ރާއްޖޭގެ ހުއިފިލަނޑާގެ ވިޔަފާރިއަށް ވީހާވެސް ގެއްލުން ކުޑަވާނޭ ގޮތެއްގެ މަތީން ކުރިއަށް ދިއުމާ ގުޅޭގޮތުން ބާއްވާ މަސައްކަތު ބައްދަލުވުމެއް މިއަދު ފަށައިފިއެވެ. މިއީ މިދިޔަ އަހަރުގެ އޮގަސްޓް މަހުގައި "ކޮންވެންޝަން އޮން އިންޓަރނޭޝަނަލް ޓްރޭޑް އިން އެންޑޭންޖަރޑް ސްޕީޝީޒް އޮފް ވައިލްޑް ފޯނާ އެންޑް ފްލޯރާ" (ސައިޓީސް) ގެ 18 ވަނަ ކޮންފަރަންސް އޮފް ޕާރޓީސް (ކޮޕް18) ގައި ރާއްޖެއިން އާންމުގޮތެއްގައި އެކްސްޕޯޓް ކުރާ 2 ބާވަތެއްގެ ހުއިފިލަނޑާ ހިމެނޭގޮތަށް، ހުއިފިލަނޑާގެ 3 ބާވަތެއް ސައިޓީސް ކޮންވެންޝަންގެ އެޕެންޑިކްސް 2 ގައި ލިސްޓުކުރުމަށް ނިންމުމާ ގުޅިގެން ބާއްވާ ބައްދަލުވުމެކެވެ.
ސައިޓީސްގެ އެޕެންޑިކްސް 2 ގައި އަލަށް ހިމެނިފައިވާ 3 ބާވަތުގެ ތެރޭގައި ރާއްޖެއިން އާންމުގޮތެއްގައި ބޭރުކުރާ ދެބާވަތްކަމަށްވާ ފަޅުބަޓާއި ކަނޑު ބަޓު ހިމެނެއެވެ. ފިޝަރީޒް މިނިސްޓްރީން ވިދާޅުވެފައިވަނީ މި ނިންމުމް ތަންފީޒު ކުރުމަށް އެއްއަހަރު ދުވަހުގެ މުއްދަތެއް ދީފައިވާކަމަށެވެ. މިމުއްދަތުގެ ފަހުން މި ދެ ބާވަތުގެ ހުއިފިލަނޑާ ބޭރުކުރެވޭނީ ވަކި ޚާއްސަ ހުއްދައެއްގެ ދަށުން ކަމަށްވެސް މިނިސްޓްރީން ވިދާޅުވެފައިވެއެވެ. މިހުއްދަ ދިނުމަށްޓަކައި ސައިޓީސް ސައިންޓިފިކް އޮތޯރިޓީއަކުން ހުއިފިލަނޑާގެ ވިޔަފާރިއަކީ، އެވިޔަފާރީގެ ސަބަބުން ހުއިފިލަނޑާގެ އާބާދީ ދެމިއޮތުމަށް ނޭދެވޭ އަސަރެއް ނުފޯރާ މިންވަރެއްގައި ކުރެވޭ ވިޔަފާރިއެއްކަން ކަށަވަރުކުރަންޖެހޭ ކަމަށް ވެސް ވިދާޅުވެފައިވެއެވެ.
މިއަދު ބާއްވާ މަސައްކަތު ބައްދަލުވުމަކީ ސައިޓީސްގެ މިނިންމުމާ ގުޅިގެން ހުއިފިލަނޑާގެ ބައިނަލްއަޤްވާމީ ވިޔަފާރިއަށް ހުއްޓުމެއް ނުގެނެސް ކުރިއަށްގެންދިއުމަށް، ރާއްޖޭގެ ސައިޓީސް ސައިންޓިފިކް އޮތޯރިޓީގެ ހައިސިއްޔަތުން މޯލްޑިވްސް މެރިން ރިސާރޗް އިންސްޓިޓިއުޓްއިން ކުރަމުންދާ މަސައްކަތްތަކުގެ ތެރޭގައި ހިމެނޭ މުހިންމު ބައެއް ކަމަށާއި މިބައްދަލުވުމުގައި ހުއިފިލަނޑާ ބޭރުކުރުމުގައި ހަރަކާތްތެރިވާ ފަރާތްތަކަށް މަޢުލޫމާތު ފޯރުކޮށްދިނުމުގެ އިތުރުން، އެ މަސްވެރިކަމުގައި ކުރިއަށް ދާނޭ މަގަކާއިމެދު މިވިޔަފާރީގައި ހަރަކާތްތެރިވާ ފަރާތްތަކުގެ ޚިޔާލު ހޯދާ މަޝްވަރާ ކުރެވޭނެއެވެ.
މިބައްދަލުވުމުގައި މޯލްޑިވްސް މެރިން ރިސާރޗް އިންސްޓިޓިއުޓްގެ އިތުރުން މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރގެ ފިޝަރީޒް މެނޭޖްމަންޓް ޔުނިޓް އަދި މިނިސްޓްރީ އޮޕް އެންވަޔަރަންމަންޓްގެ ފަރާތުން މަޢުލޫމާތު ފޯރުކޮށްދިނުމުގެ ސެޝަންތައް ކުރިއަށް ގެންދާނެއެވެ.
ޚަބަރާއި ފޮޓޯ ފިޝަރީޒް މިނިސްޓްރީ-
