މާރާމާރީގެ ކަންތައްތައް ހުއްޓުވުމަށް ސަރުކާރުން ކެނޑިނޭޅި މަސައްކަތް ކުރަމުންދާ ކަމަށް ހޯމް މިނިސްޓަރު އަޒްލީން އަޙްމަދު ވިދާޅުވެއްޖެއެވެ.
ހޯމް މިނިސްޓްރީ އިން މިއަދު ބޭއްވި ނޫސް ކޮންފަރެންސެއްގައި ހޯމް މިނިސްޓަރު އަޒްލީން އަޙްމަދު ވިދާޅުވި ގޮތުގައި އެންމެ ފުރަތަމަ މާރާމާރީއާ ގުޅިގެން މަރުވި ކުއްޖާގެ ހާދިސާ ހިނގި އިރުވެސް ފުލުހުންގެ އެކިއެކި ހަރަކާތްތައް މާލޭގެ އެކި ދިމަދިމާގައި ކުރިޔަށް ދިޔައެވެ. އަދި ވޭތުވެދިޔަ ދެތިން ރޭވެސް ފުލުހުން މާލެތެރޭގައި ހަރަކާތްތެރިވެ، އެކި ގުރޫޕްތަކަށް ނިސްބަތްވާ ވިހި މީހަކު ހައްޔަރުކޮށްފައިވާ ކަމަށް މިނިސްޓަރު ވިދާޅުވިއެވެ. މީގެ ދެ ހަފުތާ އާ ހަމައަށް ރައްޔިތުން ދިޔައިީ ވަރަށް އަމާން ސުލްހަވެރި ދިރިއުޅުމެއް ތަޖްރިބާ ކުރަމުން ކަމުގައި މިނިސްޓަރު ފާހަގަކުރެއްވިއެވެ. އަދި ރެކޯޑްތަކުން ދައްކާގޮތުގައި ސިޔާސީ ގޮތުން ހަލަބޮލިވާ ކޮންމެ ފަހަރަކު މުޖުތަމައު އިތުރަށް ހަލަބޮލިވުމަށް ކަންތައްތަކެއް މެދުވެރިވާ ކަމުގައި މިނިސްޓަރު ވިދާޅުވިއެވެ. ނަމަވެސް އެއީ އިއްތިފާގަކުން ވާ ކަމެއްތޯ ނުވަތަ ބަޔަކު ގަސްތުގައި ރާވައިގެން ހިންގާ ކަމެއް ކަމަށް ވިދާޅުވާން ނޭނގޭ ކަމަށް ވެސް މިނިސްޓަރު ވިދާޅުވިއެވެ.
ސޔާސީ ގޮތުން އިދިކޮޅު ފަރާތަތަކުން ހަރަކާތްތަކެއް ފަށައިގެން ކުރިއަށް ގެންދާ ދަނޑިވަޅެއްގައި މިފަދަ ކަންކަން ހިނގަން ފެށީމާ މީޑިއާގެ ބައެއް ޒަރީއާތަކުން މުއުތަބަރު ނޫން ފަރާތްތަކުން ލިބޭ މައުލޫމާތު އާއްމު ކުރުމުން ރައްޔިތުންނަށް އޭގެ ބިރުވެރިކަމާއި ނުރައްކާތެރިކަން އިހުސާސް ކުރަންޖެހޭ ކަމަށް މިނިސްޓަރު ވިދާޅުވިއެވެ. މިފަދަ މައުލޫމާތު ފަތުރާ ފަރާތްތަކުން އެފަދަ ކަންކަމާ މެދު ސަމާލުވެ ޒިންމާދާރުވުމަށް މިނިސްޓަރު އިލްތިމާސް ކުރެއްވިއެވެ.
މިނިސްޓަރު އިތުރަށް ވިދާޅުވި ގޮތުގައި މާރާމާރީ އާ ގުރޫޕު ހަމަލާތައް ދިނުން ހުއްޓުވުުމަށް މޯލްޑިވްސް ޕޮލިސް ސަރވިސް އާއި ދިވެހި ރާއްޖޭގެ ދިފާއީ ބާރާއި ގުޅިގެން މާލޭގައި އިތުރު ހަރަކާތްތަކެއް ކުރިއަށް އޮތް ދުވަސްތަކުގައި ހިންގަމުންދާނެއެވެ. އަދި ފުލުހުންގެ އަމާޒަކަށްވާނީ ރައްޔިތުންނަށް ސަލާމަތާއި ރައްކާތެރިކަން ކަށަވަރު ކޮށްދިނުމެވެ. މާރާމާރީ އާއި ގުރޫޕު ހަރަކާތްތައްް ހުއްޓުވުމުގައި ހަމައެކަނި ސިފައިންނާއި ފުލުހުން ކުރާ މަސައްކަތުން ކާމިޔާބު ހޯދުމަކީ ފަސޭހަ ކަމެއް ނޫނެވެ. ތުހުމަތު ކުރެވޭ ފަރާތްތައް ހޯދުމުގައި ފުލުހުންނަށް ދަތިތަކެއް ކުރިމަތިވާ ކަމަށާއި، އެފަދަ މީހުން ހޯދުމުގައި ރައްޔިތުންގެ އެއްބާރުލުން ބޭނުންވާ ކަމަށް ވެސް އެމަނިކުފާނު ވިދާޅުވިއެވެ.
މާލޭގައި ކުށެއް ކުރުމުން ފުލުހުންގެ އަމާޒަކަށް ވާނީ އެއީ ސިޔާސީ މީހަކު ކުރި ކުށެއްތޯ ނުވަތަ ގުރޫޕު މާރާމާރީގެ ތެރެއިން ހިނގާ ދިޔަ ކަމެއްތޯ ނުވަތަ ޒާތީ ގޮތުން މީހަކު މީހަކަށް ދިން އަނިޔާއެއްތޯ ބެލުން ނޫން ކަމަށާއި، ކުށަަކަށް އަރައިގެންފިނަމަ އެކަން ހުއްޓުވާނެ ކަމަށް މިނިސްޓަރު ވިދާޅުވިއެވެ. އަދި ފުލުހުންގެ އަމާޒަކަށްވާނީ ރައްޔިތުންނަށް ސަލާމަތާއި ރައްކާތެރިކަން ފޯރު ކޮށްދިނުމެވެ. މިކަމުގައި ރައްޔތިުންގެ އެއްބާރުލުން ލިބުމަކީ ފުލުހުންގެ މަސައްކަތް ހަލުވިކަމާއެކު ކާމިޔާބުވެގެންދާނެ ކަމެއްް ކަމުގައިވެސް އެމަނިކުފާނު ފާހަގަކުރެއްވިއެވެ.
މީޑިއާގެ ބައެއް ވަސީލަތްތަކުން ހާމަކުރާ މައުލޫމާތަށް އިޝާރާތްކުރައްވަމުން މިނިސްޓަރު ވިދާޅުވީ ފުލުހުންގެ މަސައްކަތްތައް ބައްޓަން ކުރެވިފައިވަނީ ސިޔާސީ މީހުން ކުރާ ކަންތައްތަކަކަށް ނޫނެވެ. ނަމަވެސް ޚިދުމަތުގައި ތިއްބަވާ ފުލުހުންގެ ތެރެއިން އޮފިސަރުންތަކެއް މަގުމަތީގައި ހިންގޭ ސިޔާސީ ހަރަކާތްތައް ހުއްޓުވުމަށް މަސައްކަތް ކުރައްވާނެ ކަމަށްވެސް އެމަނިކުފާނު ވިދާޅުވިއެވެ. އެއީ ދިވެހި ރާއްޖޭގެ ސަލާމަތާއި ރައްކާތެރިކަން ކޮމްޕްރޮމައިޒް ކުރެވިގެން ކުރެވޭ ކަމެއް ކަމަށް ދޭހަވާ މޭރުމުން މީޑިއާއިން މައުލޫމާތު ނުފެތުރުމަށް އެމަނިކުފާނު އިލްތިމާސް ކުރެއްވިއެވެ. އެމަނިކުފާނު ވިދާޅުވީ ދިވެހިރާއްޖޭގެ ދިފާއީ ބާރާއި ފުލުހުންނާއި ސިފައިން ނިދާފައިތިބޭ ކަމަށް ދޭހަވާގޮތަށް މައުލޫމާތު ފެތުރުމަކީ ވަރަށް ޣައިރު ޒިންމާދާރު ކަމެކެވެ. އަދި ފުލުހުންނާއި ސިފައިންނަށް މާރާމާރީ ހުއްޓުވުމާއި، މުޒާހަރާތައް ހުއްޓުވުމަށް އެކުއެކީގައި މަސައްކަތް ކުރުމުގެ ގާބިލުކަން ލިބިފައިވެއެވެ. ގައުމީ މަސްލަހަތާއި އާއްމު މަސްލަހަތު އިސްކުރާނަމަ ޒާތީ ގޮތުން އެފަދަ ވާހަަކަ ނުފަތުރާނެއެވެ.
ރައްޔިތުންގެ ރައްކާތެރިކަމާއި ސަލާމަތްތެރިކަން ގެއްލޭފަދަ ހަރަކާތްތަކަށް ސިފައިންނާއި ފުލުހުން ޖާގަ ނުދެއްވާނެ ކަމުގެ ޔަގީންކަން މިނިސްޓަރު ދެއްވިއެވެ. މައުލޫމާތު ފެތުރުމުގައި ސަލާމަތާއި ރައްކާތެރިކަން ކަށަވަރުކޮށްދެއްވައި، ގާނޫނު ތަންފީޒު ކުރައްވަން ތިއްބަވާ ފަރާތްތަކާ ބެހޭގޮތުން ރައްޔިތުންގެ މެދުގައި އިތުބާރާއި ޔަގީންކަން ގެއްލޭ ގޮތަށް މައުލޫމާތު ނުފެތުރުމަށް މިނިސްޓަރު އިލްތިމާސް ކުރެެއްވިއެވެ. އަދި އެއްވެސް ބާވަތެއްގެ ހަމަނުޖެހުންތައް އިތުރުވެ، ރައްޔިތުން ކަންބޮޑުވެ، އާއްމު ރައްޔިތުންނަށާއި އާންމު ވިޔަފާރިއަށް އަސަރުކުރާ ގޮތަށް އެއްވެސް ކަމެއް ނުކުރުމަށް ވެސް އެމަނިކުފާނު އިލްތިމާސް ކުރެއްވިއެވެ.
މާރާމާރީއާއި، މުުޖުތަމައުގެ ސުލްހަ މަސަލަސްކަން ގެއްލޭ ފަދަ އަމަލުތައް ހިންގާ ފަރާތްތަކާއި، އެފަދަ އަމަލުތަކަށް ބާރުދީ، ހިތްވަރުދޭ ފަރާތްތަކާއި މެދު ގާނޫނީ ފިޔަވަޅު އެޅުމަށް މޯލްޑިވްސް ޕޮލިސް ސާވިސް އިންް ތައްޔާރުވަމުންދާ ކަމަށްވެސް މިނިސްޓަރު އަޒްލީން ވިދާޅުވިއެވެ. ކުރިއަށް އޮތްތަނުގައި މާރާމާރީ ހިންގައި، އެކިފާޑު ފާޑުގެ ޣައިރު ގާނޫނީ އަމަލުތައް ކުރަމުން ގެންދާ ފަރާތްތަކާ މެދު ހަރުކަށި ގާނޫނީ ފިޔަވަޅު އަޅަމުން ގެންދާނެ ކަމަށް ވެސް އެމަނިކުފާނު ވިދާޅުވިއެވެ.
އަޒުލީނު. ތިބާއަށް އެނގޭތޯ ޢަޒުލީނު ފުލުހުންނާ ހަވާލުވި ފަހުން ހިނގި ގަތުލުގެ އަދަދު. މިހާ ދުވަހު ތިޔަ މަޑުކުރީ ޓްރެފިކު ސްޓިކާ ޖެހުމަށް ފުލުހުން ގެންގުޅެން. ކުށް ހިނގިޔަ ނުދޭން ކުށް މަދުކުރަން ކުރެވުނު ކަމެއް ނެތް. ޙައްތަހާވެސް ކަމެއް ހިނގުމުން ތަހުޤީޤުކުރަނީ. ގިނަ ވަނީ މަރު.