ޗައިނާގެ ވުހާން ސިޓީން ނެރެގެން އިންޑިއާއަށް ގެންގޮސް، ކޮރޯނާ ވައިރަހުގެ ކަރަންޓީނުގެ މުއްދަތު ފުރިހަމަ ކުރި ހަތް ދިވެހީން ރާއްޖެ ގެނެސްފި އެވެ.
އެމީހުން ރާއްޖެ ގެނައީ މިއަދުގެ ވަގުތެއްގައެވެ.
މިއީ ވުހާން ސިޓީގައި ތިބި ނުވަ ދިވެހިންގެ ތެރެއިން އެތަނުން ނިކުންނަށް އެދިގެން ސަރުކާރުން އެތައް މަސައްކަތްތަކެއް ކޮށްގެން އެތަނުން ނެރުނު ހަތް މީހުންނެވެ.
ކޮރޯނާ ފުރަތަމަ ފެތުރެންފެށި ޗައިނާގެ ވުހާން ސިޓީ ވަނީ ކަރަންޓީނު ކޮށްފައެވެ.
ހަތް ދިވެހިން އިންޑިއާއަށް ގެންގޮސް ކަރަންޓީނުގެ މުއްދަތު ފުރިހަމަކޮށްފައިވަނީ، ދިއްލީ ބޭރުގައި ހުންނަ އިންޑޯ-ޓިބެޓަން ބޯޑާ ޕޮލިސްގެ ޗައުޅާ ކޭމްޕުގަ އެވެ.
އޭގެ ތެރޭގައި ހިމެނެނީ ފަސް އަންހެނުންނާއި ފިރިހެނެއްގެ އިތުރުން ކުޑަކުއްޖެކެވެ.
އެމީހުން ކަރަންޓީނު ކުރީ އިންޑިއާ ސަރުކާރުން ވޫހާންގައި ތިބި އެ ގައުމުގެ 323 ރައްޔިތުން އެނބުރި ގައުމަށް ގެނައުމަށްޓަކައި ހަމަޖެއްސި އެއާ އިންޑިއާ ފްލައިޓުގައި އިންޑިއާއަށް ގެންދިއުމަށްފަހުގަ އެވެ.
