މިއަހަރުގެ އަދަބީ ޢީދުގެ ޙަރަކާތްތަކުގެ ތެރޭގައި މާލޭގެ ސްކޫލުތަކުގެ ޕީޓީއޭތަކަށް ޖާފަތް މުބާރާތެއް ބޭއްވުމަށް ވަނީ ހަމަޖައްސަވައިފައެވެ. މިޖާފަތްމުބާރާތް ވެސް އޮންނާނީ މާދަމާ ތާޖުއްދީން ސްކޫލުގައި ކުރިއަށް ގެންދާ ދިވެހި އަދަބީ ޢީދުގެ މެންދުރުގެ ކެއުމެއްގެ ގޮތުގައި އެސްކޫލުގައެވެ.
ދިވެހި ބަހުގެ އެކަޑަމީގެ ރައީސް ވިދާޅުވީ މިފަދަ މުބާރާތެއް ބާއްވަނީ އަދަބީ ޢީދުގެ ފޯރިގަދަކޮށް ކުދިންނަށް ހިތްހަމަޖެހުން ގެނައުމާއެމުގެ ގޮތުން ކަމަށެވެ. ދިވެހިން ކައިބޮއެއުޅުނު ތަކެތީގެ ނަންތަކާ ރަޙަތަށް ކުދިންނަށް އަންގައިދިނުމަކީ ވެސް ޖާފަތް މުބާރާތުގެ ބޭނުމެއްކަމަށް އަޝްރަފް ފާހަގަ ކުރެއްވިއެވެ.
އަޝްރަފް ވިދާޅުވީ 2016 ވަނަ އަހަރު ބޭއްވި އަދަބީޢީދުގެ ޖާފަތަށްވުރެ މިއަހަރުގެ ޢަދަބީޢީދުގެ ޖާފަތުގައި ބައިވެރިވި ޕީޓީއޭތައް ގިނަކަމަށެވެ. ބެލެނިވެރިން ބައިވެރިކުރާ ޖާފަތްތަކުގެ އިތުރުން ދިވެހި ބަހުގެ އެކަޑަމީންވެސް 50 މީހުންގެ ދެ ޖާފަތް ބައިވެރި ކުރުމަށް ވަނީ ހަމަޖައްސަވައިފައެވެ. ޖާފަތް މުބާރާތުގައި އެއްވަނަ އަށް ދާ ޖާފަތަށް އިނާމެއްގެ ގޮތުގައި ފަސް ހާސް ރުފިޔާ ވަނީ ކަނޑަ އަޅައިފައެވެ.
