އީރާނުގެ ރައީސު ޙަސަން ރޫޙާނީ ރަސްމީ ދަތުރުފުޅެއްގައި ޖަޕާނަށް ވަޑައިގެންފިއެވެ. މިއީ މި ދުވަސްވަރުގެ ގޮތުން މުހިއްމުކަން ބޮޑު ދަތުރުފުޅަކަށް ވަނީ ވެފައެވެ.
އީރާނާއި އެމެރިކާގެ ގުޅުން ދުވަހަކުވެސް ގޯސްނުވާ މިންވަރަށް ގޯސްވެ، އެމެރިކާއިން އީރާނާ ދެކޮޅަށް އިގްތިސާދީ ގޮތުން ދަތިކުރުމުގެ ވަރުގަަދަ ފިޔަވަޅުތަކެއް އެޅުމުގެ އިތުރަށް، އީރާނުގެ ނިއުކުލިޔާ އެއްބަސްވުގެ މައްސަލައިގައި ހުޅަނގުގެ ގައުމުތަކާ އެކު އޮތް ގުޅުންވެސް ގޯސްވެފައިވާ ދަނޑިވަޅެއްގައި، އެމެރިކާއާ އެންމެ ގާތް އެއް ގައުމު ކަމަށްވާ ޖަޕާނަށް ރޫޙާނީ ވަޑައިގަތުުމުން މި ދަތުރުފުޅަށް ދެވޭ ސަމާލުކަން ވަނީ ބޮޑުވެފައެވެ.
ރޫޙާނީގެ މިދަތުރުފުޅަކީ 2000 ވަނަ އަހަރަށް ފަހު އީރާނުގެ ރައީސަކު ޖަޕާނަށް ކުރައްވާ މި ދަތުރުފުޅެވެ. ޚަބަރުފަތުރާ ބައެއް ވަސީލަތްތަކުން ބުނެފައިވާ ގޮތުގައި ރައީސު ރޫޙާނީ ވަނީ ޖަޕާނުގެ ބޮޑުވަޒީރު ޝިންޒޯ އާބޭއާ އެކު ބޭއްވެވި ބައްދަލުވުމުގައި، އީރާނުގެ ނިއުކުލިޔާ އެއްބަސްވުމަކީ ސަލާމަތްކުރުމުގައި ޖަޕާނުގެ އެހީތެރިކަމަށް އެދިވަޑައިގެންފައެވެ.
"ނިއުކުލިޔާ އެއްބަސްވުމަކީ ނުހަނު މުހިއްމު އެއްބަސްވުމެއް. އެއްވެސް ޒިންމާދާރުކަމެއް ނެތި، އެކަނި އެޅި ފިޔަވަޅެއްގެ ގޮތުގައި އެމެރިކާއިން އެއެްބަސްވުމުން ބޭރުވެފައިވާތީ އަހަރެން އެކަން ކުށްވެރި ކުރަން. އަަހަރުމެން އުއްމީދުކުރަނީ ޖަޕާނާއި، ދުނިޔޭގެ އެހެން ގައުމުތަކުން މި އެއްބަސްވުން ދަމަހައްޓުމަށް މަސައްކަތްކޮށްދޭނެކަމަށް." އާބޭއާ ބައްދަލުކުރެއްވުމަށް ފަހު ދެއްކެވި ވާހަކަފުޅުގައި ރޫޙާނީ ވިދާޅުވިއެވެ.
"ނިއުކުލިޔާ އެއްބަސްވުމަށް އީރާނުން ފުރިހަމައަށް އަމަލުކުރާނެ ކަމަށާ، ސަރަހައްދުގައި ސުލްހައާއި، ހަމަޖެހުން ގާއިމުކުރުމަށް އީރާނުން ބިނާކުރަނިވި ދައުރެއް އަދާކުރާނެކަމަށް އަހަރެން ވަރަށް ބޮޑަށް އުއްމީދުކުރަން." ރޫޙާނީގެ ވާހަކަފުޅަށް ޖަވާބުދެއްވަމުން ބޮޑުވަޒީރު އާބޭ ވިދާޅުވިއެވެ.
ޖަޕާނުގެ ފަރާތުން ރައީސު ޙަސަން ރޫޙާނީ އެދިވަަޑައިގަންނަވާ އެހެން ކަމެއް ވެސް އެބައޮތެވެ. އެެއީ ޖަޕާނުން އީރާނުގެ ތެޔޮ ގަތުމެވެ. އެމެރިކާއިން އަޅާފައިވާ ދަތިކުރުުމުގެ ފިޔަވަޅުތަކުގެ ސަބަބުން ދުނިޔޭގެ ބާޒާރަށް އީރާނުގެ ތެޔޮ ވިއްކުން ވަނީ ދަތި ކަމަކަށް ވެފައެވެ. އެހެންކަމުން ޖަޕާނުން އީރާނުގެ ތެޔޮ ގަންނަން ފަށައިިފިނަަމަ އީރާނުގެ އިގްތިސާދަށް އޭގެ ހެޔޮ އަސަރުކުރާނެއެވެ.
އެހެންނަމަވެސް، ޚަބަރު ލިބޭ ގޮތުގައި، ޖަޕާނުގެ އިސް މަސްއޫލުވެރިން ވަނީ، އެމެރިކާގެ ދަތިކުރުމުގެ ފިޔަވަޅުތައް އެހެން އޮއްވައި އީރާނުގެ ތެޔޮ ޖަޕާނަށް ނުގަނެވޭނެ ކަމަށް ބުނެފައެވެ.
"ނޫން، އެމެރިކާގެ ދަތިކުރުމުގެ ފިޔަވަޅުތައް އެހެން އޮއްވައި، އަހަރުނމެންނަށް އީރާނުން ތެޔޮ ނުގަނެވޭނެ." ނަން ހަމާކުރަން ނޭދޭ އޮފިޝަލަކު ބުންޏެވެ.
ޕާޝިޔަން ގަލްފު ސަރަހައްދުގައި ކަނޑުދަތުރު ކުރާ މަގުތައް އަމާންކުރުމުގެ މަސައްކަތުގައި ބައިވެރިވުމަށް ޖަޕާނުގެ ސެލްްފް ޑިފެންސް ފޯސް (އެސްޑީއެފް) ގެ ސިފައިން އެ ސަހަރައްދަށް ފޮނުވުމަށް ރައީސު ރޫޙާނީ ވަނީ ތާއީދުކުރައްވާފައެވެ. މިއީ އެމެރިކާ އިސްވެ އޮވެ ކުރާ މަސައްކަތާއި ބައިވެރިނުވެ ވަކިން ހަރަކާތްތެރިވުމަށް ފޮނުވާ ސިފައިންނެވެ.
