކީ ކޮރޯނާވައިރަސް. ދެވަނަ ކަމަކީ ފެންބޮޑުވުން."
މޫސުމީ ވިއްސާރައިގައި ނޭޕާލަށް ވެސް ވަނީ ބޮޑެތި ގެއްލުންތަކެއް ލިބި 50 އަށްވުރެ ގިނަ މީހުން މަރުވެފައެވެ.
