ނިރުބަވެރިކަމުގެ އަސްލަކީ އިސްލާމް ދީން ނޫން ކަމަށް ޖަރުމަނުވިލާތުގެ ވެރިޔާ އަންޖެލާ މާރކެލް ވިދާޅުވެއްޖެއެވެ. އެ ކަމަނާ ވިދާޅުވި ގޮތުގައި ނިރުބަވެރިކަމާ ދެކޮޅަށް ކުރާ ހަނގުރާމައިގައި އިސްލާމީ ގައުމުތަކާ ގުޅިގެން އެއްބާރުލުމަކީ ވަރަށް މުހިއްމު ކަމެކެވެ.
ޖަރުމަނުވިލާތުގެ ވެރިރަށް މިއުނިކްގައި މިހާރު ކުރިއަށްދާ "މިއުނިކް ސެކިއުރިޓީ ކޮންފަރެންސް" ގައި ވާހަކަފުޅު ދައްކަވަމުން ނިރުބަވެރިކަމުގެ އިތުރަށް ރޫސީވިލާތާއެކު އޮންނަ ގުޅުމުގެ މައްޗަށްވެސް އެކަމަނާ ވާހަކަފުޅު ދެއްކެވިއެވެ. މި މަހާސިންތާގައި އެމެރިކާގެ ނާއިބު ރައީސް މައިކް ޕެންސް ވެސް ބައިވެރިވެ ވަޑައިގަނެއެވެ. އަންޖެލާއަކީ އެމެރިކާގެ ރައީސް ޑޮނަލްޑް ޓްރަމްޕް ގެންގުޅުއްވާ ބައެއް ސިޔާސަތުތަކާ ދެކޮޅު ހައްދަވާ ބޭފުޅެކެވެ. ބައެއް އިސްލާމީ ގައުމުތަކުން ހިޖުރަ ކުރާ މީހުން އެމެރިކާއަށް ވަނުން މަނާ ކުރާ އަމުރެއް ނެރުމާ ގުޅިގެން އަންޖެލާ ވަނީ ނުރުހުން ފާޅު ކުރައްވައިފައެވެ.
އަންޖެލާ ވިދާޅުވި ގޮތުގައި ރޫސީ ވިލާތާއި، ޔޫރަޕާ ދެމެދު އޮންނަ ގުޅުމުގައި އުނދަގޫ މައްސަލަތަކެއް އެބަހުއްޓެވެ. އެހެންނަމަވެސް މައްސަލަތައް ހައްލު ކޮށްގެން އައިސިލްއާ ދެކޮޅަށް ކުރާ ހަނގުރާމައިގައި ރޫސީ ވިލާތް ބައިވެރިކޮށް، އެހީތެރިކަން ހޯދުމަކީ ވަރަށް މުހިއްމު ކަމެއް ކަމަށް އެކަމަނާ ވިދާޅުވިއެވެ.
"މިއުނިކް ސެކިއުރިޓީ ކޮންފަރެންސް" އަކީ ޔޫރަޕާއި، އެމެރިކާގެ ސަލާމަތާ ގުޅޭ ގޮތުން މަޝްވަރާކޮށް ހައްލުތަކެއް ހޯދުމަށްޓަކައި ބާއްވާ މަހާސިންތާއެކެވެ.
