އޮސްޓްރޭލިޔާގެ އިރުމަތީ ސަރަހައްދުތަކުގައި ރޯވެ އަނދަމުންދާ އަލިފާން އަދިވެސް ދަނީ ފެތުރެމުންނެވެ. ދުނިޔޭގެ ދެކުނު ބިތުގެ ހޫނު މޫސުމުގެ އެންމެ ހޫނުގަދަ ދުވަސްވަަރާ ދިމާކޮށް އަލިފާންގަނޑުތައް ފެތުރެމުން ދާއިރު އޮސްޓްރޭލިޔާގެ ހުރިހާ ސްޓޭޓެއްގެ ހޫނުމިން ވަނީ 40 ޑިގްރީ ސެލްސިއަސްއަށް އަރާފައެވެ.
އޮސްޓްރޭލިޔާގެ ދެވަނައަށް އެންމެ ބޮޑުރަށް، އަދި ވިކްޓޯރިޔާ ސްޓޭޭޓުގެ ވެރިރަށް މެލްބަންގެ އުތުރުގެ އަވަށްތަކާ މާ ދުރުނޫން ހިސާބެއްގައި އަލިފާންގަނޑުތައް އަނދަނުން ދާއިރު، މެލްބަންގެ އުތުރުގެ ފަސް އަަވަށެއްގެ ލައްކައެއްހާ މީހުން ރައްކާތެރި ހިސާބުތަކަށް ދިއުމަށް ކަމާބެހޭ އިދާރާތަކުން ދަނީ އަންގަމުންނެވެ. މެލްބަން އުތުރުގައި އަނދަމުންދާ އަލިފާންގަނޑުުތަކުގެ ހުޅުގަނޑު 70 ވަރަކަށް ފޫޓަށް މައްޗަށް އަރަމުންދާއިރު، 12 ވަރަކަށް އަލިފާންގަނޑު އަދިވެސް ދަނީ ކޮންޓްރޯލުނުވެ އަނދަމުންނެވެ. އެހެންކަމުން، އެންމެ ބޮޑަށް ނުރައްކަލަށް ހުށަހެޅިފައިވާ އަަވަށްތަކުގެ މީހުންނަށް ވަނީ ވަގުތުން ރައްކާތެރި ސަރަހައްދުތަކަށް ދިއުމަށް އަންގާފައެވެ.
މެލްބަނަށް އޮތް ނުރައްކާ އެންމެ ބޮޑަށް ފާހަގަވެގެން ދަނީ، މެލްބަންގެ ސިޓީ ސެންޓަރާ އެންމެ 16 ކިލޯމީޓަރު ދުރުގައި އޮތް ބަންޑޫރާ އަވަށުގެ ބައެއް ގެތަކާ ހަމައަށް އަލިފާން ފޯރުމުންނެެވެ. ބަަންޑޫރާއަކީ ނިސްބަތުން ތަނަވަސް މީހުން ދިރިއުޅޭ، އަދި މެލްބަންގެ ދެ ޔުނިވަސިޓީއެއްވެސް ހުރި އަވަށެކެވެ.
އިރުމަތީ އޮސްޓްްރޭލިޔާގެ ސްޓޭޓުތައް ކަމަށްވާ ނިއު ސައުތު ވޭލްސްއާއި، ވިކްޓޯރިޔާގެ ތަފާތު ސަރަހައްދުތަކުގައި އަލިފާންގަނޑުތައް އަނދަމުން ދާއިރު މި ވަގުތު އެންމެ ބޮޑަށް ނުރައްކާ ވެފައިވަނީ ވިކްޓޯރިޔާ ސްޓޭޓުގެ ރަށްތަކަށެވެ. އަލިފާންގަނޑުތަކުގެ ސަބަބުން ޖައްވު ހޫނުވަމުން ދާއިރު، މިހޫނު ސަބަބުން 'ހޫނުރޯޅީ' ގައި ގަޑިއަކުން 100 ކިލޯމީޓަރަށް ވުރެ ބާރަށް ވައިޖެހޭނެކަމަށް ލަފާކުރެވޭއިރު، ވިކްޓޯރިޔާގެ އިރުމަތީ ރަށްތަކުގެ މީހުން މިހާރު ތިބީ ވައިގެ މިސްްރާބު ބަދަލުވެދާނެކަމަށް ތައްޔާރުވެގެންނެވެ.
އޮސްޓްރޭލިޔާގައި ނުރައްކާތެރި ދަރަޖައަކަށް ޖަންގަލިތަކުގައި ރޯވެ އަނދަމުން ދާއިރު، އާ އަހަރު ފާހަގަކުރަން ކޮންމެ އަހަރެއް ފެށޭ ދުވަހު ސިޑްނީގައި ބާއްވާ ބަޑިބޭހުގެ ކުޅިވަރާއި، ހަވާއެރުވުން 2020 ވަނަ އަހަރު ފެށޭރޭ ނުބާއްވައި، އެކަމަށް ބަޖެޓުކޮށްފައިވާ ފައިސާ އަލިފާން ނިވުމުގެ މަަސައްކަތަށް ހޭދަކުރަން އެދި މިހާރު ދަނީ ޕެޓިޝަނެއްގައި ސޮއިކުރަމުންނެވެ. 2 ލައްކަ 70 ހާސް މީހުން އެ ޕެޓިޝަނުގައި ސޮއިކޮށްފައި ވިޔަސް، ސަރުކާރުން ނިންމާފައި ވަނި އެ ޝޯ ކުރިއަށް ގެންދިއުމަށެވެ.
ސިޑްނީގައި ބާއްވާ އާ އަހަރުގެ ފެށުން ފާހަގަކުރާ ކުޅިވަރުތަކަށް މިފަހަރު 4.5 މިލިއަން އެމެރިކާ ޑޮލަރު ހޭދަކުރަން ހަމަޖެހިފައެވެ.
