މިއަހަރުގެ ނައިޓް މާކެޓް އަންނަ ނޮވެމްބަރު މަހުގެ 15 ވަނަ ދުވަހު ފަށާގޮތަށް ވިޔަފާރިވެރިންގެ ގައުމީ ޖަމްއިއްޔާއިން ނިންމައިފިއެވެ.
އެޖަމްއިއްޔާއިން ބުނީ މިފަހަރު ނައިޓް މާކެޓް ބާއްވާނީ ހުޅުމާލޭ އިންޑަސްޓްރިއަލް ވިލެޖުގައި ކަމަށެވެ. މީގެކުރިން ނައިޓް މާކެޓް ބާއްވަމުން އައިސްފައި ވަނީ މާލޭގެ އެކި ސަރަހައްދު ތަކުގައެވެ. އެންމެ ފަހުން ބޭއްވީ މިހާރު ބްރިޖް އަޅަމުންދާ ސުނާމީބިނާ ސަރަހައްދުގައެވެ.
ވިޔަފާވެރިވެރިންގެ ގައުމީ ޖަމްއިއްޔާއިން މިހާރު ވަނީ ނައިޓް މާކެޓްގެ މޭޒުތައް ބުކް ކުރަންވެސް ފުރުޞަތު ހުޅުވާލާފައެވެ. ނަމަވެސް މިފަހަރު މޭޒު ދޫކުރާ އަގުތައް އަދި އާންމު ނުކުރެއެވެ. އެ ޖަމްއިއްޔާއިން ބުނީ އަގުތައް ހާމަކުރާނީ ތަންކޮޅެއް ފަހުން ކަމަށެވެ. ފަހަކަށް އައިސް ނައިޓް މާކެޓްއިން މޭޒު ދޫކޮށްފައި ވަނީ 4000 ރުފިޔާއަށެވެ.
އެންމެ ފުރަތަމަ ނައިޓް މާކެޓް ބާއްވަމުން އައިސްފައި ވަނީ ޗާންދަނީ މަގުގައެވެ. އެއަށް ފަހު ދެން ބާއްވަމުން އައީ ބޮޑުތަކުރުފާނު މަގު ކަޅުތުއްކަލާ ކޮއްޓާ ހަމައިން ގޮސް އެސްޓީއޯ ޕެޓްރޯލް ޝެޑާ ހަމައަށް އޮތް ސަރަހައްދުގައެވެ. ނަމަވެސް އެންމެ ފަހުން ބާއްވަމުން އައީ ބޮޑުތަކުރުފާނު މަގުން ސްޓެލްކޯއާ ހަމައިން ގޮސް ސުނާމީ ބިނާ ސަރަހައްދާއި އަޑުކުރިމަތީ އޮތް ޕާކު ސަރަހައްދުވެސް ހިމެނޭ ގޮތަށެވެ.
