"ބަންގާޅީއޭ" ބުނެވުނީމާ ރަސް އޮންލައިންގެ ނޫސްވެރިޔާއައި އެޑިޓަރ މަޢާފަށް އެދެން މީޑިއާ ކައުންސިލުން އަންގައިފި އެވެ. އެކައުންސިލުން ރޭ ކުރެއްވި ޓްވީޓެއްގައި ބުނެފައިވަނީ ނެޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ރަސް އޮންލައިންގެ ފަރާތުން ސުވާލު ކުރި މީހާގެ ފަރާތުން ފެނިގެންދިޔަ ޢަމަލަކީ ޒިންމާދާރު ޢަމަލެއްކަމަށް އެކައުންސިލުން ނުދެކޭ ކަމަށެވެ. އެހެންކަމުން ޒިންމާދާރު ނޫސްވެރިންގެ ޙައްޤުގައި ކުރިއަށް އޮތް ތަނުގައި އެކައުންސިލްގެ ރޫޙު ހުރީ ނޫސްވެރިން އެކްރެޑިޓްކުރާނެ އުޞޫލެއް އެކުލަވައިލައި ވީހާވެސް އަވަހަށް ޢަމަލު ކުރަން ފެށުމަށް ކަމަށެވެ.
ރަޝް އޮންލައިނުން އެމައްސަލައިގައި ރޭ ވަނީ ރިޕޯރޓެއް ލިޔެ ސާއިޢުކޮށްފައެވެ. އެ ރިޕޯރޓްގައި ބުނެފައިވަނީ ނޫސްވެރިޔާ އެސުވާލު ކުރަން ފެށުމުގައި "ބަންގާޅީން" ނުވަތަ "ބަނަގާޅު" ރަނގަޅަށް ނުބުނެވި އުޅެނިކޮށް ޑރ ނަޒްލާ ނޫސްވެރިޔާގެ ސުވާލުގެ ތެރެއަށް ވެދެ ވަޑައިގެން އެބަސް ބޭނުން ނުކުރެއްވުމަށް ވިދާޅުވެ ދެންދެއްކެވީ ނޫސްވެރިޔާ ކުރަން އުޅުނު ސުވަލާ ނުވެސް ގުޅޭ ވަރަށް ޖަޒްބާތީ ވާހަކަ ތަކެއް ކަމަށެވެ.
ނޫސްވެރިޔާ "ބަންގާޅީ" ނުވަތަ "ބަންގާޅު" މި ބަސް ބޭނުންކުރީ އެއް ގޮތަކަށް ވެސް އެމީހުން ދެރަކޮށްލައި ދަށްކޮށްލުމުގެ އެއްވެސް ނިޔަތެއް އޮވެގެން ނޫންކަމަށް ރަސް ގެ ރިޕޯރޓްގައި ބުނެފައި ވެއެވެ. ނޫސްވެރިޔާ ސުވާލުކޮށްލަން ބޭނުންވީ، ދިވެހިންގެ ބައެއް މީހުން ދެކޭ ގޮތުގެ ވާހަކަ ކަމަށެވެ. އެމީހުންނަށް ރާއްޖޭގައި ދިރިއުޅެން ޖެހިފައި އޮތް ދަތި ޙަލުގެ ސަބަބުން ރާއްޖޭގައި ރޯގާ ބަލިމަޑުކަމެއް ފެތުރެން ފަށައިފިއްޔާ، އެމީހުންގެ ތެރޭގައި އެބަލި ފެތުރުމުގެ ބިރު، ބައެއް ދިވެހިން ހާމަކުރަމުން ދާވާހަކަ ކަމަށެވެ. އަދި ޤަވާއީދާ ޚިލާފަށް އުޅޭ މީހުން އެމީހުންގެ ވަޒަނަށް އަނބުރާ ފޮނުވައި ނުލެވިގެން އުޅޭ ސަބަބެއް އޮޅުން ފިލުވުމުހެ ބޭނުމުގައި ކަމަށެވެ.
ރަސް ގެ ނޫސްވެރިޔާ އަށް ފާޑުވިދާޅުވެފައިވާ މީހުންނަށާއި އެޗްޕީއޭ އަށް ވެސް ރަސްގެ ރިޕޯރޓްގައި ވަނީ ފާޑު ކިޔައި ރައްދު ދީފައެވެ. އަދި އެ އޮންލައިން ނޫސް ނޫސްވެރިކަމުގައި ކުރިއަށްދާނެ ކަމުގެ ޔަޤީންކަން ވެސް ވަނީ ދީފައެވެ.
