ފެނަށްވުރެ ލޭ އޮލަވާނެ ކަމަށް ވިދާޅުވެ، ޔުމްނާ މައުމޫނު މީގެ ބައިގަޑިއެއްހައި އިރު ކުރީން ޓުވީޓެއް ކުރައްވައިފިއެވެ. މިއަދު މެންދުރު އޭނާގެ ކޮއްކޮ، ފާރިސް މައުމޫނު ހައްޔަރު ކުރި ފަހުން ދުންޔާ ކުރެއްވި ފުރަތަމަ ޓުވީޓުގައި އޮތީ އޭނާގެ ކޮއްކޮއާއި، ކޮއްކޮގެ އަނބިކަނބަލުންނާއި، ކޮއްކޮގެ ދަރިކަލުންނަށް ހިތްވަރު ދެއްވުން އެދި ދުޢާ ކުރައްވާ ކަމަށް ވިދާޅުވެފައެވެ.
ދުންޔާ ވަނީ މި ސަރުކާރުގެ ޚަރިޖީ ވަޒީރެއްގެ ގޮތުގައި ހުންނަވާފައި، ރައީސް މައުމޫނު ސަރުކާރަށް ތާއީދު ނުކުރައްވާ ކަމަށް ވިދާޅުވުމާ ގުޅިގެން އިސްތިއުފާ ދެއްވައިފައެވެ. ދެވަނަ ފަހަރަށް އޭނާ ސަރުކާރާ ގުޅިވަޑައިގަތީ ހެލްތު މިނިސްޓްރީގެ ސްޓޭޓް މިނިސްޓަރެއްގެ ގޮތުގައެވެ.
މިއަދު މެންދުރު ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު ފާރިސް މައުމޫނު ހައްޔަރު ކޮށްފައި ވަނީ ފުލުހުން އޭނާ ދިރިއުޅުއްވާ ގެ މާފަންނު ސްނޯ ރޯޒް އަށް ވަދެ ފާސް ކުރުމަށްފަހު، އޭނާޔާ މެދު ތުހުމަތު ކުރެވޭ މައްސަލައިގެ ހެކި ކަމަށް ބުނާ ބައެއް ތަކެތި ހޯދުމަށް ފަހުއެވެ.
ސަރުކާރާ އިދިކޮޅު ފަރާތްތަކުން ބުނަމުން ގެންދާ ގޮތުގައި މިއީ ފާރިސް އިދިކޮޅު ހަރަކާތްތަކުގައި ބައިވެރިވެ ވަޑައިގެން މަސައްކަތް ކުރައްވާތީ، ބިރު ދެއްކުމުގެ ގޮތުން ކުރާ ކަމެކެވެ. ފުލުހުން މީގެ ކުރިންވެސް ވަނީ ރައްޔިތުންގެ މަޖިލީހުގެ މެންބަރުންނަށް ފާރިސް ރިޝްވަތު ދެއްވާން މަސައްކަތް ކުރެއްވި ކަމުގެ ހެއްކާއި ގަރީނާ ލިބިފައިވާ ކަމަށެވެ.
ފާރިސް ހައްޔަރު ކޮށްގެން ގެންދިޔަ ކަމަށް ވަނީ ދޫނިދުއަށެވެ. އޭނާގެ ގެ ބަލައި ފާސްކުރީ އޭނާއާއި، ވަކީލުންގެ ހާޒިރުގައި ކަމަށް މައުލޫމާތު ލިބެއެވެ.
ރައީސް މައުމޫނު ވިދާޅުވެފައި ވަނީ ފާރިސް ރިޝްވަތުގެ އެއްވެސް އަމަލެއް ނުހިންގަވާނޭ ކަމުގައެވެ. ފާރިސްގެ މަސައްކަތްޕުޅަކީ ގައުމަށްޓަކައި ކުރައްވާ މަސައްކަތްޕުޅެއް ކަމަށްވެސް މައުމޫނު ވިދާޅުވިއެވެ. ފާރިސް ހައްޔަރު ކުރުމާ ގުޅިގެން ސަރުކާރާ އިދިކޮޅު ބޭބޭފުޅުން ގެންދަވަނީ ނުރުހުން ފާޅު ކުރައްވަމުންނެވެ.
ރައްޔިތުންގެ މަޖިލީހުގެ ރައީސް ޢަބްދުﷲ މަސީޙްގެ އިތުބާރު ނެތްކަމުގެ ވޯޓު ނެގުމަށްޓަކައި އިދިކޮޅު ޕާޓީތަކުން ކުރަމުން ގެންދާ މަސައްކަތްކުގެ އެންމެ ކުރީ ސަފުގައި އުޅުއްވާ އެއް ބޭފުޅަކީ ފާރިސް މައުމޫނެވެ.
kaaku gaboolu kuraanee. dhahikamun tihuree sarukaaru vazeefaaga noon tha goyye.