އީރާނުގެ ރިވޮލިއުޝަނަރީ ގާޑުން ފާޝިޔަން ގަލްފް (އެރޭބިއަން ގަލްފް) ގައި ދަތުރުކުރަމުން ދިޔަ ތެޔޮ ޓޭންކަރެއް ހިފަހައްޓައިފިކަމަށް އެގައުުމުގެ ރަސްމީ ޚަބަރުފަތުރާ ވަސީލަތްތަކުން ބުނެފިއެވެ.
އިސްލާމިކް ރިޕަބްލިކް އޮފް އީރާން ބްރޯޑްކާސްޓިންގް (އައިއާރްއައިބީ) ގެ ވެބްސައިޓުގައި ވާގޮތުން ރިވޮލިއުޝަނަރީ ގާޑުން ވަނި ޕާޝިޔަން ގަލްފުގައި ސްމަގްލްކުރަން އުޅުނު ތެޔޮ ހިފައިގެން ދަތުރުކުރި ޓޭންކަރެއް ހިފަހައްޓައި އޭގައި ތިބި މެލޭޝިޔާގެ 16 ފަޅުވެރިން ހައްޔަރުކޮށްފައެވެ. އެެހެންނަމަވެސް، އެއީ ކޮން ގައުމަކަށް ގެންދިޔަ ތެލެއްކަމާއި، އެއީ ކޮން ގައުމެއްގެ ދިދަ ނަަގައިގެން ދަތުރުކުރި އުޅަނދެއް ކަން އެ ވެބްސައިޓުގައި ހާމަކޮށްފައި ނުވެއެވެ.
"އުޅަނދުގެ 16 ފަޅުވެރިން ވަނީ ހަައްޔަރުކުރެވިފައި. އެ އެންމެންނަކީވެސް މެލޭޝިޔާގެ ރައްޔިތުން." ރިވޮލިއުޝަރަނީ ގާޑްސްގެ ސަަރަހައްދީ ނޭވަލް ކޮމާންޑަރު ބްރިގޭޑިޔާ ޖެނެރަލް ޢަލީ އޮޒްމާޔީ ވިދާޅިއެވެ.
އިރާނުގެ ރަސްމީ އިރްނާ ނިއުސް އެޖެންސީން ބުނި ގޮތުގައި އީރާނުގެ ޖަޒީރާއެެއް ކަމަށްވާ އަބޫ މޫސާ ކައިރިން އިއްޔެ އެ ޓޭންކަރު ހިފެހެއްޓިއިރު އޭގައި ސްމަގްލްކޮށްފައިވާ 1.3 މިލިއަން ލިޓަރު ތެޔޮ ހުއްޓެވެ. އަބޫ މޫސާއަކީ ގަލްފުގެ ދެކުނުގައި އީރާނުގެ ދަށުގައި އޮންނަ، އެހެންނަަމަވެސް، ޔުނައިޓެޑް އަރަބް އެމިރޭޓްސް (ޔޫއޭއީ) އިން އެގައުމުގެ ރަށެއް ކަމުގައި ބުނާ ރަށެކެވެ.
"މިއީ ތެޔޮ ސްމަގްލް ކުރަނިކޮށް ގާޑްސްގެ ކަނޑުގެ ބާރުތަކުން ހިފެހެއްޓި ހަވަނަ އުޅަނދު." އޮޒްމާޔީ ވިދާޅުވިއެވެ.
އާދީއްތަ ދުވަހުގެރޭ އެމެރިކާގެ އަސްކަރިއްޔާގެ ޑްރޯންތަކުން އިރާގުގައި ހަރަކާތްތެރިވާ ހަތިޔާރުއެޅި ޝީއާ ޖަމާއަތެއްގެ މަރުކަޒުތަކަށް ހަމަލާދީ 25 މީހުން މަރާލުމުން، ގަލްފު ސަރަހައްދުގެ މަސްރަހު އަނެއްކާވެސް ވަނީ ވަރަށް ބޮޑަށް ހޫނުވެފައެވެ.
