މިއަހަރުގެ އައިފާ އެވޯޑު ހަފްލާ ހުށަހަޅަމުން ދިޔައިރު ސައިފް އަލީ ޚާނާއި، ކަރަން ޖޯހަރު، އަދި ވަރުން ދަވަން ކަންގަނާ އާއި ދިމާކުރުމުން ގިނަ ބައެއްގެ ފާޑު ކިޔުންތައް މި ތިން ތަރީންނަށް އަމާޒުވެއްޖެއެވެ.
މި ތިން ތަރީން ކަންގަނާ އާއި ދިމާކޮށްފައިވަނީ އޭނާ މިއަހަރުގެ ކުރީކޮޅު ކޮފީ ވިތް ކަރަން ޝޯގައި ދައްކާފައިވާ ވާހަކަތަކަށް ނިސްބަތް ކޮށެވެ. ކަންގަނާ ބުނެފައިވަނީ ފިލްމީ އާއިލާއަކަށް ނިސްބަތް ވުމުން ފިލްމީ ދާއިރާއިން ފުރުސަތު ފަހިވާ ކަމަށާއި ބޭރުން އަންނަ މީހުންނަށް އެފުރުސަތު ހަނިކަމަށެވެ. އޭގެ ރައްދެއްގެ ގޮތުން ޝޯ ހުށަހަޅަމުން ދިޔައިރު ކަރަން އާއި ވަރުން ވަނީ ސްޓޭޖްމަތީގައި "ނިޕޮޓިޒަމް ރޮކްސް" އޭ ބުނެ ކަންގަނާ އަށް މަލާމާތްކޮށްފައެވެ. އަދި މި ތިން ތަރީންވަނީ ކަންގަނާއަށް ޖޯކު ޖަހައި ހީނ ހަދައިފައެވެ.
އެކަމާ ހިތްހަމަ ނުޖެހިގެން ސައިފާއި، ކަރަން، އަދި ވަރުން އަށް ގިނަ ބަޔަކު ސޯޝަލް މީޑިއާގައި ވަރަށް ބޮޑަށް ފާޑު ކިއެވެ. ވަރުންވަނީ އައިފާގައި އޭނާއަށް ކުރެވުނު ކަންތަކާ މެދު ދެރަވެ ލަދުގަންނަކަމަށާއި އެކަމަށް މާފަށް އެދޭ ކަމަށް ބުނެ ޓްވީޓުކޮށްފައެވެ. އޭނާ ދެކެނީ އެއީ ޖޯކެއް ކަމަށް ސައިފް ބުނިކަމަށް މީޑިއާ ރިޕޯޓުތަކުގައިވެއެވެ. ނަމަވެސް އެއީ ކޮށްގެންވާނެ ކަމަށް ނޫންކަމަށް އޭނާ ގަބޫލުކުރާ ކަމަށް ބުނެފައިވެއެވެ. އެން.ޑީ.ޓީވީ އާ ވާހަކަ ދައްކަމުން ކަރަން ބުނެފައިވަނީ އެއީ މުޅީން އޭނާ ގެ ޚިޔާލެއް ކަމަށެވެ. ނަމަވެސް އޭނާ ގަބޫލުކުރަނީ އާއިލީ ގުޅުމަކުން ފިލްމީ ދާއިރާ އާއި ގުޅުމަށް ވުރެ ހުނަރު މުހިއްމު ކަމަށް ބުނެފައެވެ. އަދި އެވޯޑު ހަފްލާގައި ކަންތައް ކުރެވުނު ގޮތާ މެދު ދެރަވާ ކަމަށް ބުނެ އޭނާވެސް ވަނީ މާފަށް އެދިފައެވެ.
