ރައީސް ޑޮނަލްޑް ޓްރަމްޕް މުހާޖިރުންނާ ގުޅޭ ގޮތުން ނެރުއްވި އަމުރާއިގެން ސަރުކާރުން ކުރިއަށް ދެވޭ ގޮތަށް ހުއްދައެއް ހޯދުމަށްޓަކައި އިސްތިއުނާފީ ކޯޓަށް އެމެރިކާގެ ސަރުކާރުން ހުށަހެޅި މައްސަލަ، ސަރުކާރަށް ނާކާމިޔާބު ވެއްޖެއެވެ. ސެން ފްރެންސިސްކޯގެ އިސްތިއުނާފު ކޯޓަކުން ބުނެފައި ވަނީ އެ އަމުރާއިގެން ކުރިއަށް ދިއުމުގެ ހުއްދަ މި ވަގުތު ދެވޭން ނެތް ކަމުގައެވެ.
ސަރުކާރުން ވަނީ އިސްލާމީ ހަތް ގައުމެއްގެ މީހުން އެމެރިކާއަށް ހިޖުރަ ކުރުން މަނާ ކޮށްފައެވެ. މިދިޔަ ހުކުރު ދުވަހު އެމެރިކާގެ ފެޑެރަލް ކޯޓަކުން ވަނީ އެ އަމުރަށް އަމަލު ނުކުރާން ސަރުކާރުގެ މައްޗަށް އަމުރު ކޮށްފައެވެ. ސަރުކާރުން އެ އަމުރު އިސްތިއުނާފު ކުރީ ހޮނިހިރު ދުވަހުއެވެ. ސަރުކާރުގެ އަމުރާ ގުޅިގެން މައްސަލަ ކުރިމަތިވީ އެ ވަގުތު އެމެރިކާއިން ބޭރުގައި އުޅުނު ބައެއް މީހުން އެނބުރި އައުމުން، އެމެރިކާއަށް ވަނުން މަނާ ކުރީމައެވެ. ސަރުކާރުގެ އަމުރާ ގުޅިގެން ފަސްދޮޅަސް ހާސް މީހުންގެ ވިސާ ބާތިލު ކުރި ކަމަށް އެމެރިކާގެ ޚާރިޖީ ވުޒާރާއިން ބުންޏެވެ. އެހެންނަމަވެސް ސަރުކާރުގެ ވަކީލު ވިދާޅުވާ ގޮތުގައި ވިސާ ބާތިލު ކުރި މީހުންގެ އަދަދު އެއްލައްކަޔާ ކައިރި ކުރެއެވެ.
ހަތް ގައުމަކުން ހިޖުރަ ކުރާ މީހުން އެމެރިކާއަށް ވަނުން މަނާ ކުރީ މީގެ ހަފްތާއެއްހައި ދުވަސް ކުރީންނެވެ. މަނާ ކުރުމާ ގުޅިގެން އެމެރިކާގެ ބައިނަލްއަގުވާމީ ވައިގެބަނދަރުތައް ފުރި، ހަމަނުޖެހުން ހިނގަން ވަނީ ފަށައިފައެވެ. މީގެ އިތުރަށް ރައީސް ޓްރަމްޕަށް ސިޔާސީ ހަމަލާތައްވެސް ދިނުން ވަނީ ވަރަށް ބޮޑަށް ގިނަ ވެފައެވެ.
