ދިވެހި ދައުލަތަށް ވިލާ ކުންފުނިން ދޭންޖެހޭ އެއްވެސް ފައިސާއެއް ނޯންނާނެ ކަމަށް އެކުންފުނިން މިއަދު ބުނެފިއެވެ.
ވިލާ ކުންފުނީގެ ވަކީލުން މިއަދު ނެރުނު ބަޔާނެއްގައި ބުނެފައި ވަނީ ބުނެފައި ވަނީ މީރާއިން އެކުންފުންޏާ ދެކޮޅަށް 77 މިލިޔަން ޑޮލަރު ހޯދަން ދައުވާ ކޮށްފައި ވީނަމަވެސް އެއީ އެކުންފުނިން ދައްކަންޖެހޭ ފައިސާ ނޫން ކަމަށެވެ. ވަކީލުންގެ ބަޔާނުގައި ބުނެފައި ވަނީ ވިލާ ޝިޕިން އާއި، ވިލާ ހޮލިޑޭޒް އާއި، ވިލާ ހޮޓެލްސް އެންޑް ރިޒޯޓްސް އާއި، މާނެއްފުށި ޕްރައިވެޓް ލިމިޓެޑާއި، ގަޒީރާއިން ނަގާފައިވާ ރަށްތަކާއި ފަޅުތަކަށް ފައިސާ ދައްކަން ފަށަން ޖެހެނީ ރިސޯޓު ހަދައި ހިންގަން ފެށުމުން ނުވަތަ އެއްބަސްވުން ތަކުގައި ހަމަޖެހިފައިވާ ކޮންސްޓްރަކްޝަން ޕީރިއަޑު ހަމަވުމުން ކަމަށެވެ. އެގޮތުން ރަށްރަށުގެ ކުލި ދައްކަން ޖެހޭނީ 2018 ޑިސެމްބަރުން ފެށިގެން ކަމަށާއި ފަޅުތަކުގެ ކުލި ދައްކަން ފަށަން ޖެހޭނީ 2020 ޑިސެމްބަރުން ފެށިގެން ކަމަށްވެސް ވިލާގެ ވަކީލުން މިއަދު ނެރުނު ބަޔާނުގައި ވަނީ ބުނެފައެވެ.
ޖުމްހޫރީ ޕާޓީގެ ލީޑަރ ގާސިމް އިބްރާހިމްގެ ވިލާ ކުންފުންޏާ ދެކޮޅަށް މީރާއިން ކޮށްފައިވާ 77 މިލިއަން ޑޮލަރުގެ ދައުވާއަށް އިންކާރުކޮށް ވިލާގެ ވަކީލުން ނެރުނު ބަޔާނުގައި އިތުރަށް ބުނެފައި ވަނީ ވިލާގެ ކުންފުނިތަކާއެކު ސަރުކާރުން ހަދާފައިވާ އެއްބަސްވުންތައް އުވާލައި، ރަށްތަކާއި ފަޅުތައް ނެގި މައްސަލައިގެ ޝަރީއަތުގައި އެއިން ކުންފުންޏަކުން އެއްބަސްވުމާ ޚިލާފަށް އެއްވެސް ކަމެއް ކޮށްފައި ނެތް ކަމަށް ދައުލަތުންވެސް ބުނެފައިވާ ކަމަށެވެ. އެހެންކަމުން އެއްބަސްވުމާ ޚިލާފު ވެފައި ނުވާއިރު ދައުލަތަށް އެއިން ކުންފުންޏަކުން ދައްކަން ޖެހޭ ފައިސާއެއް ވެސް އަދި ޖުރިމާނާއެއް ވެސް ނޯންނާނެ ކަމަށް ވިލާއިން ނެރުނު ބަޔާނުގައި ވަނީ ބުނެފައެވެ.
މީރާއިން ވިލާގެ މާނެންފުށި ޕްރައިވެޓް ލިމިޓެޑާއި ދެކޮޅަށް 77 މިލިއަން ޑޮލަރު ހޯދުމަށް ދައުވާކޮށްފައިވާ އިރު 35 މިލިއަން ޑޮލަރު ހޯދުމަށް ވިލާ ހޮލިޑޭސް އާއި ދެކޮޅަށް ދައުވާކޮށްފައިވެއެވެ. އަދި ގަޒީރާ ޕްރައިވެޓް ލިމިޓެޑާއި ދެކޮޅަށް 17 މިލިއަން ޑޮލަރު ހޯދުމަށް ދައުވާ ކޮށްފައިވެއެވެ.
