ގަހެއްގެ މާއްދާއެއް ބޭނުންކޮށްގެން އިންޑިޔާގެ ކުންފުންޏަކުން ކޮވިޑް- 19 އަށްއުފެއްދި ބޭހެއް ޓެސްޓުކުރަން ފެށުމުގެ ހުއްދަ ޑްރަގްސް ކޮންޓްރޯލާ ޖެނެރަލް އޮފް އިންޑިޔާ(ޑީސީޖީއައި) އިން ދީފިއެވެ.
ގުޖަރާތު، މަދްޔަޕްރަދޭޝް އަދި ޖާރްކަންޑްގެ ރަށްފުށުގެ ހިސާބުތަކުގައި ހެދޭ ގަހަކުން ނަގާ އޭކިއުސީއެޗް (AQCH) ވަނީ މީގެ ކުރިން ޑެންގީ ހުމަށް ފަރުވާދިނުމަށް ބޭނުންކޮށްފައެވެ.
އެހެންކަމުން މި ބޭހަކީ އިންސާނުންނަށް ގެއްލުމެއް ނެތް ބޭހެއްކަން ސާބިތުކުރެވިފައި ވާތީ، މި ބޭހުގެ 'ކްލިނިކަލް ޓްރަޔަލް' ގެ ދެވަނަ ފިޔަވަހި ފެށުމު ހުއްދަ މިހާރު ވަނީ ދީފައެވެ.
މި ހުއްދަަ ލިބުމާއެކު، ބޭސް އުފައްދާ ކުންފުނި ސަން ފާމާ އިން އިންޑިޔާގެ 12 ތަނެއްގައި 210 ބަލިމީހުންނަށް މި ބޭސް ޓެސްޓކުރަން ފަށާފައެވެ. ބަލިމީހުންނަށް ބޭސް ދޭނީ 10 ދުވަހަށެވެ. އަދި މި ތަޖުރިބާގެ ނަތީޖާ ލިބޭނީ މިއަހަރުގެ އޮކްޓޯބަރު މަހުގެ ތެރޭގައެވެ.
"މިއީ ކޮވިޑް- 19 ގެ ފަރުވާއެއްގެ ގޮތުގައި ގަހެއްގެ މާއްދާއަކުން އުފައްދާ ބޭހެއް ތަޖުރިބާކުރުގެ ހުއްދަ ދިން ފުރަތަމަ ފަހަރު." ސަން ފާމާގެ މެނޭޖިންގް ޑިރެކްޓަރު ދިލިޕް ޝަންގްވީ ނެރުއްވި ބަޔާނެއްގައި ވެއެވެ.
