ސިޔާސީ ދާއިރާގެ ހުރިހައި މަގާމަކާއި، ޝަރުއީ ދާއިރާގެ ހުރިހައި މަގާމެއް ފުރުމަކީ އިސްލާމްދީނުގައި އަންހެނުންނަށްވެސް ހުއްދަ ކަމެއް ކަމުގައި ރައީސް މައުމޫނު ވިދާޅުވެއްޖެއެވެ. އެމަނިކުފާނު މިހެން ވިދާޅުވެފައި ވަނީ ރޭ ގުޅިފައިވާ ޕާޓީތަކުން ބޭއްވި ޖަލްސާގައި އައްޝައިޚް ޢަބްދުލްމަޖީދު ޢަބްދުލްބާރީ ދެއްކެވި ވާހަކަފުޅަށް ރައްދު ދެއްވައި ކުރެއްވި ޓުވީޓެއްގައެވެ.
ޢަބްދުލްމަޖީދު ރޭ ވިދާޅުވި ގޮތުގައި ފަނޑިޔާރެއްގެ މަގާމު ފުރުމަކީ އިސްލާމް ދީނުގައި އަންހެނުންނަށް ހުއްދަ ކުރައްވައިފައިވާ ކަމެއް ނޫނެވެ. އޭނާ ވިދާޅުވި ގޮތުގައި ފަނޑިޔާރަކީ ފިރިހެނަކަށްވުން އިސްލާމްދީން ލާޒިމު ކުރެއެވެ. އެއީ ޖުމްހޫރު އިލްމުވެރިންގެ ރައުޔެވެ. އަދި އަންހެނަކު ފަނޑިޔާރަކަށް ހެދިދާނެ ކަމުގެ ހެއްކެއް ކީރިތި ޤުރްއާނާއި، ރަސޫލާގެ ސުންނަތުން ފެންނާން ނެތް ކަމަށްވެސް ޢަބްދުލްމަޖީދު ވިދާޅުވިއެވެ.
ޢަބްދުލްމަޖީދު މި މޭރުމުން ވާހަކަފުޅު ދެއްކެވީ ރާއްޖޭގެ އުއްތަމަ ފަނޑިޔާރު ކަމަށް ނުވަތަ ސުޕްރީމް ކޯޓުގެ ފަނޑިޔާރު ކަމަށް ޢާޒިމާ ޝުކޫރު ހަމަޖައްސާން ސަރުކާރުން އުޅޭ ކަމަށް ސަރުކާރާ ދެކޮޅު ބޭބޭފުޅުން ވާހަކަފުޅު ދައްކަވާފައިވަނިކޮށެވެ. އެ ބޭފުޅުން މިހެން ވިދާޅުވަމުން ގެންދެވިޔަސް، ސަރުކާރު ހިންގާ ޕީޕީއެމުން ބުނެފައި ވަނީ އެއީ ދޮގު ވާހަކަތަކެއް ކަމުގައެވެ.
އަންހެނަކަށް ދައުލަތުގެ އެންމެ އިސް މަގާމު އަދާކުރެވިދާނެތޯ އާއި ފަނޑިޔާރުކަން ކުރެވިދާނެތޯ މިއީ ރައީސް މައުމޫނުގެ ވެރިކަމުގެ ދުވަސްވަރުން ފެށިގެން ރާއްޖޭގެ އިލްމުވެރިންގެ މެދުގައި ކުރެވެމުން އަންނަ ބަހުސެކެވެ. ޝަހީދު ޑޮކްޓަރ އަފްރާޝީމަކީ އެއީ ހުއްދަ ކަމެއް ކަމަށް ވަރަށް ބޮޑަށް ވަކާލާތު ކުރެއްވި ބޭފުޅެކެވެ. ރައީސް މައުމޫނަކީވެސް އެ ކަމަށް ތާއީދު ކުރައްވާ ބޭފުޅެކެވެ. އެކަމަކު ޢަދާލަތު ޕާޓީއާއި، އެ ޕާޓީގެ ޢިލްމުވެރިންނާއި، ރާއްޖޭގެ ބައެއް އެހެން ޖަމްއިއްޔާތަކާއި ބައެއް އިލްމުވެރިން މި ކަމާ ވަރަށް ބޮޑަށް ދެކޮޅު ހަދައެވެ.
