އިސްލާމާދީނަށް ފުރައްސާރަކޮށް ސޯޝަލް މީޑިއާގައި ލިޔަމުންދިޔަ މީހަކު ގދ. ތިނަދޫން ބަންދުކޮށް އޭނާގެ މައްސަލަ ކޯޓަށް ފޯނުވާފައިވަނިކޮށް މާރިޗު 9 ވަނަ ދުވަހު ކޯޓުން ވަނީ އެމީހާ ދޫކޮށްލާފައި ކަމަށް ފުލުހުން ވިދާޅުވެއްޖެއެވެ.
ފުލުހުން މިއަދު ވިދާޅުވީ ފުލުހުން އެމީހާ ބަންދުކޮށްފައިވަނީ 2019 ވަނަ އަހަރު ސެޕްޓެމްބަރު 10 ވަނަދުވަހުގައި ކަމަށެވެ. އަދި އެމަހު 14 ވަނަ ދުވަހުވަނީ ފުލުހުންގެ ބަންދުން ދޫކޮށް މޯލްޑިވްސް ކަރެކްޝަނަލް ސާވިސަސްއާ ޙަވާލުކޮށްފައި ކަމަށް ވެސް ފުލުހުން ވިދާޅުވިއެވެ.
މިމައްސަލައިގެ ތަޙުގީގު ނިންމުމަށްފަހު އޭނާގެ މައްޗަށް ދަޢުވާ ކޮށްދިނުމަށް އެދި ޕްރޮސެކިއުޓަރޖެނެރަލް އޮފީހަށް ފޮނުވާފައިވަނީ 2019 ވަނަ އަހަރު އޮކްޓޯބަރ 10 ވަނަ ދުވަހު ކަމަށް ވެސް ފުލުހުން ވިދާޅުވިއެވެ.
"މި މައްސަލަ ކޯޓުގައި އޮއްވާ ކޯޓުންވަނީ 2020 ވަނަ އަހަރު މާރިޗު މަހު 9 ވަނަ ދުވަހު އޭނާ ބަންދުން ދޫކޮށްލާފައި،" ފުލުހުން މިއަދު ވިދާޅުވިއެވެ.
ރުސްތުމް ނަމަކަށް ކިޔާ މި މީހާ ދޫކޮށްލުމުން އަނެއްކާވެސް ވަނީ ސޯޝަލް މީޑީއާގައި ލިޔަން ފަށައިފައެވެ. ފުލުހުން ވިދާޅުވީ އެފަދަ ފަރާތްތައް ހޯދައި އަޅަންޖެހޭ ފިޔަވަޅު އަޅަމުން ގެންދާނެ ކަމަށެވެ.
