ލީބިޔަން ނޭޝަނަލް އާމީ (އެލްއެންއޭ) ގެ ނަމުގައި ހަނގުރާމަވެރި ލަޝްކަރެއް އެކުލަވާލައި، ބައިނަލްއަގުވާމީ ގޮތުން ގަބޫލުކޮށްފައިވާ ލީބިޔާގެ ސަރުކާރު، ގަވަމެންޓް އޮފް ނޭޝަނަލް އެކޯޑް (ޖީއެންއޭ) އާ ހަނގުރާމަކުރަމުންދާ ޚަލީފާ ޙަފްތަރު އޭނާއަކީ ލީބިޔާގެ ވެރިޔާ ކަމަށް އިއުލާންކޮށްފިއެވެ.
މި އިއުލާނާއެކު އޭނާ ވަނީ، ލީބިޔާގެ މައްސަލައަށް ހައްލެއް ގެނައުމަށް އދ.ގެ ފަރާތުން 2015 ވަނަ އަހަރު އެކުލަވާލި އެއްބަސްވުން އެއީ "މާޒީގެ އެއްޗެއް" ކަމަށް ބުނެ އެއްބަސްވުން ވެސް އުވާލާފައެވެ.
"އެ ސިޔާސީ އެއްބަސްވުމުގެ ސަބަބުން ގައުމު ވަނީ ސުންނާފަތި ވެފައި. އަހަރުމެން މަސައްކަތްކުރާނީ ދާއިމީ މަދަނީ މުއައްސަސާތައް އުފެއްދޭނެ ހާލަތު ގާއިމްކުރުމަށް." ޓީވީ މެދުވެރިކޮށް ފޮނުވި ވާހަކައިގައި އޭނާ ބުނެފައި ވެއެވެ.
އޭނާގެ މި ނިންމުމަށް، ލީބިޔާގެ އިރުމަތީގައި ވެރިކަންކުރަމުންދާ އެގައުމުގެ ގާނޫނުހަދާ މަޖިލީހުގެ ތާއީދު އޮތް ކަމެއް ނުވަތަ ނޫން ކަމެއް އޭނާ ހާމަނުކުރެއެވެ. އޭނާގެ ޖީއެންއޭ ލަޝްކަރަކީ އޭނާ ބުނާގޮތުގައި ގާނޫނުހަދާ މަޖިލީހަށް ތަބާވާ ލަޝްކަރެކެވެ.
އެމެރިކާއިން ވަނީ، އދ. ން އެކުލަވާލި ސިޔާސީ އެއްބަސްވުން އުވާލައި، ލީބިޔާގެ ވެރިއަކަށް ހަފްތަރު އަމިއްލައަށް އިއުލާންކުރި ކުރުން ގަބޫލުނުކުރާނެ ކަމަށް ބުނެފައެވެ. އަދި އެމެރިކާ އެންބަސީން ވަނީ އެކަމާ ހިތާމަކުރާ ކަމަށް ބުނެފައެވެ. އަދި "ހަމައެކަނި އެއް ފަރާތަކުން އަޅާ ފިޔަވަޅަކުން ލީބިޔާ ސިޔާސީ އޮނިގަނޑު ވަކިގޮތަކަށް ބަދަލުކުރަން މަޖުބޫރު ނުކުރެވޭނެ" ކަމަށްވެސް އެންބަސީން ބުނެފައި ވެއެވެ.
ވަރިރަށް ޓްރިޕޮލީ (ޠަރާބުލުސް) ގައި ގާއިމުވެފައިވާ ލީބިޔާގެ ޖީއެންއޭ ސަރުކާރުން ބުނީ ހަފްތަރު ކުރި މިއިއުލާނާމެދު ހައިރާން ނުވާ ކަމުގައެވެ. އަދި އޭނާގެ މިއަމަލަކީ ހަނގުރާމައިގެ މައިދާނުގައި މިހާރު އޭނާއަށް ލިބެމުންދާ ނާކާމިޔާތައް ފޮރުވަން ކޮށްފައިވާ ކަމެއް ކަމުގައެވެ.
ޤައްޒާފީގެ ދުވަސްވަރު ލީބިޔާގެ އަސްކަރިއްޔާގެ ފީލްޑްމާޝަލެއްގެ މަގާމުގައި ހުރުމަށް ފަހު ޤައްޒާފީއާ ދެބަސްވެ އެމެރިކާއަށް ދިރުއުޅުން ބަދަލުކޮށް އޭނާ ވަނީ އެމެރިކާގެ ރައްޔިތަކަށްވެސް ވެފައެވެ. އެހެންނަމަވެސް، ޤައްޒާފީގެ ވެރިކަން ވެއްޓުމާއެކު ލީބިޔާއަށް އެނބުރި އައިސް ހަނގުރާމަވެރިންގެ ލަޝްކަރެއް އެކުލަވާލައި، އޭނާ ވަނީ ލީބިޔާގެ ވެރިކަން ހޯދުމުގެ މަސައްކަތް ފަށާފައެވެ.
ވެރިރަށް ޓްރިޕޮލީ ހިފުމަށް އޭނާ ވަނީ ފާއިތުވި 2019 ވަނަ އަހަރުގެ އެޕްރީލް މަހު ވަރުގަދަ ހަމަލާއެއް ފަށާފައެވެ. އެހެންނަމަވެސް، އެ ހަމަލާއަށް އަހަރެއް ފާއިތުވެގެން ދިޔަ އިރުވެސް، އޭނާއަށް އެކަން ކާމިޔާބު ވެފައި ނުވެއެވެ. މިމަހުގެ ކުރީކޮޅު، ލީބިޔާގެ ސިފައިންނާއި، ޖީއެންއޭއަށް ތާއީދުކުރާ ހަނގުރާމަވެރިން ފެށި ވަރުގަދަ ހަމަލާއެއްގައި ހުޅަނގު ލީބިޔާގެ ގިނަ ރަށްތަކަކުން ހަފްތަރުގެ ހަނގުރާމަވެރިން ވަނީ ފަހަތަށް ޖައްސާފައެވެ.
ލީބިޔާގެ ވެރިކަން އަސްކަރީ ބާރުން ހޯދުމަށް ޚަލީފާ ޙަފްތަރުކުރާ ހަނގުރާމައިގައި އޭނާއަށް އެހީތެރިވަނީ ޔުނައިޓެޑް އަރަބް އެމިރޭޓްސް (ޔޫއޭއީ)، މިސްރު އަދި ރަޝިޔާއިންނެވެ.
