ނޮވެލް ކޮރޯނާ ވައިރަސް (ކޮވިޑް- 19) ކޮންޓުރޯލުކުރުމަށް ޣައްޒާއިން ކުރަމުންދާ މަސައްކަތަށް އެހީތެރިވުމާއި، 2014 ވަނަ އަހަރު ޣައްޒާގައި ހިނގި ހަނގުރާމައިގައި ގެއްލިފައިވާ އިސްރާއީލު ސިފައިންގެ ދެމީހުންގެ ހަވާލުކުރުމާ އިސްރާއީލުން ގުޅުވައިފިއެވެ.
އިސްރާއީލުުން ހިސާރުކުރުމުގެ ސަބަބުން ދަތިހާލުގައި މިހާރުވެސް އޮތް ޣައްޒާގައި ވެރިކަން ކުރާ ޙަމާސްގެ ސަރުކާރުން ހާމަކޮށްފައިވާ ގޮތުގައި އެ ސަރަހައްދުގައި ކޮވިޑް- 19 ޖެހިފައިވާ 12 މީހުން މިހާރު އެބަތިއްބެވެ. އަދި ޣައްޒާގައި ކޮވިޑް- 19 ގެ ބަލިމަޑުކަމެއް ފެށިއްޖެނަަމަ ފަރުވާކުރެވޭނެ ވަސީލަތްތައް ނެތުމުގެ ކަންބޮޑުވުން ޣައްޒާގެ ސަރުކާރުން ވަނީ ފާޅުކޮށްފައެވެ. 2 މިލިއަން މީހުންގެ އާބާދީއެއް ދިރިއުޅޭ އެ ސަަރަަހައްދުގެ ހޮސްޕިޓަލްތަކުގައި ހުރީ 96 ވެންޓިލޭޓަަރެވެ.
ބަލިމަޑުކަމެއް ފެތުރުނަ ނުދިނުމަށް އިސްރާއީލާއި ޙަމާސުން ވެސް ވަނީ ޒަރޫރީ ބޭނުންތަކަށް ކުރެވޭ ދަތުރުތައް ފިޔަވައި އެެހެން ދަތުރުތަކަށް ސަރަަހައްދީ ރޮނގު ބަންދުކޮށްފައެވެ. މިއާއެކު، އިންސާނީ އެހީއަށް އެދި ޣައްޒާއިން ގޮވައިލި ގޮވައިލުމުގެ ފައިދާ އެހެން ގޮތަކަށް ނެގުމުގެ މަސައްކަތް އިސްރާއީލުން ވަނީ ފަށާފައެވެ.
"ޣައްޒާގައި އިންސާނީ ހާލަތު އޮތް ގޮތުގެ ވާހަކަދައްކާއިރު، އިސްރާއީލުގެ ވެސް އިންސާނީ ބޭނުންތަކެއް ވޭ. އެއީ (ހަނގުރާމައިގައި) މަރުވެފައިވާ ސިފައިންްގެ ހަށިގަނޑު ލިބުން." ނޫސްވެރިންނާ ވާހަކަދައްކަމުން އިސްރާއީލުގެ ދިފާއީ ވަޒީރު ނަފްތާލީ ބެނެޓް ބުނެފައި ވެއެވެ. އޭނާ އިޝާރާތްކޮށްފައި އެވަނީ 2014 ވަނަ އަހަރު އިސްރާއީލާއި ޙަމާސްކުރި ހަނގުރާމައިގައި ގެއްލިފައިވާ އިސްރާއީލު ސިފައިންގެ ދެ މީހުންނަށެވެ. އެ ދެމީހުން ވަނީ ޙަމާސްގެ ބެލުމުގެ ދަށުގައެވެ. އެ ދެމީހުން ދިރި ތިބި ކަމެއް ނުވަތަ ނޫން ކަމެއްވެސް ޙަމާސްއިން ކަށަވަރުކޮށްނުދެއެވެ.
"އަަހަރެންނަށް ގަބޫލުކުރެވޭ ގޮތުގައި އަހަރުމެންނާ ޣައްޒާގެ އިންސާނީ ބޭނުންތަކާ މެދު ދެފަރާތުން ފުޅާ ދާއިރާއެެއްގައި މަޝްވަރާކުރަން ޖެހޭ. މި ކަންކަން ވަކި ނުކުރެވޭނެ. ޔަގީނުންވެސް އަހަރުމެންގެ ހިތްތައް ވަނީ ގިނަ ކަންތައްތަކަކަށް ހުޅުވާލެވިފައި." ދިފާއީ ވަޒީރު ބުންޏެެވެ.
އޭނާ ދައްކާފައި މިވަނީ އިސްރާއީލުން ޣައްޒާއަށް އެހީވުމުގެ ވާހަކަ ކަމެއް ނުވަތަ ބޭރުން ލިބޭ އެހީ ސަރަހައްދީ ރޮނގު ހުރަސްކޮށް ޣައްޒާއަށް ލިބޭނެ ގޮތް ހަދައިދިނުން ކަމެއް ސާފެއް ނުވެއެވެ.
ޙަމާސްއިން ބުނި ގޮތުގައި ސިފައިންގެ ދެމީހުންގެ އިތުރަށް، ސަރަހައްދީ ރޮނގު ހުރަސްކޮށް ޣައްޒާއަށް ވަނުމުން ހައްޔަރުކޮށްފައިވާ އިސްރާއީލުގެ އާއްމުންގެ ދެމީހުން ދޫކުރެވޭނީ ހަނގުރާމައިގެ އަސީރުން ބަދަލުކުރުމުގެ ތެރެއިންނެވެ. އެކަމާ އިންސާނީ ހާލަތަކާ ނުގުޅުވޭނެއެވެ.
ޙަމާސްގެ ތަރުޖަމާނު ފައުޒީ ބަރްހޫމް ވިދާޅުވީ ޣައްޒާގައި ކޮރޯނާ ވައިރަސްގެ ބަލިމަޑުކަމެއް ފެތުރިއްޖެނަމަ އެކަމުގައި ޒިންމާވާން ޖެހޭނީ އިސްރާއީލު ކަމުގައެވެ. އިސްރާއީލުން 13 އަހަރުއްސުރެ ޣައްޒާ ހިސާރުކޮށްފައިވާތީއެވެ.
މީގެ ކުރިން އިސްރާއީލުން ވަނީ އިސްރާއީލު ސިފައިންގެ މަދު ބައެއްގެ ބަދަލުގައި ފަަލަސްޠީނުގެ ގިނަ އަސީރުންތަކެއް ދޫކޮށްފައެވެ. އެހެންނަމަވެސް، އިސްރާއީލުގެ ދިފާއީ ވަޒީރު ނަފްތާލީ ބެނެޓް ބުނީ ދެން އިސްރާއީލުން އެއްވެސް ހާލެއްގައި ފަލަސްޠީނުގެ އަސީރުން ދޫނުކުރާނެ ކަމުގައެވެ.
މާތްކަލާކޯ! ކޮންފަދަ ނުބައި ބައެއް!
ޔާﷲ! ޢެނުބައި ނުލަފާ މީހުން ހުތުރު ގޮތަކަށް ބަލިކުރައްވައި އަނިޔާލިބިގެންވާ މީހުންނަށް ކާމިޔާބު ދެއްވާނދޭވެ!