ޣައްޒާގައި އިޒްރޭލުން ހިންގި ޖަރީމާގެ ވާހަކަތައް ޑޮކްޓަރ މެޑްސް ގިލްބަރޓް ލިޔުއްވައި، ހާމަ ކުރައްވައިފިއެވެ.
އުމުރުފުޅުން 69 އަހަރުގެ ޑޮކްޓަރ ގިލްބަރޓަކީ ނޯރވޭގެ ބޭފުޅެކެވެ. އޭނާގެ ޚާސިއްޔަތަކީ ހޭނެއްތުމާއި، ކުއްލި ހާލަތުގެ ފަރުވާއެވެ. އޭނާ ވަނީ އިޒްރޭލުން ޣައްޒާގައި ކުރި ހަތަރު ހަނގުރާމައެއްގައި ހިންގާފައިވާ އިންސާނިއްޔަތާ ޚިލާފު ބޮޑެތި ޖަރީމާ ތަކުގެ ވާހަކަ ލިޔުއްވައިފައެވެ. އޭނާ ވިދާޅުވާ ގޮތުގައި އޭނާ ބޭނުންފުޅު ވަނީ ބޭނުން ޖެހިފައިވާ ބަލިކަށި މީހުންނަށް އެހީތެރިވެވަޑައިގަންނަވާށެވެ. އެއް ގައުމުން އަނެއް ގައުމަށް ދަަތުރު ކުރައްވައި ފަލަސްތީނު ރައްޔިތުންނަށް އެހީތެރިވެވަޑައިގަތުމުގެ މަސައްކަތް ކުރައްވަނީ އެހެން ވެގެންނެވެ. 1982ވަނަ އަހަރު އިޒްރޭލުން ބައިރޫތަށް އަރައިގަތް އިރު އޭނާ ހުންނެވީ ބައިރޫތުގައި ތިބި ފަލަސްތީނުގެ މީހުނާ އެކުގައެވެ. 2006 ވަނަ އަހަރުއާއި، 2009 ވަނަ އަހަރުއާއި، 2012 ވަނަ އަހަރުއާއި، 2014 ވަނަ އަހަރު އިޒްރޭލުން ހިންގި ޢުދުވާނު ހިންގި އިރު އޭނާ ހުންނެވީ ޣައްޒާގައެވެ.
ގިލްބަރޓް ވިދާޅުވާ ގޮތުގައި އިޒްރޭލުގެ އަނިޔާވެރިކަން އޭނާ ލޯފުޅުން ދެކެވަޑައިގަތެވެ. 34 އަހަރު ކުރީން ބައިރޫތު ހިސާރު ކުރި ގޮތަށް ޣައްޒާވެސް ހިސާރުކޮށް، ކޮންމެހެން ބޭނުންވާ އަސާސީ ތަކެތިވެސް އެތަނަށް އެތެރެ ކުރިޔަ ނުދީ ހިފަހައްޓައިގެން އެތައް ދުވަހަކު ތިބުމަށް ފަހު، އެންމެ ފަހުން ބޮން އަޅައި، އެތައް ބަޔަކު ގަތުލު ކުރިތަން އޭނާ ދެކެވަޑައިގަތެވެ.
ހަސްފަތާލުތަކަށާއި، އެމްބިއުލަންސުތަކަށް ބޮން އެޅުން
ޣައްޒާގެ ހަނގުރާމަތަކުގެ ތެރޭގައި ހިނގި ބައެއް ކަންތައްތައް މީޑިއާތަކުން ރިޕޯޓެއް ނުކުރެއެވެ. އެފަދަ ހާދިސާތައް ގިލްބަރޓްގެ ހަނދުމަފުޅުގައި މިހާރުވެސް އެބަހުއްޓެވެ. އޭގެ ތެރޭގައި ހިމެނެނީ އިޒްރޭލުގެ ސިފައިން ހަސްފަތާލުތަކަށާއި، އެންބިއުލަންސް ތަކަސް ދިން ހަމަލާތަކާއި، ސިއްހީ އެހީތެރިންނާއި، ޑަކްޓަރުން ގަސްތުގައި މެރުން ހިމެނެއެވެ. އެއީ ފަލަސްތީނުގެ ރައްޔިތުން، އެ މީހުންގެ ހައްގުތައް ހޯދާން އަޑު އުފުލުން ހުއްޓުވުމުގެ ބޭނުމުގައި އިޒްރޭލުން ކުރާ ކަމެއް ކަމަށް ގިލްބަރޓް ވިދާޅުވިއެވެ.
އޭނާ ވިދާޅުވާ ގޮތުގައި މިއީ ހަމަ ގަސްތުގައި ދޭ ހަމަލާއެވެ. 2014 ވަނަ އަހަރު ހިނގި ޣައްޒާގެ ހަނގުރާމައިގައި 47 އެންބިއުލަންސަކަށް ގަސްތުގައި ހަމަލާ ދިން ސަބަބެއް އޭނާއަކަށް ވިސްނިވަޑައެއް ނުގަނެއެވެ. "އެމީހުން އެ ކުރާ ކަންތައްތަކަކީ ބައިނަލްއަގުވާމީ ގާނޫނުތަކާއި، މުޢާހަދާ ތަކާ ކަނޑައެޅިގެން ޚިލާފު ކަންތައްތަކެއްކަން އިޒްރޭލަށް ރަނގަޅަށް އެނގެއެވެ. އެކަމަކު އެމީހުންނަށް އޮންނަނީ އާދަޔާ ޚިލާފު އިނާޔަތެއް ލިބިފައެވެ. އެހެންވީމާ އެމީހުން ތިބެނީ ހުރިހައި އަދަބަކުން ރެކިގެންނެވެ." އޭނާގެ މިފަދަ ވާހަކަފުޅުތަކުގެ ސަބަބުން އިޒްރޭލުން ވަނީ އޭނާ އެ ގައުމަށް ވެދެވަޑައިގަތުން މަނާ ކޮށްްފައެވެ.
އިޒްރޭލުން ބުނަމުންދާ ގޮތުގައި މަދަނީން ދިރިއުޅޭ ތަންތަނަށް އިޒްރޭލުން ހަމަލާ ދެނީ ހަމާސްގެ މީހުން މަދަނީން ދިރިއުޅޭ ތަންތާގައި ހަތިޔާރު ރައްކާކޮށްފައި ބަހައްޓާތީއެވެ. ގިލްބަރޓް ވިދާޅުވިއެވެ. "އެއީ ވަރަށް ހެއްވާ އަދި ދޮގު ބަހަނާއެކެވެ. އިޒްރޭލުން ހަމަލާ ދިން އެއްވެސް އިސްކޫލަކު ހަތިޔާރެއް ނެތެވެ. އަދި ހަސްފަތާލެއްގައި ނުވަތަ މިސްކިތެއްގައިވެސް ނެތެވެ. އަދި އިޒްރޭލުން ބިމާ ހަމަކޮށްލީ އެތައް ހާސް ގެއަކީވެސް ހަތިޔާރު ހުރި ގޭގެއެއް ނޫނެވެ. އެ ގޭގެ ސުންނާފަތިކޮށްލީ ގޭގޭގެ ވެރިން ގޭގައި ތިއްބައެވެ."
އޭނާ ގަބޫލު ކުރައްވާ ގޮތުގައި އިޒްރޭލުގެ ބޭނުމަކީ ހަނގުރާމަވެރިން ނައްތައިލުން ކަމުގައި ވީނަމަ، އެންމެ ފުރަތަމަ ކުރާނޭ ކަމަކީ ސަރަހައްދީ ރޮނގު ހުޅުވާލައި، މަދަނީންނަށް އެ ސަރަހައްދުން ބޭރަށް ނުކުތުމުގެ ފުރުސަތު ދިނުމެވެ. އެހެންނަމަވެސް ކަންތައް ކުރާ ގޮތަކީ އެޔެއް ނޫނެވެ. އިޒްރޭލާއި، އިޒްރޭލުގެ މިތުރު އެމެރިކާއިން ކުރާ ކަމަކީ އަލަށް އުފައްދާ ހަތިޔާރުގެ އަޖުމަ ބެލުމެވެ. މަދަނީންނަށް ހަމަލާ ދީގެން އެ ފުރުސަތުގެ ބޭނުން ކުރުމެވެ.
ކުށެއް ނެތް މީހުން މެރުން
2014 ވަނަ އަހަރު ޣައްޒާގައި ހަނގުރާމަ ހިނގިއިރު ގިލްބަރޓް އުޅުއްވީ ޣައްޒާގައި ހުންނަ ޝިފާ ހަސްފަތާލުގައެވެ. އެ ހަސްފަތާލަށް މެދުވެރިވީ ހާލަތާ މެދު ހިތާމަ ކުރައްވާ ކަމަށް އޭނާ ވިދާޅުވިއެވެ. "ދިހަ އަހަރު ވާންދެން ޣައްޒާ ހިސާރު ކޮށްގެން، މީހުން ބަނޑަށް ޖައްސައިގެން ތިބުމުގެ ސަބަބުން ޣައްޒާގެ ހަސްފަތާލުތަކަށް ޖެހިފައިވާ ހާލަކީ ޚިޔާލަށްވެސް ގެންނާން އުނދަގޫ ދަތި ހާލެކެވެ. އެ ތަންތާކު އާދައިގެ ބޭހެއްވެސް ނެތެވެ. ފަޅައި، ފަރުވާ ދޭން ބޭނުން ކުރާނޭ އާލާތެއް ނެތެވެ. އެއީ އިންސާނިއްޔަތަށް ކުރިމަތިވީ ބޮޑު ކާރިސާއެކެވެ. އެއީ ނިމުމެއް އަންނާން ޖެހޭ ކަމެކެވެ."
މީޑިއާގައި ދެއްކެވި ވާހަކަފުޅުގެ އިތުރަށް ގިލްބަރޓް ވަނީ 2014 އިޒްރޭލުން ޣައްޒާގައި ކުރި ހަނގުރާމަޔާ ގުޅޭ ފޮތެއްވެސް ނެރުއްވައިފައެވެ. އެ ފޮތުގައި އޭނާ ލިޔުއްވައިފައިވާ ގޮތުގައި ހަސްފަތާލުތަކުގައި ތިބެގެން ޑަކްޓަރުން ގެންދިޔައީ މީސްމީހުންގެ ފުރާނަ ސަލާމަތް ކުރެވޭތޯ މަސައްކަތް ކުރަމުންނެވެ. އިޒްރޭލުގެ ސިފައިން ގެންދިޔައީ އެ މީސްމީހުން މަރުން ސަލާމަތް ކުރުމުގެ މަގަށް ހުރަސް އަޅަމުންނެވެ. "އަ ނައިޓް އިން ޣައްޒާ" ގެ ނަމުގައި އޭނާ ނެރުއްވި ފޮތުގައި 2014 ވަނަ އަހަރު އިޒްރޭލުން ހިންގި ޖަރީމާތައް ވަރަށް ތަފުސީލުކޮށް، ފޮޓޯއާއެކު، ބަޔާންކޮށް ދެއްވައިފައި ވެއެވެ.
ގިލްބަރޓަކީ 70 ގެ އަހަރު ތަކުން ފެށިގެން ފަލަސްތީނަށް ތާއީދު ކުރައްވަމުން ގެންދަވާ ބޭފުޅެކެވެ. "އިޒްރޭލުގެ ޢުދުވާނުގެ ވަރުގަދަކަން 2009 ވަނަ އަހަރާ އަޅައި ބަލާއިރު 2014 ވަނަ އަހަރު ދެގުނައަށް ބޮޑެވެ. 2014 ވަނަ އަހަރު ޣައްޒާއަށް 502 ޓަނުގެ ގޮވާ ތަކެތި އަޅައިފައި ވެއެވެ. ފަލަސްތީނުގެ ހަސްފަތާލުތަކަށް ގެންނަ ބޯ ނެތް މައްޔިތުންނާއި، ހަށިގަނޑުގެ އެކި ގުނަވަންތައް ވަކިވެފައިވާ މީހުންނާއި، މޫނާއި، ބޮލާއި، ހަށިގަނޑުގެ އެކި ތަންތަންތަ ފިހިގެން ގެންނަ މީހުންގެ މަތީން އަހަރެން ދުވަހަކުވެސް ހަނދާނެއް ނުނެތޭނެއެވެ." އޭނާ ލިޔުއްވައިފައި ވެއެވެ.
ހަނގުރާމައިގެ ވާހަކަ އޭނާ ލިޔުއްވައިފައި ވަނީ ހަމައެކަނި މި ފޮތަކު ނޫނެވެ. "އަލިފު ދާލަށް އަޅުގަނޑު ހުށަހެޅި ރިޕޯޓުގައިވެސް މި ވާހަކަތައް ލިޔުނީމެވެ. ހިސާރުގެ ސަބަބުން ލިބޭ ބޮޑެތި ގެއްލުމުގެ ވާހަކަޔާއި، ދިރިއުޅުމުގެ ވަސީލަތްތައް އެކަށިގެންވާ މިންވަރަށްވެސް ނެތް ވާހަކަޔާއި، އިޒްރޭލުން ކޮށްފައިވާ ހަނގުރާމަތަކުގެ ސަބަބުން ޣައްޒާއަށް ޖެހިފައިވާ ނިކަމެތި ހާލުގެ ވާހަކަވެސް އެ ރިޕޯޓުގައި ބަޔާން ކޮށްފައި ވާނެއެވެ."
ދޫނުކޮށް ހިފެހެއްޓުން
"51 ދުވަހަށް ދިގު ދެމިގެން ދިޔަ ޢުދުވާނުގައި އިޒްރޭލުން ޣައްޒާގެ ގެދޮރާއި، އިންޖީނުގެތަކާއި، ފެންތާނގީ ފަދަ ތަންތަން ސުންނާފަތި ކުރަމުން ދިޔަ ނަމަވެސް އެންމެ ބޮޑަށް ފާހަގަ ކުރެވޭ ކަމަކީ ފަލަސްތީނު މީހުންގެ އެއްބައިވަންތަކަމާއި، ހިތްވަރުގަދަ ކަމެވެ. އެ މީހުން އެހެން މީސްމީހުންގެ ފުރާނަ ސަލާމަތް ކޮށްދޭށާއި، ޒަޚަމްތަކަށް ފަރުވާ ހޯދައިދޭން މަސައްކަތް ކުރަނީ އެންމެން އެކީގައި އެއް އާއިލާއެއް ފަދައިންނެވެ. އެހެންވީމާ ކޮންމެ ވަގުތަކުވެސް ފަލަސްތީނުގެ ރައްޔިތުންނަށް އެހީތެރިވެ ދިނުމަކީ އަހަރެންގެ ވާޖިބެއް ކަމަށް ދެކެމެވެ."
ފަލަސްތީނު ރައްޔިތުންގެ މެދުގައި ގިލްބަރޓަށް ވަރަށް ބޮޑު ތާއީދަކާއި ގަދަރެއް އޮވެއެވެ. އޭނާގެ މަސައްކަތްތައް ވަރަށް ގިނަ ބަޔަކު އުފަލާއެކު ބަލައިގަނެއެވެ. ފާހަގަ ކުރެއެވެ. އެމީހުންނަށް ދިމާވާ ނުރައްކާތެރި ހާލަތްތަކުގައި އެމީހުނާއެކު ހުންނާތީ ވަރަށް ގިނަ ބަޔަކު ގަބޫލު ކުރަނީ އެއީ އެ މީހުންގެ ބަތަކެއް ކަމުގައެވެ. އެކަމަކު ގިލްބަރޓް ދެކެވަޑައިގަންނަވާ ގޮތް ތަފާތެވެ. "ހަގީގީ ބަތަލުންނަކީ ދޫނުކޮށް އެއް ގޮތެއްގައި ހިފަހައްޓައިގެން އެތިބަ ޣައްޒާގެ ހިތްވަރުގަދަ ރައްޔިތުންނެވެ. އެ މީހުން އެ ދިރިއުޅެނީ އެއްވެސް ވަސީލަތެއް، އެހީތެރިކަމެއް ނެތިއެވެ."
ގިލްބަރޓް ވިދާޅުވިއެވެ. "ދުނިޔެއަށް އަހަރެން ކިޔައިދޭން ބޭނުންވާ ވާހަކައެއް އެބައޮތެވެ. އެއީ އެމީހުންގެ ހިތްވަރުގަދަ ކަމުގެ ވާހަކައެވެ. އިޒްރޭލުގެ ހަނގުރާމަވެރިންނާއި، ހަތިޔާރާ ކުރިމަތިލުމުގައި ދައްކާ ގަދަ ހިތްވަރާއި، ހަނގުރާމައާއި ހިސާރުގެ ސަބަބުން މަޑުމަޑުން ހުލިވަމުންދާ ތަނެއްގައި ދިރިއުޅޭން އެ ކުރަމުން ގެންދާ މަސައްކަތުގެ ވާހަކައެވެ. ހަގީގީ ބަތަކުންނަކީ އެ ކުޑަ ކުދިންނެވެ. އަންހެނުންނާއި، ފިރިހެނުންނެވެ. ޑޮކްޓަރުންނާއި، ސިއްހީ އެހީތެރިންނާއި، ނަރުހުންނެވެ. ޣައްޒާގައި ޒަޚަމް ވެފައިވާ މީސްމީހުންނެވެ."
ގިލްބަރޓް މިހާރު ހުންނެވީ ނޯރވޭގެ ޔުނިވަރސިޓީ ހޮސްޕިޓަލް އޮފް ނޯތު ނޯރވޭގެ ފަޅާ ބައިގެ ވެރިއެއްގެ ވަޒީފާގައެވެ. އޭނާ ސުވާލު ކުރެއްވިއެވެ. "ބައިނަލްއަގުވާމީ ގާނޫނާއި، މުޢާހަދާތައް ކޮބައިހެއްޔެވެ؟ ޣައްޒާގެ 70 ހަސްފަތާލަށް ބޮން އަޅައި، އެތަންތަން މުޅީން ސުންނާފަތި ކޮށްލީތީ އިޒްރޭލު ޒިންމާދާރު ކުރުވުމުގައި ދުނިޔެއިން ހަރަކާތްތެރި ނުވަނީ ކީއްވެގެން ހެއްޔެވެ؟ އެއީ ޣައްޒާގައި ހުރި ހަސްފަތާލުތަކުގެ ދެބައިކުޅަ އެއްބައެވެ."
"2014 ވަނަ އަހަރު ޣައްޒާގައި އިޒްރޭލުން ކުރި ކަންތައްތަކަކީ، ފަލަސްތީނުން ކުރި ކަންތައްތަކެއް ކަމަށް ވީ ނަމަ ދުނިޔެއިން ކަންތައް ކުރާނީ ކިހިނެއް ހެއްޔެވެ؟" ގިލްބަރޓް މި ވާހަކަފުޅުން އިޝާރާތް ކުރެއްވީ 21 ޑަކްޓަރުންނާއި، 556 ކުޑަކުދިން މަރައި، 47 އެމްބިއުލަންސު ގޮއްވާލި ހާދިސާތަކަށެވެ.
ބައިނަލްއަގުވާމީ މުޖުތަމައުގެ ދެފުށްކެހެރި ސިޔާސަތު އޭނާ ވަރަށް ބޮޑަށް ކުށްވެރި ކުރެއްވިއެވެ. "އިޒްރޭލުން ވަނީ 2200 މީހުން ގަތުލުކޮށްފައެވެ. އޭގެ ތެރޭގައި 556 ކުޑަކުދިންނާއި 200 އަންހެނުން ހިމެނެއެވެ. އެކަމަކު މިހާރުވެސް އެމެރިކާާއި ބައިނަލްއަގުވާމީ މުޖުތަމައުން އިޒްރޭލަށް ތާއީދު ކުރެއެވެ."
ގިލްބަރޓް ވިދާޅުވިއެވެ. "އިޒްރޭލުން ބައިނަލްއަގުވާމީ ޤާނޫނުތަކާ ވަރަށް ބޮޑަށް ޚިލާފު ވެއެވެ. ފަލަސްތީނުގެ ބިން ފޭރިގަތުމުގެ ހުއްދަ ބޮޑެތި ބާރުތަކުން އިޒްރޭލަށް ދިނީ ހެއްޔެވެ؟ އެ ގައުމުތަކުން، އިޒްރޭލުން އެ މީހުންގެ ބިންތައް ހިފާ ހިފުމާ ދެކޮޅު ހެދުމާއި، އެ މީހުންގެ ގައުމު ދިފާއު ކުރުމުގެ އިޚްތިޔާރު ފަލަސްތީނުގެ ރައްޔިތުންގެ ކިބައިން ނިގުޅައިގަންނަނީ ކީއްވެގެން ހެއްޔެވެ؟ ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގާ ޢުދުވާނަށް ވޮޝިންގޓަނުން (އެމެރިކާއިން) ތާއީދު ކުރެއެވެ. ޣައްޒާއާއި ހުޅަނގު އައްސޭރީގައި އިޒްރޭލުން ހިންގާ ޖަރީމާތައް ފަސްއަޅާއި ފޮރުވައިދެއެވެ. ފަލަސްތީނު ދޫކޮށް (މަޖުބޫރު ވެގެން) އެހެން ގައުމުތަކަށް ގޮސް މުހާޖިރުންގެ ގޮތުގައި އުޅެމުންދާ ރައްޔިތުން އެ މީހުންގެ ގައުމަށް އެނބުރި އަންނާން ކުރާ މަސައްކަތަށް ބަލަނީ ކަނު ލޮލަކުންނެވެ."
އަރަބީން އެކުވެގެން އެންމެން އެއް އަޑަކުން ފަލަސްތީނަށް ތާއީދު ކުރާން ގިލްބަރޓް ގޮވައިލެއްވިއެވެ. "އަރަބީން އެ ތިބީ އެމެރިކާގެ ދެފުށްކެހެރި ސިޔާސަތުތައް ވަރަށް ރީތިކޮށް ބަލާާށެވެ. ޔޫކްރައިން އާއި ރަޝިއާ އާ ދެމެދު އުފެދިފައިވާ ދެކޮޅުވެރިކަމުގައި އެމެރިކާއިން ތާއީދު ކުރަނީ ޔޫކްރެއިނަށެވެ. އެއީ ސިޔާސީ ބޭނުމަކަށްޓަކައި ކުރާ ތާއީދެކެވެ. ސަބަބަކީ ޔޫކްރެއިނުން ދެކޮޅުވެރިވަނީ ރަޝިއާ އާ ކަމަށް ވުމެވެ. އެކަމަކު ޢުދދުވާން ހިންގަނީ އިޒްރޭލުން ކަމަށް ވާއިރުވެސް އެމެރިކާއިން ތާއީދު ކުރަނީ އިޒްރޭލަށެވެ. އިންސާނީ ހައްގުތަކާއި، ގާނޫނުތަކަށް އިސްކަން ދިނުމުގެ ބަދަލުގައި އެމެރިކާއިން އިސްކަން ދެނީ އެމީހުންގެ އިގްތިސާދީ، ސިޔާސީ، ފައުޖީ، ހަތިޔާރީ މަސްލަހަތަށެވެ. ހުރިހައި ކަމަކަށްވުރެ އިސްކަން ދެނީ މި ކަންކަމަށެވެ.
އޭނާގެ ފާޑު ވިދާޅުވުން ކުރިއަށް ގެންދަވަމުން ވިދާޅުވި ގޮތުގައި ޔޫރަޕާއި، ކުރީގެ އިސްތިއުމާރީ ބާރުތަކުން އިޒްރޭލުގެ އަނިޔާވެރި އަމަލުތަކެއް ނުބަލައެވެ. އިޒްރޭލުގެ ޢުދުވާނު ހުއްޓުވަން އެއްވެސް މަސައްކަތެއް ޔޫރަޕުން ކޮށްފައިވާ ކަމަށް ގަބޫލު ކުރާ މީހުންނަށް އެ ތިބެވެނީ ހީލަތްތެރި ރޭވުމެއްގައި ޖެހެވިފައި ކަމަށްވެސް ގިލްބަރޓް ވިދާޅުވިއެވެ.
ޣައްޒާާގައި ދިރިއުޅޭ ދެ މިލިއަނެއްހައި މީހުންނަށާއި، ސޫރިޔާއާއި، ލީބިޔާއާއި، ޢިރާޤްގެ ރައްޔިތުންނަށް ދިރިތިބުމުގެ ހައްގު ލިބިދެވޭނޭ ކަމަށް އޭނާ އުއްމީދު ކުރައްވައެވެ. " އެ ނިކަމެތީންގެ ޙައްގުތައް ހޯދައި ދިނުމަށް ކުރާ ކޮންމެ ކަމަކަށް އެހީތެރިވުން ހެޔޮ ހޮތެއްގެ ވެރި ކޮންމެ މީހަކަށްމެ ލާޒިމެވެ. މި ދުނިޔޭގައި އިންސާނިއްޔަތުން ބުރިވެގެން ނުގޮސް ބާކީ އޮތް ތަންކޮޅު ސަލާމަތް ކުރެވޭތޯ ބެލުމަކީ އަހަރެމެން ކޮންމެ މީހެއްގެ ޒިންމާއެކެވެ."
"އަހަރެމެންގެ އުސޫލުތަކާއި ހަމަތައް ހަނދާން ނައްތާލައި، އިންސާފުވެރިކަމުގެ މަގުން އެއްކިބާ ވެގެންފިނަމަ، ތާރީޚު އަހަރެމެންގެ މަތީން ހަނދާން ނައްތައިލާނެއެވެ. އަމިއްލަ މަަސްލަހަތަށްޓަކައި ޒިންމާދާރު ގައުމުތަކުން އެ ގައުމުތަކުގެ މަސްއޫލިއްޔަތާއި ޒިންމާ ހަނދާން ނައްތައިލުމަކީ ލަދު ގަންނާން ޖެހޭ ފަދަ ލާއިންސާނީ ކަމެކެވެ."
ވާހަކަފުޅު ނިންމަވައި ލައްވަމުން ގިލްބަރޓް ވިދާޅުވިއެވެ. "ދުނިޔެއިން ޓްވިޓަރާއި ފޭސްބުކް ގައި ދިރިއުޅުން ދޫކޮށްލައި އިންސާފާއި، އަރަބި އިންގިލާބުގެ ތެރޭގައި ތޫނިސް އިން ކަންތައް ކުރި ފަދައިން، މިނިވަންކަމާއި، އިންސާނިއްޔަތަށް ޚިދުމަތް ކުރާން ފަށައިފިނަމަ، ދުނިޔޭގެ ހާލަތު ރަނގަޅުވެ، ބަދަލު ވެގެން ހިނގައިދާނެއެވެ." (ތަރުޖަމާއެއް)
