ކައުންސިލްތަކުގެ މުއްދަތު ދައްމާލުމަށް ޤާނޫނު އަސާސީގެ 231 ވަނަމާއްދާގެ ނައްސަށް ނުވަތަ އިތުރު އިންތިޤާލީ މާއްދާއެއް ޤާނޫނު އަސާސީގައި ހިމެނުމަށް ސުޕްރީމް ކޯޓުން ރައްޔިތުންގެ މަޖިލީހަށް ލަފާދެއްވައިފިއެވެ.
ސުޕްރީމް ކޯޓުގެ ލަފާގައި ވަނީ މިހާރު ސަރުކާރުން ޤާނޫނު އަސާސީ އިސްލާހުކުރުމަށް ހުށަހަޅައިފައިވާ ޤާނޫނުގެ ހަތަރުވަނަ މާއްދާއަށް އިޞްލާހު ނުގެނެސް އެކޯޓުން ދެއްވައިފައިވާ ލަފާގެ މަތިން ޤާނޫނު އަސާސީ އިޞްލާޙު ގެނެސް ކައުންސިލްގެ މުއްދަތު ދައްމާލުމަށެވެ. އެގޮތުން ޤާނޫނު އަސާސީގެ 231 ވަނަމާއްދާގެ ނައްސަށް ނުވަތަ އިތުރު އިންތިޤާލީ މާއްދާއެއް ޤާނޫނުއަސާސީ 13ވަނަ ބާބުގެ ފަހަތުގައި ހިމެނުމަށް ސުޕްރީމް ކޯޓުން ރައްޔިތުންގެ މަޖިލީހަށް ވަނީ ލަފާދެއްވައިފައެވެ.
"އެގޮތުން ގެނެވޭ އިޞްލާހު ޤާނުނުއަސާސީގެ ބައެއްގެ ގޮތުގައި ހިމެނޭ ތާރީޚުން ފެށިގެން ދެން އެންމެ އަވަހަށް ބޭއްވޭ ލޯކަލް ކައުންސިލްތަކުގެ އިންތިޚާބު ބޭއްވެންދެން 3 ޖޫން 2017 ގައި މަޤާމާ ޙަވާލުވި ކައުންސިލަރުން އެމަޤާމުތަކުގައި ތިބޭނެކަމަށް ސަރީޙަ ބަހުން ބަޔާންކޮށްގެން މެނުވީ 4 އޭޕްރީލްގައި ދިވެހިރާއްޖޭގައި ބޭއްވުމަށް އިލެކްޝަން ކޮމިޝަނުން ނިންމާފައިވާ ލޯކަލް ކައުންސިލްތަކުގެ އިންތިޚާބު، ފަސްކުރަންޖެހުމާ ގުޅިގެން އެއިންތިޚާބު ބޭއްވުމަށް ރައްކާތެރި މާހައުލެއް ޤާއިމްވެ، އާ އިންތިޚާބެއް ބޭއްވުމާ ހަމައަށް ދިމާވާ ޤާނޫނީ ހުސްކަން ޤާނޫނު އަސާސީއާ އެއްގޮތްވާ ގޮތުގެ މަތިން ފޫބެއްދޭނެކަމަށް ނުފެންނަ ކަމެވެ" ސުޕްރީމް ކޯޓްގެ އިޝްތިޝާރީ ލަފާގައި ވެއެވެ.
