ރާއްޖޭގެ 6 ރަށެއްގެ ބަނދަރު ހެދުމުގެ މަސައްކަތް ދެ ކުންފުންޏަކާ ޕްލޭނިން މިނިސްޓްރީން މިއަދު ޙަވާލުކޮށްފިއެވެ.
އެރަށްރަށަކީ ށ. ފޭދޫ، ށ. ފޯކައިދޫ، އދ. ހަންޏާ މީދޫ، އދ. ދިއްދޫ، ރ. ރަސްގެތީމު، ކ. ހިންމަފުށްޓެވެ.
މި ރަށްރަށުގެ ތެރެއިން ށ. ފޭދުއާއި، ފޯކައިދުއާއި، އދ. ހަންޏާމީދުއާއި ކ. ހިންމަފުށީގެ ބަނދަރު ހެދުމުގެ މަސައްކަތް ހަވާލުކުރައްވާފައިވަނީ އެމްޓީސީސީއާއެވެ. ރ. ރަސްގެތީމުގެ ޖެޓީއާއި، ބަނދަރާއި، އދ. ދިއްދޫގެ ބަނދަރު ހެދުމުގެ މަސައްކަތް ޙަވާލުކުރެއްވީ ހެވީ ފޯސް ޕްރައިވެޓް ލިމިޓެޑާއެވެ.
މީގެ ތެރެއިން ށ. ފޭދޫގެ ބަނދަރު ހެދުމަށް އެއްބަސްވެފައިވާ އަގަކީ 33,144,965.10 ރުފިޔާއެވެ. އެމަޝްރުޢުގެ މަސައްކަތް ނިންމުމަށް ދީފައިވާ މުއްދަތަކީ 480 ދުވަހެވެ.
ފޯކައިދޫ ބަނދަރު 500 ދުވަސްތެރޭގައި ނިންމުމަށް ޙަވާލު ކޮށްފައިވަނީ 55,974,940.88 ރުފިޔާއަށެވެ. ހަންޏާމީދޫގެ ބަނަދަރު 300 ދުވަސްތެރޭގައި ނިންމާ ގޮތަށް ހަވާލުކޮށްފައިވަނީ 32,280,570.61 ރުފިޔާއަށެވެ. އދ. ދިއްދޫގެ މަސައްކަތް ވެސް ނިންމަން ދީފައިވަނީ 300 ދުވަހެވެ. އެމަޝްރޫޢުގެ އަގަކީ 21,956,238.75 ރުފިޔާއެވެ.
ރަސްގެތީމުގެ ޖެޓީއާއި ބަނދަރު ހެދުމުގެ މަޝްރޫޢު 50,000,095.25 ރުފިޔާއަށް ޙަވާލުކޮށްފައިވަނީ 420 ދުވަސްތެރޭގައި ނިންމާ ގޮތަށެވެ. ހިންމަފުށީ ބަނދަރުގެ ދެވަނަ ފިޔަވަހި ކުރިއަށް ގެންދިއުމަށް ޙަވާ ހަވާލު ކޮށްފައިވަނީ 24,602,989.02 ރުފިޔާއަށެވެ. އެމަސައްކަތް ނިންމަން އެއްބަސްވެފައިވާ މުއްދަތަކީ 365 ދުވަހެވެ.
މި މަޝްރޫއުތަކުގެ އެއްބަސްވުންތަކުގައި މިނިސްޓްރީގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ފާތިމަތު ޝާނާ ފާރޫގެވެ. އެމްޓީސީސީގެ ފަރާތުން ސޮއިކުރެއްވީ ސީއޯއޯ ޝާހިދު ޙުސައިން މޫސާއެވެ. ހެވީ ފޯސްގެ ފަރާތުން ސޮއިކުރެއްވީ މެނޭޖިންޑިރެކްޓަރ އިބްރާހީމް ޒަމީރެވެ.
