އޭޝިއާގެ ގައުމުތަކަށް ކުރައްވާ ދަތުރުފުޅުގައި ސަޢޫދީ ރަސްގެފާނު ސަލްމާން ބުނު ޢަބްދުލްޢަޒީޒު މިހާރު ހުންނެވީ އަސޭކަރައިގައެވެ. ރަސްމީ ދަތުރުފުޅަށްފަހު މިހާރު ގެންދަވަނީ އަސޭކަރައިގެ މަޝްހޫރު ފަތުރުވެރި ރަށެއް ކަމަށްވާ ބާލީގައި ޗުއްޓީ ހޭދަ ކުރައްވަމުންނެވެ.
ބާލީއާ ހިތްޕުޅާ ހަމަކުރެއްވިލެއް ބޮޑުކަމުން މިހާރު ވަނީ ޗުއްޓީގެ މުއްދަތަށް ތިން ދުވަސް އިތުރު ކުރައްވައިފައެވެ.
ސަލްމާންގެ އަސޭކަރައިގެ ދަތުރުފުޅާ ގުޅިގެން ހޫނުކޮށް ދެކެވޭ އެއް ވާހަކައަކީ ބާލީގެ ގޮނޑުދޮށުގެ ވާހަކައެވެ. ގޮނޑުދޮށުގެ ވަކި ބައެއް ވަނީ ރަސްގެފާނަށްޓަކައި ވަކިކޮށް، ހުދުފޮތި ދަމައި، ނިވައި ކޮށްފައެވެ. މިއީ ގޮނޑުދޮށުގައި އުޅޭ ފަތުރުވެރިން އެ ރަސްގެފާނަށް ފެނިވަޑައިނުގަންނަވާނޭ ގޮތް ހަދާށާއި، އެ މީހުންނަށް ރަސްގެފާނު ނުފެންނާނޭ ގޮތް ހެދުމަށްޓަކައި ކޮށްފައިވާ ކަމެއް ކަމަށް ބުނެވެއެވެ.
ޖަކާޓާގައި ބޭއްވި ރަސްމީ ވާހަކަފުޅުތައް ނިންމަވައިލެއްވުމަށްފަހު ރަސްގެފާނު ބާލީއަށް ވަޑައިގަތް އިރު، ރަސްގެފާނުގެ އަރިހުގައި 25 އަމީރުންނާއި، 1500 ބޭފުޅުން ވަޑައިގަތެވެ. މުޅި ވަފުދު ދަތުރު ކުރީ ކުދި ހަތް މަތިންދާބޯޓާއި، ބޮއިންގ މަރުކާގެ ބޮޑު ހަ މަތިންދާބޯޓުގައެވެ. ރަސްގެފާނު މަތިންދާބޯޓުން ފައިބައިވަޑައިގަތީ ރަންކުލައިގެ ކަރަންޓު އުފުލިއަކުންނެވެ. އޭރު އެ ރަށާއި ސަރަހައްދުގެ ސަލާމަތީ ކަންތައްތައް ބަލަހައްޓާން ސިފައިންގެ 25 ހާސް މީހުން ތިއްބެވެ.
ރަސްގެފާނު ހުންނަވަނީ ގޮނޑުދޮށާ ކައިރީގައި ހުންނަ ބޮޑު، ޒަމާނީ ހޮޓަލެއްގައެވެ. ކުރީން ވާހަކަ ދެކެވެމުން ދިޔަ ގޮތުގައި ރަސްގެފާނު ވަޑައިގަތީމާ މުޅި ގޮނޑުދޮށް ބަންދުކޮށް އާއްމު ފަތުރުވެރިން ފެއިބުން މަނާ ކުރާނެއެވެ. އެ މަނިކުފާނު ފަރަންސޭސިވިލާތަށް ކުރެއްވި ދަތުރުފުޅުގައިވެސް އެ ގައުމުން ކަންތައް ކުޅަ ގޮތަކީ އެއީއެވެ. އެކަމަކު ކަންތައް ވީ އެހެންނެއް ނޫނެވެ. އަސޭކަރައިގެ ސަރުކާރުން އޮތީ ހޮޓަލުން ފެށިގެން ރަސްގެފާނު ގޮނޑުދޮށަށް ފައިބައިވަޑައިގަންނަވާނޭ ޚާއްސަ މަގެއް ހަދާފައެވެ. އަދި އެ މަނިކުފާނު ގޮނޑުދޮށުގައި އުޅުއްވާ ސަރަހައްދު ވަކިކޮށް، ބަންދު ކޮށްފައެވެ. މުޅި ގޮނޑުދޮށް ބަންދެއް ނުކުރެއެވެ.
ބައެއް އިސްލާމީ ގައުމުތަކުގެ އިސް ވެރިން ގައުމުތަކަށް ވަޑައިގަތީމާ، އެ ގައުމުތަކުގެ އެކި ތަންތާގައި ހުންނަ ބަރަހަނާ ބުދުތައް ނަގައެވެ. ނުވަތަ ނިވައި ކުރެއެވެ. އެއީ އެ ބޭފުޅުންނަށް އިހުތިރާމު ކުރުމުގެ ގޮތުންނެވެ. އީރާނުގެ ރައީސް ޙަސަން ރޫޙާނީ ފައިބެ އަހަރު އިޓާލީވިލާތަށް ވަޑައިގަތީމާ، އެ ގައުމުގެ ދާރުލްއާސާރުގައި ހުރި ބުދުތައް ނަގައި ފޮށިފޮށްޓައް ލައި ރައްކައު ކުރިއެވެ.
އަސޭކަރައިގައި ބުދު ފޮރުވުމުގެ ކަންތައްތައް މާ ބޮޑަކަށް ނުހިނގައެވެ.
ރަސްގެފާނު، އަސޭކަރައިގެ ރައީސާ ބައްދަލު ކުރައްވާން ރިޔާސީ ގަނޑުވަރަށް ވަޑައިގަތީމާ އެތާނގައި ހުރި ބަރަހަނާ ބުދުތަކުގައި ފޮތި އަޅައި، ނިވައި ކުރިއެވެ. އެކަމަކު ރަށު ތެރޭގަޔާއި އެހެން ތަންތާގައި ހުރި ބުދުތައް ނިވަލެއް ނުކުރެއެވެ. އަސޭކަރައިގައި ވަރަށް ގިނަ އަދަދަކަށް ހިންދޫން އުޅެއެވެ.
ސަޢޫދީ ރަސްގެފާނު ވަޑައިގަތީމާ އެމަނިކުފާނުގެ ފައިންޕުޅު ދެކޭން ވަރަށް މީހުން މަސައްކަތް ކުރިއެވެ. އެހެންނަމަވެސް އެ ފުރުސަތު އެއްވެސް މީހަކަށް ނުލިބެއެވެ. ގަދަކަމުން އެ ފުރުސަތު ހޯދާން އުޅުނު ދެ އަންހެނަކު ހައްޔަރުވެސް ކުރިއެވެ. ދެ މީހުން ކުރެ އެކަކީ އުމުރުން 41 އަހަރުގެ މީހެކެވެ. އޭނާ ބޭނުންވީ އޭނާ ހަދާފައިވާ 500 ޅެމުގެ ފޮތެއް ރަސްގެފާނަށް ވެދުމަށް އަރުވާށެވެ.
ރަސްގެފާނު ސަލްމާންގެ އޭޝިއާ ދަތުރުފުޅުގައި ވަޑައިގަންނަވާން ހަމަޖެހިފައިވާ ގައުމުތަކަކީ އަސޭކަރަޔާއި، މެލޭޝިއާއާއި، ބުރޫނާއީއާއި ޖަޕާނާއި، ސީނުކަރަޔާއި، ދިވެހިރާއްޖެއެވެ. (މައުލޫމާތު: ބީބީސީ)
