ސްޓޭންޑްއަޕް ޕެޑަލް ބޯޑެއްގައި ދަތުރުކުރި ފިރިހެން ފަތުރުވެރިއަކު ހޯދައި ހިންމަފުށްޓަށް ގެންގޮސްފި ކަމަށް ފުލުހުން ވިދާޅުވެއްޖެއެވެ.
ފުލުހުން ވިދާޅުވީ އޭނާ ދަތުރުކުރަމުންދިޔައީ ތުލުސްދޫއިން ފުރައިގެން ހިންމަފުށްޓަށް ކަމަށެވެ. އޭނާ ހިންމަފުށްޓަށްދާން ފުރީ މިއަދު ހަވީރު 5:45 އެހައިކަންހާއިރު ކަމަށް މައުލޫމާތު ލިބިފައިވާ ކަމަށް ފުލުހުން ވިދާޅުވިއެވެ.
ފުލުހުން އޭނާއަށް ރައްކާތެރިކަން ދީފައިވަނީ އަނދިރިވުމުގެ ކުރިން އޭނާއަށް ހިންމަފުށްޓަށް ނުދެވޭނެ ކަމަށާއި އެދަތުރުގައި އެމީހާއަށް ކަމެއްވެދާނެ ކަމުގެ ބިރުއޮތް ކަމުގެ މައުލޫމާތު ލިބިގެންނެވެ. "މިމައުލޫމާތު ލިބުމާއެކު ފުލުހުންވަނީ އޭނާއަށް ކަމެއް ދިމާވުމުގެ ކުރީން އޭނާ ހިންމަފުށީ ކައިރިން ކަނޑުމަތީން ހޯދާފައި. ފެނުނުއިރު މީހާގެ ހާލު ރަނގަޅު،" ފުލުހުން ވިދާޅުވިއެވެ.
މިކަމާ ގުޅިގެން ފުލުހުން ބަލަންޖެހޭ ކަންކަން ބަލަމުންދާ ކަމަށް ފުލުހުން ވިދާޅުވިއެވެ.
ފުލުހުން ވިދާޅުވީ ގެސްޓުހައުސްތަކާއި، ވޯޓަރސްޕޯޓްސް ސެންޓަރުތަކާ ގުޅިގެން ފަތުރުވެރިންގެ ރައްކާތެރި ކަމަށް އަޅަންޖެހޭ ފިޔަވަޅުތައް އަޅުއްވަމުން ގެންދަވާ ކަމަށެވެ.
