ރާއްޖޭގެ ކަނޑުގެ ސަރަޙައްދުން ހާލުގައި ޖެހިފައިވާ ލަންކާގެ މަސްބޯޓެއް އޮޔާދާކަމުގެ މަޢުލޫމާތު ލިބުމާ ގުޅިގެން، އެމްއެންޑީއެފް މާލޭ އޭރިއާ ކޯސްޓްގާޑު ސްކޮޑްރަންއިން އެބޯޓަށް އެހީތެރިކަން ފޯރު ކޮށްދީފިއެވެ.
އެ ބޯޓަށް އެހީތެރިކަން ފޯރުކޮށްދީފައިވަނީ އެމްއެންޑީއެފްގެ ކޯސްގާޑުގެ ނޫރައްދީން ލޯޗުންނެވެ.
އެމްއެންޑީއެފުން ވިދާޅުވީ އޮޔާދިޔަ އެބޯޓުގެ އިންޖީން ވަނީ ހުއްޓިފައި ކަމަށެވެ. އޭގައި ހަ މީހުން ތިބި ކަމަށާއި އެންމެންގެ ހާލުވެސް ރަނގަޅު ކަމަށް އެމްއެންޑީއެފުން ވިދާޅުވިއެވެ.
އެ ބޯޓު ހާލުގައި ޖެހިފައިވާ ކަމުގެ މައުލޫމާތު އެމްއެންޑީއެފަށް ލިބިފައިވަނީ މިމަހުގެ 23 ވަނަ ދުވަހުގެ ހަވީރު 5:00 އެހައިކަންހާއިރު ކަމަށެވެ. ފުރަތަމަ ރިޕޯޓް ލިބުނުއިރު، އެ ބޯޓު އޮތީ މާލޭގެ އިރުން 199 ނޯޓިކަލް މޭލު ބޭރުގައެވެ. ހާދިސާގެ ރިޕޯޓް ލިބުމާ ގުޅިގެން، އެމްއެންޑީއެފް ކޯސްޓްގާޑުން ދިޔައީ އެ ބޯޓު މޮނިޓަރ ކުރަމުންނެވެ. އެބޯޓަށް އެހީތެރިވާން ނޫރައްދީން ލޯންޗު ފުރިއިރު ބޯޓު އޮތީ، ކ.ދިއްފުށީގެ އިރުއުތުރުން ގާތްގަނޑަކަށް 58 ނޯޓިކަލް މޭލު ބޭރުގައެވެ.
