ދަރިންނާ ވާހަކަފުޅު ދައްކަވާއިރު ނުވަތަ ދޭދޭ މުޢާމަލާތްތަކުގައިވެސް ދެބަހެއް ނުވަތަ އެއަށްވުރެ ގިނަބަސް މަސްހުނިކޮށްގެން ވާހަކަ ދެއްކެވުން ހުއްޓައިލުމަށް ދިވެހި ބަހުގެ އެކަޑެމީގެ ރައީސް އަޝްރަފް ޢަލީ އިލްތިމާސް ކުރައްވައިފިއެވެ. އޭނާ މި އިލްތިމާސް ކުރެއްވީ މިއަދު ފާހަގަ ކުރަމުންދާ ދުނިޔޭގެ މާދަރީ ބަހުގެ ދުވަހުގެ މުނާސަބަތުގައި މުޅި ރާއްޖެއަށް ދެއްވާ މެސެޖަކީ ކޮބައިތޯ އާފަތިހުން ދެންނެވި ސުވާލަކަށް ޖަވާބު ދެއްވަމުންނެވެ.
އަޝްރަފު ވިދާޅުވި ގޮތުގައި ބަސް މަސްހުނި ކުރުމަކީ ނޭދެވޭ އެތައް އަސަރެއް ކުރާ ކަމެކެވެ. އޭގެ ތެރެއިން އެއް ކަމަކީ ދަރިންނަށް އޮޅި، މަސްހުނި ކުރާ ދެބަހުންކުރެ ބަހަކަށް ރަނގަޅަށް އަހުލުވެރި ނުވެވޭ ގޮތް ވުމެވެ. "އަޅުގަނޑަށް ހީވާ ގޮތުގައި މި ގޮތަށް މަސްހުނި ކުރާ ކުރުމަކީ ޢިލްމީ ފެންވަރު ފެންނަ ކަމެއް ކަމަށް ބައެއް މީހުން ދެކޭ. މާ މޮޅު ކަމެއް ކަމަށް ބަލާ. އެކަމަކު އެއީ ވަރަށް ދެރަ ވިސްނުމެއް. ހަގީގީ މޮޅުކަން ފެންނާނީ އެ ވާހަކަ ދައްކާ ބަހަކުން ސާފުކޮށް، ރީތިކޮށް ވާހަކަ ދެއްކީމާ. މަސްހުނި ކުރީމާ ފެންނާނީ ދެ ބަހަކުން ކުރެ ބަހަކަށް ކުޅަދާނަ ނޫންކަން." އަޝްރަފް ވިދާޅުވިއެވެ.
މާދަރީ ބަހުގެ ދުވަސް ފާހަގަ ކުރުމުގެ ގޮތުން ދިވެހި ބަހުގެ އެކަޑެމީން ބައެއް ކަހަލަ ހަރާކަތްތައް ހިންގަމުން އެބަ ދެއެވެ. އޭގެ ތެރެއިން އެއް ކަމަކީ "އަސްކަނި މައުރަޒު"ގެ ނަމުގައި މިއަދު ހެނދުނު 10 ން ފެށިގެން 6 ޖަހަންދެން ކުރިއަށް ގެންދާ ހަރަކާތެކެވެ. މި ހަރަކާތް ކުރިއަށް ގެންދަނީ އެކަޑެމީގެ އަސްކަނީގައެވެ. ކުރާ ކަމަކީ އެކަޑެމީން ޝާއިއު ކޮށްފައިވާ ފޮތްތައް ހެޔޮ އަގުގައި ވިއްކުމާއި، ދިވެހި ބަހާ ބެހޭ ތަފާތު މައުލޫމާތު ދިނުމެވެ.
މީގެ އިތުރަށް މާލެއާއި، ރާއްޖޭގެ އެކި ރަށްރަށުގެ އިސްކޫލުތަކުގައި ދަރިވަރުން ބައިވެރިކޮށްގެންނާއި، ދަރިވަރުން ލައްވައި ހިންގާ އަދަބީ ހަރަކާތްތަކެއްވެސް މިއަދުގެ ޚާއްސަ ޕްރޮގްރާމުތަކުގެ ތެރޭގައި ހިމެނެއެވެ. އަޝްރަފް ވިދާޅުވި ގޮތުގައި ބައެއް އިސްކޫލުތަކަށް ބަހުގެ ފުންނާބު އުސް ބޭފުޅުން ފޮނުއްވައިގެން އެހީތެރިކަން ދެއްވާނެއެވެ. އަދި ރާއްޖޭގެ ތަފާތު މީޑިއާތަކަށް ބޭފުޅުން ފޮނުއްވައިގެން އެކި ކަހަލަ ޕްރޮގްރާމުތައް ކުރިއަށް ގެންދިއުމުގެ މަސައްކަތް ކުރައްވަމުން ގެންދަވާ ކަމަށްވެސް އޭނާ ވިދާޅުވިއެވެ.
މިއަދުގެ މުނާސަބަތުގައި ޚާއްސަ ލުއި ފޮތެއް ނެރުއްވާން އުޅުއްވި ނަމަވެސް، އެކަން މިއަދު ކުރެއްވޭ ގޮތް ނުވިކަމަށް އަޝްރަފް ވިދާޅުވިއެވެ. "މިއަދު އެ ފޮތް ނެރެވޭތޯ އަޅުގަނޑުމެން މަސައްކަތް ކުރިން. ޗާޕު ކުރެވޭ ގޮތް ނުވީމާ ސީދާ މިއަދު ނެރެވޭ ގޮތް ނުވީ. އެކަމަކު ކުރިއަށް އޮތް ދެ ދުވަހެއްގެ ތެރޭގައި އިރާދަ ކުރެއްވިއްޔާ ފޮތް ނެރޭނަން. މިއީ ވަރަށް އިލްމީ މައުލޫމާތު އެކުލެވޭ މުހިއްމު ފޮތެއް."
މި ކަންތައްތަކުގެ އިތުރަށް ހުކުރު ވިލޭރޭ ބާއްވާ ޚާއްސަ ފޯރަމެއްގެ ވާހަކަ އަޝްރަފް ވިދާޅުވިއެވެ. "މިއީ އެކި ދާއިރާގެ އިލްމުވެރިންނާއި، ބަހަވީ އިލްމުވެރިން ބައިވެރިވެ ވަޑައިގަންނަވާ ވަރަށް ބޭނުންތެރި ފޯރަމެއް. ދިވެހިބަހުގެ ވާހަކަޔާއި، މާދަރީ ބަހުގެ މުހިއްމުކަމާއި، ބަހުގެ ކުރިމަގާ ބެހޭ ވަރަށް ގިނަ މައުލޫމާތު ދޭ ފޯރަމަކަށް މި ފޯރަމް ވާނެ. އަޑުއަހާނޭ، ބަލާނޭ ގިނަ ބަޔަކު ތިބެގެން ކުރިއަށް ގެންދާ މި ފޯރަމަކީ އިސްލާމިކް ޔުނިވަރުސިޓީއާއި، ދިވެހި ބަހުގެ އެކަޑެމީއާއި، ޕީއެސްއެމް ގުޅިގެން ބާއްވާ ފޯރަމެއް." އަޝްރަފް ވިދާޅުވި ގޮތުގައި މި ފޯރަމް ޓީވީއެމުން ވަގުތުން ދުރަށް ދައްކާނެއެވެ.
ދުނިޔޭގެ މާދަރީ ބަހުގެ ގޮތުގައި ކޮންމެ އަހަރަކުވެސް ފާހަގަ ކުރަނީ ފެބްރުއަރީ މަހުގެ 21 ވަނަ ދުވަހެވެ.
