މަސްތުވާތަކެތީގެ ތަފާތު އެކި މައްސަލަތަކުގައި ފުލުހުން ބެލުމުގެ ދަށަށް ގެނެސްފައިވާ މަސްތުވާތަކެތީގެ ތެރެއިން ޝަރުޢީ މަރުހަލާ ނިމިފައިވާ މައްސަލަތަކުގެ ހިމެނޭ ގިނަ ޢަދަދެއްގެ މަސްތުވާތަކެތި ނައްތާލައިފިއެވެ.
މިތަކެތި ނައްތާލާފައިވަނީ މައްސަލަތަކުގައި ފުލުހުންގެ ބެލުމުގެ ދަށަށް ގެނެވޭ ތަކެތި ނައްތާލުމުގެ ޤަވައިދުގެ ދަށުން އެކުލަވާލާފައިވާ ކޮމިޓީގެ ހާޒިރުގައި ދޫނިދޫގައި މިދިޔަ ހޮނިހިރު ދުވަހުއެވެ.
ހޮނިހިރު ދުވަހު ނައްތާލާފައިވަނީ 2004 ވަނަ އަހަރާއި 2007 ވަނަ އަހަރާއި ދެމެދު ފުލުހުންނަށް ހުށަހެޅި ތަހުޤީޤްކޮށް ޝަރުޢީ މަރުހަލާ ނިމިފައިވާ 955 މައްސަލައެއްގައި ހިމެނޭ މަސްތުވާތަކެއްޗެވެ.
އެގޮތުން މި މައްސަލަތަކުގައި ހިމެނޭ ހެރޮއިން ހުރި 4600 ރަބަރު ޕެކެޓާއި ހަޝިޝް އޮއިލް ހުރި 166 ސެލޯފިންކޮޅާއި ހަޝިޝް އޮއިލްހުރި 329 ބުލެޓް ނައްތާލާފައިވާއިރު މަސްތުވާތަކެތި ބޭނުންކުރުމަށް ގެންގުޅުނު އެހެނިހެން ތަކެތިވެސް ވަނީ ނައްތާލާފައެވެ..
ނައްތާލާފައިވާ މަސްތުވާތަކެތީގެ ތެރޭގައި ހިމެނެނީ ޖުމްލަ 3869 ގްރާމް ހެރޮއިން އާއި 291.5 ގްރާމް ކެނަބިސްއެވެ.
