ބިދޭސީން މަދުކޮށް ރާއްޖޭގައި މިހާރު އުޅެމުންދާ ބަނގްލަދޭޝް މީހުންގެ ތެރެއިން ގަވާއިދާ ޚިލާފަށް އުޅޭ މީހުންގެ މައްސަލަތައް ޙައްލު ކުރުމުގެ މަސައްލަތް ސަރުކާރުން ވަނީ ފަށައިފިއެވެ.
އެމައްސަލަތުގެ ދަށުން ސަރުކާރުން ވަނީ ވޯކްޕާމިޓްގައި ބަނގްލަދޭޝް މީހުން ގެނައުން ވަގުތީ ގޮތުން ހުއްޓާލައިފައެވެ. އެގޮތަށް ހުއްޓާލުމުން ޓޫރިސްޓް ވިސާގައި އެމީހުން ރާއްޖެއަށް މަސައްކަތްކުރުމަށް އެމީހުން އަންނަ އަދަދު އިންތިހާއަށް ބޮޑުވެފައި ކަމަށް މަޢުލޫމާތު ލިބިއްޖެއެވެ. އަދި މިމައްސަލަ ވަނީ ކަމާބެހޭ އިދާރާތަކަށް ވެސް ފާހަގަ ވެފައި ކަމަށް ޚަބަރު ލިބިފައިވެއެވެ.
މިކަމާ ބެހޭ ގޮތުން އިކޮނޮމިކް ޑިވެލޮޕްމަންޓް މިނިސްޓަރ ފައްޔާޒު އިސްމާޢީލް ވިދާޅުވީ މިއީ މުޅި ސައްހަ މައުލޫމާތެއް ނޫން ކަމަށެވެ. އެހެންނަމަވެސް ޓޫރިސްޓު ވިސާގައި ކޮންމެ މަހަކު ކޮންމެވެސް ވަރަކަށް ބަނގްލަދޭޝް މީހުން ރާއްޖެއަށް އެތެރެވާ ކަމަށް މަޢުލޫމާތު ލިބިފައިވާ ކަމަށެވެ. އެގޮތުން މަހެއްގެ މައްޗަށް 200 އެއެއްހާ މީހުން އަންނަ ކަމަށް މަޢުލޫމާތު ލިބިފައިވާ ކަމަށް މިނިސްޓަރ ވިދާޅުވިއެވެ. "މަހަކު 200 ވަރު އަންނަ ކަމަށް ޚަބަރު ލިބެނީ،" މިނިސްޓަރ ވިދާޅުވިއެވެ. މިފަދަ ޚަބަރުތައް ފެތުރުނަސް އިމިގްރޭޝަނުން މިކަން އަދި ކަށްވަރު ކޮށްދެއްވާފައި ނުވާކަމަށް ވެސް މިނިސްޓަރ ވިދާޅުވިއެވެ.
