އިސްތަންބޫލުގައި ހުންނަ ސައޫދީ ކޮންސިއުލޭޓުގައި ފާއިތުވި އަހަރުގެ އޮކްޓޯބަރު މަހު ސައޫދީ ނޫސްވެރިޔާ ކަޖާލު ޚާޝުޤްޖީ މަރާލުމުގެ ކުށުގައި ސައޫދީ ކޯޓަކުން ފަސް މީހެއްގެ މައްޗަށް މަރުގެ ހުކުމް އިއްވައިފިއެވެ.
"ކޯޓުން މަރުގެ ހުކުމް އިއްވާފައި ވަނީ މަރާލުމުގައި ސީދާގޮތުން ބައިވެރިވީ މީހުންގެ މައްޗަށް" ސައޫދީ ޕްރޮސެކިއުޓާ ޖެނެރަލް ސުޢޫދު ބިން ޢަބްދުﷲ އަލްމުޢުޖަބު ވިދާޅުވިއެވެ.
ފާހަގަކޮށްލެވޭ ކަމަކީ މި ފަސް މީހުންގެ މައްޗަށް މަރުގެ ހުކުމް އިއްވިއިރު، ޚާޝުޤްޖީ މަރާލުމުގެ ޖަރީމާ ރާވައި ހިންގުމުގައި އެންމެ އިސްކޮށް ހަރަކާތްތެރިވި ކަމަށް ތުރުކީގެ ތަހުގީގުތަކުން ދައްކާ ތިން މީހުންގެ މައްޗަށް ކުށް ސާބިތުނުވާ ކަމަށް ނިންމައި ދޫކޮށްލާފައި ވުމެވެ. އެއީ އިސްތަންބޫލުގެ ސައޫދީ ކޮންސިއުލޭޓުގެ އޭރުގެ ކޮންސުލް މުޙައްމަދި އަލް ޢުތައިބީއާއި، ސައޫދީ އިންޓެލިޖެންސް ވެރިޔާގެ ކުރީގެ ނާއިބު އަޙްމަދު ޢަސީރީއާއި، ސައޫދީ ވަލީއަހުދު މުޙައްމަދު ބިން ސަލްމާނުގެ ކުރީގެ މުސްތަޝާރު ސުޢޫދު އަލްޤަޙްޠާނީއެވެ.
ރިޔާޟުގެ ކްރިމިނަލް ކޯޓުގައި ކުރިއަށް ދިޔަ ޝަރީއަތު ގައި ސައޫދީ ސަރުކާރުގެ ފަރާތުން 11 މީހެއްގެ މައްޗަށް ދައުވާ އުފުލިއެވެ. ފަސް މީހަކު މެރުމަށް ހުކުމްކޮށް، 3 މީހެެއްގެ މައްޗަށް ކުށް ސާބިތުނުވާ ކަމަށް ނިންމާފައިވާއިރު، އެ ކޯޓުން ވަނީ އެނެއް ތިން މީހުންގެ މައްޗަށް ޚާޝުޤްޖީ މަރާލިކަން އެނގިި އެކަން ސިއްރުކޮށްފައިވުމުގެ ކުށުގައި އެކި މުއްދަތުގެ ޖަލު ހުކުމް އިއްވާފައެވެ.
