ޗިލީގެ ވެލްޕަރައިޒޯ އަވަށުގައި ހަލުވިކަމާއެކު ފެތުރުމެންދާ އަލިފާންގަނޑުގައި މިހާތަނަށް 120 ގެ އަނދާ ހުލިވެއްޖެކަމަށް އެ ގައުމުގެ އޮފިޝަލުން ބުނެފިއެވެ. އަލިފާންގަނޑު ފެތުރެމުންދާ ސަރަހައްދުތަކުން މީހުން ހުސްކުރުމުގެ މަސައްކަތް މިހާރު ދަނީ ކުރަމުންނެވެ.
ބަނދަރުމަތީ އަވަށް ވެލްޕަރައިޒޯގެ ރަށްބޭރުގައި ފަގީރުން ދިރިއުޅޭ އަވަށްތަކަށް އަލިފާންގަނޑު ފެތުރިފައިވާއިރު، ގެތައް ދޫކޮށް ނުކުތް ބައެއް މީހުންނަށް އެއްވެސް މުދަލެއް އަދި އޮޅު ޖަނަވާރެއް ސަލާމަތްކުރެވިފައި ނުވެއެވެ.
އެ ރަށުގައި ތިބި އަލިފާން ނިވާ އެންމެން މިހާރު ވަނީ މަސައްކަތަށް ނެރެފައެވެ. ޗިލީގެ އިންޓީރިއާ މިނިސްޓަރު ގޮންޒާލޯ ބްލޫމެލް ވިދާޅުވި ގޮތުގައި އަލިފާން ނިއްވާލުމުގެ މަސައްކަތުގައި 15 ފޮރެސްޓު ބްރިގޭޑާއި، އަލިފާން ނިވާ 62 ލޮރީއާއި، 6 މަތިންދާބޯޓު ދަނީ ބޭނުންކުރަމުންނެވެ.
ނޫސްވެރިންނަށް މައުލޫމާތު ދެއްވަމުން އެގްރިކަލްޗާ މިނިސްޓަރު އެންޓޯނިއޯ ވޯކާ ވިދާޅުވީ "އެއީ ފަސޭހަ މަސައްކަތެއް ނޫން" ކަމަށާ "ވައި ގަދަވުމުގެ ސަބަބުން އިތުރު ދަތިތައް ކުރިމަތިވެފައިވާ" ކަމަށެވެ.
ވެލްފަރަޒޯގެ މޭޔަރު ތުހުމަތުކުރެއްވި ގޮތުގައި އަލިފާން ރޯކޮށްލީ "ގަސްތުގައެވެ." އަލިފާންގަނޑު ބޮޑު ސަރަހައްދަކަށް ފެތުރިފައި ވިޔަސް މިހާތަނަށް އަލިފާނުގެ ސަބަބުން މީހަކު މަރުވެފައި ނުވެއެވެ.
އެރަށުގެ 90 ހާސް މީހުންނަށް ކަރަންޓުގެ ޚިދުމަތް މެދު ކެނޑިފައި ވާއިރު، ގެދޮރު ނެތިފައިވާ މީހުންނަށް ވަގުތީ ހިޔަލުގެ ގޮތުގައި ދެ ސްކޫލެއް ވަނީ ހަމަޖައްސާފައެވެ.
ޗިލީގެ ރައީސު ސެބާސްޓިއަން ޕިޏޭރާ ވަނީ އަލިފާނުގެ ހާދިސާގައި ގިނަ ބަޔަކަށް ގެއްލުންވެފައި ވާތީ ހިތާމަ ފާޅުކުރައްވާފައެވެ.
"ވެލްފަރައިޒޯގެ ފަރުބަދަމަތީ ސަރަހައްދުގައި އަލިފާންރޯވެ އެ ސަރަހައްދުގައި ދިރިއުޅޭ ގިނަ ބަޔަށް އަސަރުކޮށްފައިވާތީ، އަދި ޚާއްސަކޮށް ކްރިސްމަސްގެ މުނާސަބަތާ ދިމާކޮށް މިކަން ހިނގާފައި ވާތީ ނުހަނު ހިތާމަކުރަން." ރައީސު ޕިޏޭރާ ކުރެއްވި ޓުވީޓެއްގައި ވެއެވެ.
ވެލްޕަރައިޒޯއަކީ މެދުތެރޭ ޗިލީގައި އޮންނަ ރަށެކެވެ. ޕެސިފިކް ކަނޑަށް އޮންނަ އެރަށަކީ މުހިއްމު ބަނދަރެކެވެ. އަދީ އެއީ ޗިލީގެ ދެވަނައަށް އެންމެ ބޮޑު ރަށެވެ. ވެލްޕަރައިޒޯއަކީ ދެކުނު އެމެރިކާގެ ފަތުރުވެރިކަމުގެ މުހިއްމު މަންޒިލެއްވެސްމެއެވެ.
