ސެޕްޓެމްބަރ 2015 ގައި އެކުލަވާލެވުނު އ.ދ ގެ ދެމެހެއްޓެނިވި ތަރައްޤީގެ ލަނޑުދަނޑިތަކަކީ ދުނިޔޭގެ މުސްތަގުބަލް ކުރިއަށްއޮތް 15 އަހަރަށް ބައްޓަންކުރާނެ ލަނޑުދަނޑިތަކެއް ކަމަށް މިނިސްޓަރ އޮފް ސްޓޭޓް ފޮރ އެންވަޔަރަންމަންޓް އެންޑް އެނަރޖީ އަލްފާޟިލް ޢަބްދުﷲ މަޖީދު ވިދާޅުވެއްޖެއެވެ. ސްޓޭޓް މިނިސްޓަރ މަޖީދު މިހެން ވިދާޅުވީ މި މަހުގެ 10 އިން 19 އަށް އެމެރިކާގެ ނިއުޔޯކުގައި ހުންނަ އ.ދ ގެ މައި މަރުކަޒުގައި ފެށިގެން ކުރިއަށް ދިޔަ "ހައިލެވެލް ޕޮލިޓިކަލް ފޯރަމް އޮން ސަސްޓެއިނަބަލް ޑިވެލޮޕްމަންޓް ގޯލްސް 2017" ގައި ދިވެހިރާއްޖެއިން ހުށަހަޅާ ވޮލަންޓަރީ ނޭޝަނަލް ރިވިއު ހުށަހަޅުއްވާ ދެއްވަމުންނެވެ.
ސްޓޭޓް މިނިސްޓަރ މަޖީދުގެ ވާހަކަފުޅުގައި ދެމެހެއްޓެނިވި ތަރައްޤީގެ ލަނޑުދަނޑިތައް ހާސިލް ކުރުމަށް ކުރެވެމުންދާ މަސައްކަތްތައް މުތާލިޢާ ކުރުމަށް ހައިލެވެލް ޕޮލިޓިކަލް ފޯރަމް އޮން ސަސްޓެއިނަބަލް ޑިވެލޮޕްމަންޓް ގޯލްސް ގެ މުހިންމުކަން ފާހަގަ ކުރެއްވިއެވެ. އަދި ދިވެހިރާއްޖެއިން އ.ދ ގެ ދެމެހެއްޓެނިވި ތަރައްޤީގެ ލަނޑުދަނޑިތައް ހާސިލް ކުރުމަށް އަތުކުރި އޮޅާލާފައިވާކަން ފާހަގަ ކުރެއްވިއެވެ.
ސްޓޭޓް މިނިސްޓަރގެ ވާހަކަ ފުޅުގައި، އ.ދ ގެ ސާސްކަފްގެ ލަނޑުދަނޑިތައް ހާސިލް ކުރުމުގައި ދިވެހިރާއްޖެއިން ހޯދާފައިވާ ކާމިޔާބީ ފަހަގަކުރައްވައި، މި ކާމިޔާބީގެ މައްޗަށް ބިނާކޮށް، ވަސީލަތްތައް މަދުކަމާއިއެކުވެސް ދެމެހެއްޓެނިވި ތަރައްޤީގެ ލަނޑުދަނޑިތައް ހާސިލް ކުރުމަށް ދިވެހިރާއްޖެއިން ތައްޔާރަށް އޮތްކަމަށް ވިދާޅުވިއެވެ. އަދި މި މަސައްކަތުގައި ބައިނަލްއަޤުވާމީ މުއާހަދާތަކާއި އެއްގޮތްވާގޮތުގެ މަތިން، ތަރައްޤީގެ ބައިނަލްއަޤުވާމީ ބައިވެރިންނާއި ޕްރައިވެޓް ސެކްޓަރގެ އެހީތެރިކަމާއި ބައިވެރިވުމުގެ މުހިންމުކަން ފާހަގަކުރެއްވިއެވެ.
ހައިލެވެލް ޕޮލިޓިކަލް ފޯރަމް އޮން ސަސްޓެއިނަބަލް ޑިވެލޮޕްމަންޓް ގޯލްސްއަކީ އ.ދ ގެ ދެމެހެއްޓެނިވި ތަރައްޤީގެ ލަނޑުދަނޑިތައް ހާސިލް ކުރުމަށް ޤައުމުތަކުން ކުރާ މަސައްކަތްތައް ރިވިއު ކުރުމަށް ބޭއްވޭ ފޯރަމްއެކެވެ. މި އަހަރުގެ ފޯރަމްގެ މައުޟޫއަކީ "ބަދަލުވަމުންދާ ދުނިޔެއެއްގައި ފަޤީރުކަން ނައްތާލުމާއި ފާގަތިކަން ކުރިއެރުވުން" އެވެ.
