މާލޭގެ އެކި ހިސާބު ތަކުން 19 ބިމެއް ވިއްކާލަން ސަރުކާރުން ނިންމައިފިއެވެ.
ހައުސިން މިނިސްޓްރީން ކޮށްފައިވާ އިއުލާނެއްގައި ބުނެފައިވާ ގޮތުން މާލެއިން ވިއްކާލާ 19 ބިމަކީ މާލޭގެ އެންމެ ޑިމާންޑްބޮޑު ސަރަހައްދު ތަކުގެ ބިންތަކެކެވެ.
އެގޮތުން ވިއްކާލާ 19 ބިމަކީ އޯކިޑްމަގު މާފަންނުއާގެއިން ދައުލަތަށް ނެގި ބައި، މ. ދަންޑެހެލުގެ ކިޔާ ބިމުން 3 ގޯއްޗާއި ބޮޑުތަކުރުފާނު މަގުގައި ކުރީގެ ކުނިކޮށިން 6 ގޯތި އަދި އެ މަގުގައި ވިލާ ކޮލެޖާ ޖެހިގެން ހުޅަނގަށް ހުންނަ އެސްޓީއޯއިން ރެޑީ މިކްސް ކޮންކްރީޓް ތައްޔާރުކުރާ 378 ނަންބަރު ކޮށިން 10 ގޯއްޗެވެ. ނަމަވެސް ގޯތި ތަކުގެ ސައިޒްއާއި އަގު ތަކެއް ހައުސިންގ މިނިސްޓްރީން ހާމަކޮށްފައި ނުވެއެވެ.
އިއުލާނުގައި ބުނެފައި ވަނީ ބިމާބެހޭ ގާނޫނުގެ 9 ވަނަ މާއްދާގައިވާ ގޮތުގެ މަތީން އެ މިނިސްޓްރީއާ ހަވާލުކޮށްފައިވާ ބިމުގެ ތެރެއިން، މާލެއިން ބިން ވިއްކުމަށް ކަނޑައެޅިފައިވާ ޕްލޮޓްތަކަށް ބީލަމުގެ އުސޫލުން، އަގުހުށަހެޅުމުގެ ފުރުސަތު އޮންނާނީ މިމަހުގެ 20 އިން 24 ވަނަ ދުވަހުގެ ނިޔަލަށެވެ.
