އިސްރާލުން ގަދަބާރުން ހިފާފައިވާ ފަލަސްޠީނުގެ ބިންތައް ކަމުގައިވާ ހުޅަނގު އައްސޭރީ އެއްވެސް ބައެއް ޔަހޫދީ ދައުލަތު ބައެއް ކަމުގައި ހަދައިގެން ނުވާނެ ކަމަށް ބުނެ އދ. އާއި ޔޫރަޕްގެ އިއްތިހާދު (އީޔޫ) އިން އިސްރާއީލަށް އިންޒާރު ދީފިއެވެ.
އދ.ގެ ފަރާތުން މެދުއިރުމަށްޗަށް ކަނޑައަޅާފައި ހުންނަވާ މަންދޫބު ނިކޮލާއި މްލާޑިނޯވް ވިދާޅުވި ގޮތުގައި އިސްރާއީލުގެ މިފަދަ އަމަލެއް ވެގެންދާނީ، އިސްރާއީލު-ފަލަސްޠީނުގެ މައްސަލައިގެ ހައްލަކަށް ދެ ދައުލަތް ގާއިމުކުރުމަށް ކުރެވޭ މަސައްކަތުގެ "ދުވަސްދުއްވާލާނެ އެތިފަހަރަކަށެވެ."
އީޔޫން ބުނެފައި ވަނީ އިސްރާއީލުގެ މިފަދަ އަމަލެއް ވެގެންދާނީ "ބައިނަލްއަގުވާމީ ގާނޫނާ ޚިލާފަށް ކުރެވޭ ނުރައްކާތެރި" ކަމަކަށް ކަމުގައެވެ.
އިޔޫގެ ޚާރިޖީ ސިޔާސަތާ ބެހޭ މަންދޫބު ޖޮސެޕް ބޮރެލް ވިދާޅުވި ގޮތުގައި ފަލަސްޠީނު ސަރަހައްދުގެ މައްޗަށް އިސްރާއީލަށް ސިޔާދަތު ލިބިގެންވާ ކަމަށް 27 މެންބަރު ގައުމު ހިމެނޭ އީޔޫއިން ގަބޫލުުނުކުރެއެވެ. އަދި އީޔޫއިން ދާނީ "މަސްރަހު ވަރަށް ގާތުން ބަލައި، އެކަމުން ނުކުންނަ ނަތީޖާގެ އަސަރު ބަލުމުންނެވެ. އަދި އެކަށީގެންވާ ގޮތުގައި އެކަމަށް ފިޔަވަޅު އަޅަމުންެނެވެ."
ތިން އިންތިޚާބަކަށްފަހު ވެސް އެެއްވެސް ޕާޓީއަކަށް ސަރުކާރެއް އެކުލަވާނުލެވި ދުވަސްތަކެއް ވޭތުވެ ދިއުމަށްފަހު، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާއި، އޭނާގެ ވާދަވެރިޔާ ބެނީ ގަންޓްޒް ސޮއިކުރި އެއްބަައިވަންތަކަމުގެ ސަރުކާރުގެ އެއްބަސްވުމުގައި، ޖުލައި 1 ވަަނަ ދުވަހުން ފެށިގެން، ހުޅަނގު އައްސޭރީގެ ބައެއް ބިންތައް (މައިގަނޑު ގޮތެއްގައި އިސްރާއީލުން އެ ސަރަހައްދުުގައި ގާއިމުކޮށްފައިވާ ޣައިރު ގާނޫނީ އާބާދިތައް ހިމެނޭހެން) އިސްރާއީލު ބައެެއްގެ ގޮތުގައި ހެދުމާ ބެހޭ މާއްދާއެއް ހިމަނާފައި ވެއެވެ.
މި އެއްބަސްވުން އެކުލަވާލުމާއެކު، އެމެރިކާގެ ޚާރިޖީ ވަޒީރު މައިކް ޕޮމްޕެއޯ ވަނީ އެމެރިކާއިން އެކަމަށް ތާއީދުކުރާ މޭރުމަކުން ވާހަކަފުޅުދަައްކަވާފައެވެ. އޭނާ ވިދާޅުވީ ހުޅަނގު އައްސޭރީގެ ބައިތަކެއް އިސްރާއީލުގެ ބައެއްގެ ގޮތުގައި ހެދުމަކީ އިސްރާއީލުގެ އިޚްތިޔާރުގައި އޮތް ކަމެއް ކަމުގައެވެ.
އެމެރިކާގެ ކުރީގެ ސަރުކާރުތަކުން އައީ ހުޅަނގު އައްސޭރީގެ އެއްވެސް ބައެއް އިސްރާއީލުގެ ބައެއްގެ ގޮތުގައި ކަނޑައެޅުމާ ދެކޮޅު ހެދުމުގެ ސިޔާސަތެއް ގެންގުޅެމުންނެވެ. އެހެންނަމަވެސް، ރައީސު ޑޮނާލްޑް ޓްރަމްޕް ވެރިކަމަށް ވަޑައިގަތުމާއެކު އެމެރިކާގެ ސިޔާސަތު އިސްރާއީލުގެ ކޮޅަށް ބަދަލުވިއެެވެ. އެެހެންކަމުން، އިސްރާއީލު ސަރުކާރުން މަސައްކަތްކުރަނީ ޓްރަމްޕްގެ ރިޔާސީ ދައުރު ނިމުމުގެ ކުރިން ހުޅަނގު އައްސޭރިން އިސްރާއީލު ބޭނުންވާ ސަރަހައްދުތައް އަވަހަށް އިސްރާއީލުގެ ބައެއްގެ ގޮތުގައި ކަނޑައެޅުމަށެވެ.
އިސްރާއީލުން ހުޅަނގު އައްސޭރިއާއި އިރުމަތީ ޤުދުސް ހިފީ 1967 ގެ ހަނގުރާމައިގައެވެ. އެއަށްފަހު އިސްރާއީލުން ވަނީ 7 ލައްކައަށްވުރެ ގިނަ ޔަހޫދީން ހުޅަނގު އައްސޭރިއާއި އިރުމަތީ ޤުދުސުގައި އާބާދުކޮށްފައެވެ. އިސްރާއީލުން މި ސަރަަހައްދުތައް ޔަހޫދީ ދައުލަތުގެ ބައެއް ކަމުގައި ކަނޑައަޅައިފިނަމަ، އެ ސަރަަހައްދުގައި ފަލަސްޠީނުގެ ދައުލަތެއް ގާާއިމްކުރުމުގެ ފުރުސަތު ބަންދުވެގެން ދާނެއެވެ.
