ރައްޔިތުންގެ މަޖިލީހުގެ ތެރެއިން ރައީސް އަބްދުﷲ ޔާމީންގެ ސަރުކާރު ވައްޓާލަން އިދިކޮޅު ފަރާތްތަކުން ކުރަމުންދާ މަސައްކަތް ނާކާމިޔާބު ވެއްޖެނަމަ އިދިކޮޅު ފަރާތްތަކުން ކުލީ ސިފައިންގެ އެހީތެރިކަން ހޯދުމަށް މަސައްކަތް ކުރަމުން އަންނަ ކަމުގެ ތުހުމަތު ސަރުކާރު ހިންގާ ޕާޓީގެ ސެކްރެޓަރީ ޖެނެރަލް އަދި މަޖިލީހުގެ ނިލަންދޫ ދާއިރާގެ މެމްބަރު އަބްދުﷲ ޚަލީލް ކުރައްވައިފިއެވެ.
ޚަލީލް ކުރެއްވި ޓްވީޓެއްގައި ވިދާޅުވެފައި ވަނީ ސަރުކާރު ވައްޓާލުމަށް ކުރަމުންދާ މަސައްކަތުގައި ބައިވެރިވުމަށް އެދި މަޖިލީހުގެ ވަރަށްގިނަ މެމްބަރުންނަށް އެމްޑީޕީގެ ރައީސް އަދި ކުރީގެ ރައީސް މުޙަންމަދު ނަޝީދު އެސްއެމްއެސް ކުރައްވައި އާދޭސް ދަންނަވަމުން ގެންދަވާ ކަމަށެވެ. އަދި މަޖިލީހުގެ މެމްބަރުންގެ ތާއީދު ރައީސް އަބްދުﷲ ޔާމީންއަށް އިތުރު ވަމުން އަންނަ ކަމަށާއި އެކަމާމެދު ނަޝީދު ވަރަށް ކަންބޮޑުވެވަޑައިގަންނަވާ ކަމަށްވެސް ޚަލީލް ވިދާޅުވިއެވެ.
"މަޖިލީހުގެ ތެރެއިން ސަރުކާރު ވައްޓާނުލެވިއްޖެނަމަ ކުލީ ސިފައިންގެ އެހީތެރިކަން ހޯދުމަށް މަސައްކަތް ކުރާކަމަށްވޭ" ޚަލީލް ވިދާޅުވެފައިވެއެވެ.
