މާލެއާއި ވިލިމާލެ ފަޅުގައި އަޅާފައިވާ އުޅަނދުފަހަރުގެ ތެރެއިން ދަތުރުނުކޮށް ގިނަދުވެސް ވެފައިވާ އުޅަނދުފަހަރު ނެގުމުގެ މަސައްކަތް ފަށައިފިއެވެ.
މިމަސައްކަތް ކުރިއަށް ގެންދަނީ މާލެ ސިޓީ ކައުންސިލާއި ފުލުހުންނާއި، ދައުލަތުގެ ކަމާބެހޭ އެހެން މުއައްސަސާތައް ގުޅިގެންނެވެ.
މިމަސައްކަތް ފަށައިފައިވަނީ މާލޭ ސިޓީކައުންސިލާއި ސަރުކާރުގެ ކަމާބެހޭ އިދާރާތައް ގުޅިގެން ކުރެއްވި މަޝްވަރާތަކަށްފަހު ކަމަށް ފުލުހުން ވިދާޅުވިއެވެ.
ފަޅުގައި އަޅައިފައިވާ އުޅަނދުފަހަރުގެ ތެރެއިން ދަތުރުނުކޮށް ގިނަ ދުވަސްވެފައިވާ އުޅަނދު ނެގުމުގެ މަސައްކަތް ފަށައިފައިވަނީ މިއަދު ހެނދުނު މަސް މާރުކޭޓު ސަރައްހައްދު ފަޅުތެރެއިންނެވެ.
"މިމަސައްކަތުގެ ދަށުން އެސަރަހައްދުގައި އަޅާފައިވާ އުޅަނދުތައް ބަލައި ފާސްކޮށް ގަވާއިދާ ޚިލާފަށްހުރި އުޅަނދުތަކާއި އެ ސަރަހައްދުގައި ގިނަދުވަސްތަކެއް ވަންދެން ނުދުއްވާ ކަމަށް ފާހަގަކުރެވިފައިވާ އުޅަނދުތައް ނެގުމުގެ މަސައްކަތް ކުރަމުންދާނެ،" ފުލުހުން ވިދާޅުވިއެވެ.
މިފަދަ އުޅަނދު ފަހަރުގެ ސަބަބުން ފުރާދުއްވާ އުޅަނދު ފަހަރަށް ބޮޑެތި ދަތިކަން ކުރިމަތިވަމުންދާ ކަމުގެ ޝަކުވާ ވެސް ކަމާބެހޭ ފަރާތްތަކަށް ދަނީ ލިބެމުންނެވެ.
