ޗައިނާއިން ރާއްޖެއަށް ކުރަމުން އައި ސީދާ ދަތުރުތައް ހުއްޓާލައިފި ކަމަށް ދިވެހި ޚާރިޖިއްޔާއިން އިއުލާން ކުރައްވައިފިއެވެ.
ޗައީނާއިން ފެނުނު ކޮރޯނާ ވައިރަސް އިތުރުވެ މުޅި ދުނިޔެއަށް ފެތުރެމުންދާތީ އެކަމާ ގުޅޭގޮތުން ނޫސްވެރިންނަށް މައުލޫމާތު ދެއްވުމަށް ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ޚާރިޖީ ވަޒީރު ޢަބްދުﷲ ޝާހިދު ވިދާޅުވީ ޑައިރެކްޓްރ ފުލައިޓުތައް ހުއްޓާލިޔަސް ޗައިނާގައި މަޑުކޮށްފައި އަންނަ ފުލައިޓުތަކަށް އަދިވެސް ރާއްޖެ އާދެވޭނެ ކަމަށެވެ.
މިނިސްޓަރ ވިދާޅުވި ޑައިރެކްޓް ފުލައިޓުތައް ހުއްޓާލީ ސަލާމަތީ ގޮތުން އަޅަން ނިންމައިފައިވާ ފިޔަވަޅުތަކުގެ ތެރެއިން ކަމަށެވެ.
މި ބައްދަލުވުމުގައި ވާހަކަފުޅު ދައްކަވަމުން ޓޫރިޒަމް މިނިސްޓާރ އަލީ ވަހީދު ވިދާޅުވީ ސަރުކާރުން އަންނަނީ ރާއްޖެއަށް އެތެރެވާ ހުރިހާ ފަތުރުވެރިންވެސް ސްކްރީން ކުރަމުން ކަމަށެވެ. ސްކްރީން ކުރަމުންދާއިރު ރޯގާ ނުވަތަ ހުސް އައިސްފައިވާ މީހަކާ ދިމާވެއްޖެނަމަ ރިޕީޓުކޮށް އެމީހަކު ސްކްރީން ކުރައްވާ ކަމަށް ވެސް ވިދާޅުވިއެވެ.
މިނިސްޓަރ ވިދާޅުވީ ފަތުރުވެރިންގެ ގޮތުގައި ޗައިނާއިން ރާއްޖެއަށް އައުމަށް 954 ބުކިން ހަދާފައިވާކަމަށެވެ. އެހެންނަމަވެސް ފުލައިޓުތައް ހުއްޓާލުމުން އެ ބުކިންތައް ކެންސަލްވާނެ ކަމަށް އޭނާ ވިދާޅުވިއެވެ. ފެށުނީއްސުރެން ރައީސް އިބްރާހީމް މުހައްމަދު ސާލިހު އެންމެ އިސްކަންދެއްވަނީ ދިވެހިރައްޔިތުންނާއި ފަތުރުވެރިންގެ ސަލާމަތަށް ކަމަށް ވެސް މިނިސްޓަރ ވިދާޅުވިއެވެ.
މި ބައްދަލުވުމުގައި ވާހަކަފުޅު ދައްކަވަމުން ހެލްތު މިނިސްޓަރ އަބްދުﷲ އަމީން ވިދާޅުވީ މިހާތަނަށް ކޮރޯނާވައިރަސްގެ އެއްވެސް ކޭސްއެއް ރާއްޖެއިން ފެނިފައިނުވާ ކަމަށެވެ. އަދި އެފަދަ ފަތުރުވެރިއަކު އައިސްފައިވެސް ނުވާކަމަށެވެ. މިބަލީގެ މީހަކު ކަރަންޓީނު ކޮށްފައިވާ ކަމަށް ދައްކާ ވާހަކަ ވެސް މިނިސްޓަރވަނީ ދޮގު ކުރައްވައިފައެވެ.
ޚާރިޖީ ވަޒީރު ޝާހިދު ވިދާޅުވީ ނޫސްވެރިންވެސް ޒިންމާދާރު ކަމާއެކު މިވަގުތު ޚަބަރު ފެތުރުން މުހިންމު ކަމަށެވެ. އަބަދުވެސް ދިވެހި ނޫސްވެރިންނަކީ ޒިންމާދާރުބައެއްގެ ގޮތުގައި ފާހަގަކުރެވޭ ކަމަށާއި މިފަދަ ހާލަތްތަކުގައި އެޒިންމާ ވަރުގަދަ ކުރެއްވުމަށް މިނިސްޓަރ އެދިވަޑައިގެންނެވިއެވެ.
