ތުރުކީގެ އިސްތަންބޫލުގައި ހުންނަ ސައޫދީ ކޮންސިއުލޭޓު ތެރޭގައި 2108 ވަނަ އަހަރުގެ އޮކްޓޯބަރު މަހުގެ 2 ވަނަ ދުވަހު ރަހުމްކުޑަ ގޮތަކަށް ގަތުލުކޮށްލާފައިވާ ސައޫދީ ނޫސްވެރިޔާ ޖަމާލު ޚާޝުޤްޖީގެ އާއިލާއިން އޭނާގެ ގާތިލުންނަށް މާފުކޮށްފިއެވެ.
މިކަން ހާމަކޮށްފައި ވަނީ ޚާޝުޤްޖީގެ ދަރިކަލުން ޞަލާޙު ޚާޝުޤްޖީ ކުރެއްވި ޓުވީޓެއްގައެވެ.
"މި ބަރަކާތްތެރި ރަމަޟާން މަހުގެ މި ބަރަކާތްތެރި ރޭގައި އަހަރުމެން މާތް ﷲގެ ވަޙީބަސްފުޅު " ނުބައިކަމެއްގެ ޖަޒާއަކީ އެއާއެއްފަދަ ނުބައިކަމެކެވެ. ފަހެ (ނުބައިކަމެއް ކޮށްފިމީހާއަށް) ޢަފޫކޮށް، ޞުލްޙަވެރިވެގަތްމީހާގެ ޘަވާބު ވަނީ، اللَّه ގެ ޙަޟްރަތުގައެވެ. ހަމަކަށަވަރުން، އެކަލާނގެ، އަނިޔާވެރިންދެކެ ލޯބިވެވޮޑިގެނެއް ނުވެތެވެ." ހަނދާންކުރަމެވެ.
"އެހެންކަމުން، އަހަރުމެން -ޝަހީދު ޖަމާލު ޚާޝުޤްޖީގެ ދަރިން- މާތް ﷲގެ ވަޖުހުފުޅަށްޓަަކައި ބައްޕަގެ ގާތިލުންނަށް މާފުކޮށްފިކަން އިޢުލާންކުރަމެވެ. ބައްޕައަށް މާތް ﷲ ރަޙްމަތް ލައްވާށިއެވެ. އަހަރުމެން އެންމެންގެ އުއްމީދަކީ އެކަމުގެ ބަދަލުގައި މާތް ﷲ އަހަރުމެންނަށް އަޖުރުދެއްވުމެވެ." ޞަލާޙުގެ ޓުވީޓުގައި ވެއެވެ.
ޚާޝުޤްޖީގެ ގާތިލުންނަށް މާފުކުރިކަން އޭނާގެ އާއިލާއިން އިއުލާންކުރުމާ ގުޅިގެން ސައޫދީ ސަރުކާރާ ދެކޮޅު ސިޔާސީ ހަރަކާތްތެރިން ވަނީ އެކަށް ނުރުހުން ފާޅުކޮށް އެކަން ގަބޫލުނުކުރާ ކަމަށް ބުނެފައެވެ.
އިދިކޮޅު ގިނަ ބަަޔަކު މީސްމީޑިޔާގައި ފާޅުކުރަމުންދާ ޚިޔާލުތަކަށް ބަލާއިރު، އެމީހުން ދެކޭގޮތުގައި، ޙާޝުޤްޖީ ގަތުކޮށްފައި ވަނީ އާއިލީ ދެބަސްވުމެއްގެ ސަބަބުންނެއް ނޫނެވެ. އޭނާއަކީ ސިޔާސީ ނޫސްވެރިއެކެވެ. އޭނާ މަރާލާފައި ވަނީ ސައޫދީ ސަރުކާރުގައި އިސްކޮށް ތިބި ބަޔަކު ފަހަތުގައި ތިބެގެންނެވެ. އެހެންކަމުން، އޭނާގެ ގާތިލުންނަށް އަދަބުލިބެން ޖެހޭނެއެވެ.
ސައޫދީ އަރަބިއްޔާގެ ކޯޓަކުން ވަނީ ފާއިތުވި 2019 އަހަރުގެ ޑިސެންބަރު މަހުގައި، ޚާޝުޤްޖީ މަރާލި މައްސަލައިގައި 5 މީހެއްގެ މައްޗަށް މަރުގެ ހުކުމްކޮޮށްފައެވެ. އަދި އިތުރު 3 މީހަކު ޖުމްލަ 24 އަހަރަށް ޖަލަށްލުމަށް ހުކުމްކޮށްފައެވެ.
ދިގުދެމިގެން ދިޔަ ތަހުގީގަކަށް ފަހު، ފާއިތުވި މާރިޗު މަހު ތުރުކީގެ ޗީފް ޕަބްލިކް ޕްރޮސެކިއުޓަ ވަނީ ޖަމާލު ޚާޝުޤްޖީ މަރާލި މައްސަަލައިގައި ސައޫދީ 20 މީހެއްގެ މައްޗަށް ޣައިރުހާޒިރުގައި ދައުވާ އުުފުލާފައެވެ. ދައުވާ އުފުލި މީހުންގެ ތެރޭގައި ސައޫދީ އަރަބިއްޔާގެ ޖާސޫސީ އިދާރާގެ ކުރީގެ ނާއިބު އަޙްމަދު އަލްޢަސީީރީއާއި، ސައޫދީ ޝާހީ ގަނޑުވަރުގެ ކުރީގެ މުސްތަޝާރު ސަޢޫދު އަލްޤަޙްޠާނީ ހިމެެނެއެވެ.
