ދިވެހިރާއްޖޭގެ ގުޅުން ޕަބްލިކް ލިމިޓެޑްގެ ޑިރެކްޓަރުންގެ ބޯޑުންވަނީ1,092,120,000 ރުފިޔާ (އެއް ބިލިއަން ނުވަދިހަ ދެ މިލިއަން އެއްލައްކަ ވިހި ހާސް ރުފިޔާ)، އަހަރުގެ ޖުމްލަ ހިއްސާގެ ފައިދާގެ ގޮތުގައި ބެހުމަށް ހިއްސާދާރުންނަށް ހުށަހެޅުމަށް ނިންމައިފިއެވެ. 2016 ވަނަ އަހަރުގެ ޖުމްލަ ހިއްސާގެ ފައިދާ ބެހިފައިވަނީ ތިރީގައިވާ ގޮތުގެ މަތިންނެވެ.
- 2016 ވަނަ އަހަރުގެ އިންޓަރިމް ޑިވިޑެންޑްގެ ގޮތުގައި ހިއްސާއަކަށް ބެހުނު 5.92 ރުފިޔާއާއި (ޖުމްލަ 449،920،000 ރުފިޔާ)، އަދި
- 2016 ވަނަ އަހަރުގެ ހާއްސަ ފައިނަލް ޑިވިޑެންޑްގެ ގޮތުގައި ބެހުމަށް ހިއްސާދާރުންނަށް ހުށަހަޅާ ހިއްސާއަކަށް ޖެހޭ 8.45 ރުފިޔާ (ޖުމްލަ 642،200،000 ރުފިޔާ)އެވެ.
- އަދި 2016ގެ މުޅި ޖުމްލަ ހިއްސާއަކަށް 37 ރުފިޔާ ޑިވިޑެންޑްގެ ގޮތުގައި ވެގެންދާނެއެވެ.
ދިރާގުން ބުނާ ގޮތުގައި "އަހަރެންގެ ދިރާގު – ދިވެހިންގެ ގުޅުން" މި ޝިއާރުގެ ދަށުން 2012/2011 ވަނަ އަހަރު ކުންފުނި ލިސްޓްކުރެވުނު ފަހުން ކުންފުނިން ވަނީ އެތައް ކުރިއެރުންތަކެއް ހޯދާ، ރަނގަޅު މާލީ ނަތީޖާތަކެއް ހޯދައިފައެވެ. ފާއިތުވީ 5 އަހަރުވެސް ދެމެހެއްޓެނިވި ފައިދާއެއް ވަނީ ހިއްސާދާރުންނަށް ބަހާފައިވެއެވެ. މިގޮތުން 2016ގެ ހިއްސާގެ ފައިދާއާއި އެކު ޖުމްލަ 3.9 ބިލިއަން ރުފިޔާ ހިއްސާދާރުންނަށް ބެހިގެން ދާނެއެވެ. އަދި ހަމަ މިމުއްދަތުގައި ދިރާގުގެ ހިދުމަތްތަކުގެ ފެންވަރު ރަނގަޅުކޮށް، ޒަމާނީ ފެންވަރުގައި ހިދުމަތްތައް ފޯރުކޮށް ދިނުމަށް ޖުމްލަ 1.6 ބިލިއަނާއި ގާތަށް އިންވެސްޓްކުރެވިފައިވެއެވެ. އަދި ކުންފުނީގެ ހިދުމަތްތައް ބޭނުންކުރަމުންދާ ކަސްޓަމަރުންގެ އަދަދު 5 ލައްކަ އަށް އަރާފައިވެއެވެ.
2016 ވަނަ އަހަރުގެ މާލީ ނަތީޖާއަށް ރިޔާއަތްކޮށް، ދިރާގު ލިސްޓުކުރެވުނުތާ މިވީ 5 އަހަރެވެ.
ދިރާގުގެ ސީ.އީ.އޯ އަދި މެނޭޖިންގ ޑައިރެކްޓަރ އަލްފާޟިލް އިސްމާޢިލް ރަޝީދު ވިދާޅުވިއެވެ. "ދިރާގުގެ މި ކާމިޔާބީގެ އަސްލަކީ ކުންފުނީގެ ކަސްޓަމަރުން ކުންފުންޏަށް ކުރާ އިތުބާރާއި، ހިއްސާދާރުންގެ މެދުގައި ކުންފުންޏަށް އޮންނަ ޔަގީންކަމާއި، އަދި ކުންފުނީގެ ހިވާގި މުވައްޒަފުންގެ ބުރަ މަސައްކަތެވެ. މިފުރުސަތުގައި ދިރާގުގެ ބޯޑުގެ ފަރާތުންނާއި، މެނޭޖްމަންޓް އަދި އަޅުގަނޑުގެ އަމިއްލަ ނަމުގައި ކަސްޓަމަރުންނަށާއި، ހިއްސާދާރުން އަދި ދިރާގުގެ މުވައްޒަފުންނަށް ނުހަނު ޝުކުރު އަދާކުރަމެވެ."
2016 ވަނަ އަހަރުގެ ފައިނަލް ޑިވިޑެންޑްގެ ގޮތުގައި އަހަރީ އާންމު ޖަލްސާގައި ފާސްކުރާ ފައިދާ ބެހުމަށް ހަމަޖެހިފައިވަނީ ދިރާގުގެ 2016 ވަނަ އަހަރުގެ އަހަރީ އާންމު ޖަލްސާއަށް އިއުލާނުކުރެވޭ 'ބުކް ކްލޯޝަރ ޑޭޓް' ގައި ކުންފުނީގެ ރަޖިސްޓަރގައި ލިސްޓްކުރެވިފައިވާ ހިއްސާދާރުންނަށެވެ.
