އިރާގުގެ ޕެރަމިލިޓަރީ ލަޝްކަރެއް ކަމުގައިވާ ޕޮޕިއުލާ މޯބިލައިޒޭޝަން ފޯސަސް (އަލްޙަޝްދު އައްޝަޢުބީ) ގެ މަރުކަޒުތަކަކަށް އެމެރިކާއިން ދިން ޑްރޯން ހަމަލާއެއްގައި 25 މީހުން މަރުވެ 55 މީހުން ޒަޚަމްވެއްޖެއެެވެ. އެމެރިކާއިން ދިން ހަމަލާގެ އަމާޒަކީ އަލްޙަޝްދު އައްޝަޢުބީގައި ހިމެނޭ އިރާގުގެ ޙިޒްބުﷲ އެވެ. ނުވަތަ ކަތާއިބު ޙިޒްބުﷲ (ޙިޒްބުﷲ ބެޓާލިއަންސް) އެވެ. މި ހަމަލާތަކުގައި އިރާގުގެ އިތުރަށް ސީރިޔާ (ސޫރިޔާ) ގެ ބައެއް ތަންތަންވެސް އަމާޒަކަށް ހަދާފައި ވެއެވެ.
މި ހަމަލާ އައިސްފައި މިވަނީ ބަޣުދާދުގައި ދިން ރޮކެޓު ހަަމަލާއެއްގައި، އިރާގު ސަރުކާރުގެ ކޮންޓްރެކްޓެއްގައި މަސައްކަތްކުރަމުން ދިޔަ އެމެރިކާ މީހަކު މަރުވިތާ ދެ ދުވަސް ފަހުންނެވެ.
އިރާގުގެ އަސްކަރީ ބައެއް މަސްްދަރުތަކުން ޚަަބަރުދޭ ގޮތުގައި ހަމަލާގައި މަރުވި މީހުންގެ ތެރޭގައި ކަތާއިބުގެ އިސް 4 ކޮމާންޑަރުން ހިމެނެއެެވެ. އަދި އެމެރިކާގެ ޑްރޯންތަކުން އަމާޒުކުރި ތަންތަނުގެ ތެރޭގައި އަލްޤައިމްގައި ހުންނަ ކަތާއިބު ޙިޒްބުﷲގެ މައި މަރުކަޒުވެސް ހިމެނެއެވެ.
އެމެރިކާގެ ޑްރޯންތަކުން ދިން ހަމަލާއަށް ފަހު މާ ގިނަ އިރުތަކެއް ނުވަނީސް، ބަޣުދާދު ކައިރީގައި އޮންނަ އެމެެރިކާ ސިފައިން ތިބޭ އަސްކަރީ މަރުކަޒަކަށް ރޮކެޓުތަކަކުން ހަމަލާދީފައި ވެއެވެ. އެހެންނަމަވެސް، އެ ހަމަލާގެ ސަބަބުން އެއްވެސް މީހަކު މަރުވެފައި ނުވަތަ ޒަޚަމްވެފައި ނުވާކަމަށް ވެއެވެ.
"އޮފަރޭޝަން އިންހެރެންޓް ރިޒޯލްވް (އޯއައިއާރް) ގައި ހިމެނޭ އެމެރިކާ ސިފައިން ތިބޭ މަރުކަޒުތަކަށް ކަތާއިބު ޙިޒްބުﷲ (ކޭއެޗް) އިން ތަކުރާރުކޮށް ހަމަލާދޭތީ، އެކަމުގެ ރައްދެއްގެ ގޮތުގައި އެމެރިިކޭ ލަޝްކަރުތަކުން ވަނީ އިރާގައި ސީރިޔާގައި ހުރި ކޭއެޗް ގެ ފަސް މަރުކަޒަކަށް ސީދާ އަމާޒުކުރެވިގެން ދިފާއީ ހަމަލާތަކެއް ދީފައި. މިކަމުގެ ސަބަބުން ކޭއެޗްއިން އޯއައިއާރްގެ ސިފައިންނަށް ހަަމަލާދިނުމުގެ ގާބިލުކަން ކުޑަވެގެންދާނެ." އެމެރީގެ ދިފާއީ ވުޒާރާ، ޕެންޓަގަންގެ އިސް ތަރުޖަމާނު ޖޮނަތަން ހޮފްމަން ނެރުއްވި ބަޔާނެއްގައި ވެއެވެ.
ހަމަލާތައް އަމާޒުވި އިރާގުގެ ތިން މަރުކަޒާއި، ސީރިޔާގެ ދެ މަރުކަޒަކީ ހަތިޔާރު ރައްކާކުރާ ތަންތަނާއި، ހަމަލާތައް ރާވައި ހިންގުމަށް ބޭނުންކުރާ ކޮމާންޑު ސެންޓަރުތަކެވެ.
"އެމެރިކާގެ ފިރިހެނުންނާ އަންހެނުންގެ ފުރާނަ ނުރައްކަލަށް ހުށަހެޅޭ ފަދަ އަމަލުތައި އިސްލާމިކް ރިޕަބްލިކް އޮފް އީރާނުން ހިންގާއިރު އަހަރުމެން ބަަލަަހައްޓައިގެން ނުތިބޭނަން." ރައީސު ޑޮނާލްޑް ޓްރަމްޕްގެ ފްލޮރިޑާ ރިސޯޓް މާރ-އަ-ލާގޯގަައި ބޭއްވި ބައްދަލުވުމަކަށް ފަހު ވާހަަކަފުޅުދައްކަވަމުން އެމެރިކާގެ ޚާރިޖީ ވަޒީރު މައިކް ޕޮމްޕެއޯ ވިދާޅުވިއެވެ.
