ޖުމްހޫރީ ޕާޓީގެ ލީޑަރ އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ގާސިމް އިބްރާހިމްއަށް ކްރިމިނަލް ކޯޓުން ރޭ އިއްވި ޖަލު ޙުކުމަކީ ރާއްޖެއިން ބޭރަށް ދިގު މުއްދަތަކަށް އަރުވާލުމުގެ ޙުކުމެއް ކަމަށް މަޝްހޫރު ގާނޫނީ ވަކީލް ހުސްނުއްސުއޫދު ވިދާޅުވެއްޖެއެވެ.
ސުއޫދު ވިދާޅުވީ ރޭ ދަންވަރު ކްރިމިނަލް ކޯޓުން ގާސިމްގެ މައްޗަށް އިއްވި ތިން އަހަރާއި ދެމަހުގެ ޖަލު ޙުކުމަކީ އަނިޔާވެރި ރޯމަނުންގެ ޒަމާނުގައި މީހުންގެ މައްޗަށް އިއްވަމުންދިޔަ ފަދަ ހުކުމެއް ކަމަށެވެ. ސުއޫދު ވިދާޅުވީ ގާސިމްގެ މައްޗަށް ކުރި ޙުކުމުން ބުނެދެނީ "ރާއްޖެއިން ބޭރަށް ދާށޭ" ބުނާ ކަހަލަ ވާހަކައެއް ކަމަށާއި އަދި ދެން "ރާއްޖެ އަރައިގެންނުވާނެ" ކަމަށް ބުނާ ކަހަލަ ވާހަކަތަކެއް ކަމަށެވެ.
ގާސިމްގެ މައްޗަށް ރޭ އިއްވި ޖަލު ޙުކުމުގައި ބުނެފައި ވަނީ ޑޮކްޓަރުން ވިދާޅުވާ ގޮތަށް ގާސިމަށް ސިއްޙީ ފަރުވާ ދިނުމުގެ ކަންކަން ދައުލަތުން ހަމަޖައްސައި ދޭންޖެހޭނެ ކަމަށެވެ. ޑޮކްޓަރުން ވިދާޅުވެފައި ވަނީ ހިތުގެ އާލާސްކަންފުޅު ވަރަށް ސީރިއަސް ކަމަށާއި އެހެންކަމުން ވީ އެންމެ އަވަހަކަށް ރާއްޖެއިން ބޭރަށް ގެންދިޔުން މުހިންމު ކަމަށެވެ.
ގާސިމްގެ މައްޗަށް ރޭ ދަންވަރު ޖަލު ޙުކުމް ޖެހީ ކޯޓު ރޫމްގައި ހުންނަވަނިކޮށް އަނބުރައިގަނެގެން ވެއްޓުމާއި ގުޅިގެން އައިޖީއެމްއެޗްގައި އެޑްމިޓްކޮށްފައި ވަނިކޮށެވެ. މިހާރުވެސް ގާސިމް އޮންނެވީ ހޮޕިޓަލުގައެވެ.
