މިޢަދު ހުޅުވި ޢިއްޒުއްދީން ސްކޫލަކީ ރާއްޖޭގެ އިއްޒަތާއި ޤަދަރު އެތައް ދަރަޖައަކަށް އުފުލިގެންދާނެ ސްކޫލަކަށް ވާނެކަމަށް އުއްމީދު ކުރައްވާކަމަށް ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލީޙް ވިދާޅުވެއްޖެއެވެ. މިއަދު ހެދުނު ޢިއްޒުއްދީން ސްކޫލުގައި އޮތް ޙާއްޞަ ރަސްމިއްޔާތެއްގައި އެސްކޫލު ރަސްމީކޮށް ހުޅުވައިދެއްވީ ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙެވެ.
ރައީސުލްޖުމްހޫރިއްޔާގެ ވާހަކަފުޅުގައި އިއްޒުއްދީން ސްކޫލު ނިސްބަތްވާ އައްސުލްޠާން އަލްޣާޒީ ޙަސަން ޢިއްޒުއްދީން ސިރީ ކްލަރަންމީބަ ކައްތިރި ބަވަނަ މަހާރަދުން، މަޝްހޫރު ނަމުންނަމަ ދޮންބަންޑާރައިންގެ ޞަޙްޞިއްޔަތުގެ މައްޗަށް އަލި އަޅުވާލެއްވިއެވެ.
ދޮންބަންޑާރައިންނަކީ ވަތަނީ ލޯތްބާއި ޤައުމީ ރޫޙުގައި ވަރަށް އިޚްލާސްތެރިކަމާއި ތެދުވެރިކަމާއެކު އަގުހުރި ޚިދުމަތްތަކެއް ކުރެއްވި ރަސްކަލެއްކަމަށް ރައީސުލްޖުމްހޫރިއްޔާ ފާހަގަ ކުރެއްވިއެވެ.
"ތާރީޚް ޢިލްމުވެރިން، އެ ރަދުން ސިފަކޮށްދެއްވާފައިވަނީ، ހިތްވަރުފުޅު ގަދަ، ވިސްނުންތެރި ފަހުލަވާނެއްގެ ގޮތުގައި. ވަފާތެރި އިޚްލާޞްތެރި އިންސާނެއްގެ ގޮތުގައި. އާދެ! މިއަދު އަޅުގަނޑުމެންގެ ތެރެއިން ނެތިގެން މިއުޅެނީ، މި މުހިންމު ސިފަތައް. މިއީ ހަމަޖެހުމާއި އެކުވެރިކަމާއި ޞުލްޙަމަސަލަސްކަން މުޖްތަމަޢުގައި ދެމިއޮތުމަށްޓަކައި، ކޮންމެ ފަރުދެއްގެ ކިބައިގައި ހުންނަންޖެހޭނެ ސިފަތައް. މި ސިފަތައް އަށަގެންނެވުމަށް ކޮންމެ ދަރިވަރަކު ގަދައަޅައި މަސައްކަތް ކުރުމަކީ ވަރަށް މުހިންމު ކަމެއް." ރައީސުލް ޖުމްހޫރިއްޔާ ވިދާޅުވިއެވެ.
ދޮންބަންދާރައިންނާއެކު ދިވެހިންގެ ރަސްކަމުގެ ތާރީޚުގައި ފެށިގެން އައީ ހުރާ ދަރިކޮޅުގެ ރަސްކަން ފާހަގަކުރައްވައި، އެ ދަރިކޮޅުން ރަސްކަންކުރި ދުވަސްވަރަކީ، ޢިލްމީ ގޮތުން ދިވެހިންގެ ހޭލުންތެރިކަން ވަރަށް ބޮޑަށް އިތުރުވެގެންދިޔަ ދުވަސްވަރެއްކަމަށް ވިދާޅުވިއެވެ. ދަރީންނަށް ތަޢުލީމް ދިނުމުގައި ޢިލްމުވެރިންގެ ދައުރު ވަރަށް ބޮޑަށް އެދުވަސްވަރު ފުޅާވެގެންދިޔަ ރައީސުލްޖުމްހޫރިއްޔާ ފާހަގަ ކުރެއްވިއެވެ. އަދި ރާއްޖޭގެ ލިޔުންތެރިކަމާއި ފޮތްތެރިކަމުގެ ބިންގާ އެޅިގެން ދިޔައީ، އެ ދުވަސްވަރު ކަމަށް ބައެއް މުއައްރިޚުން ވިދާޅުވާ ކަމަށް ފާހަގަ ކުރެއްވިއެވެ. އެހެންކަމުން، ހުރާ ދަރިކޮޅުގެ ރަސްކަމުގެ ފެށުން ކަމުގައިވާ ދޮން ބަންޑާރައިންގެ ނަމަށް، ސްކޫލެއް ނިސްބަތް ކުރުމަކީ ވަރަށް އެކަށޭނަ ކަމެއްކަމަށް ދެކެވަޑައިގަންނަވާކަމަށް ވިދާޅުވިއެވެ.
"އަޅުގަނޑު އުންމީދު ކުރަނީ، މި ސްކޫލަކީވެސް ހުރާ ޚާންދާނުގެ ރަސްކަލުން ފަދައިން، ތަޢުލީމީ އަދި ޢިލްމީ ރޮނގުންނާއި، ލިޔުންތެރިކަމުގެ ރޮނގުން، އަގުހުރި ދަރިވަރުންތަކެއް އުފައްދާނެ ސްކޫލަކަށް ވެގެންދިޔުން." ރައީސުލް ޖުމްހޫރިއްޔާ ވިދާޅުވިއެވެ.
ޢިއްޒުއްދީން ސްކޫލަކީ މާލެ ސަރަޙައްދުގައި އެއްދަންފަޅިއަށް ކިޔަވައިދޭ ސަރުކާރުގެ ފުރަތަމަ ސްކޫލެވެ. އެސްކޫލުގައި މިއަހަރު ކިޔަވައިދޭން ފަށައިފައި ވަނީ ގްރޭޑް 1 ން 6 ކަށެވެ.
