އިންޑިޔާގެ ގާނޫނު އަސާސީގައި ކަޝްމީރަށް ދީފައި އޮތް ޚާއްސަ އިމްތިޔާޒުތައް ނިގުޅައިގަނެ، އިންޑިޔާ ސަރުކާރުން ކަޝްމީރުގެ އިންޑިޔާފަޅިި ފާއިތުވި އޮގަސްޓް މަހުގެ 5 ވަނަ ދުވަހު 'ބަންދުކުރި' ފަހުން އެ ސަރަހައްދުގެ ވެރިރަށް ސްރީނަގަރުގެ އެންމެ ބޮޑު މިސްކަތް، ޖާމިޢު މަސްޖިދު ފުރަތަމަ ފަހަރަށް ހުކުރު ނަމާދުކޮށްފިއެވެ. މިއަދު ކުރެވުނު ހުކުރު ނަމާދަކީ ހުކުރު ނަމާދު ނުކުރެވި 19 ހުކުރު ފާއިތުވި ފަހުން ކެރެވުނު ފުރަތަމަ ހުކުރު ނަމާދެވެ.
ކަޝްމީރުގެ ފުލުހުން ބުނީ ހިލޭ ސާބަހަށް އެހީތެރިކަން ފޯރުކޮށްދިން އާއްމުންނާ ފުލުުހުން ގުޅިގެން ކުރި މަސައްކަތުން، އެެއްވެސް ހަމަނުޖެހުމެއް ނުހިނގައި ހުކުރު ނަމާދު ނިިމިގެން ގޮސްފައިވާ ކަމުގައެެވެ.
މީލާދީން 14 ވަނަ ގަރުނުގައި ބިނާކޮށްފައިވާ ތާރީޚީ މިސްކިތެއް ކަމުގައިވާ ޖާމިޢު މަސްޖިދަކީ އެ މިސްކިތުގައި ހުކުރު ނަމާދު ކުރުމަށް އެެހެން ހިސާބުތަކުން ގިނަ ބަޔަކު ޖަމާވާ، 33 ހާސް މީހުންގެ ޖާގައިގެ މިސްކިތަކަށް ވިޔަސް މިއަދު އެ މިސްކިތުގައި ހުކުރު ނަމާދުކުރީ މަދު ބައެކެެވެ. އެ މިސްކިތަށް ދިއުުމުގެ ހުއްދަ ފުލުހުން ދިނީ މިސްކިތާ ކައިރި ހިސާބުތަކުގައި ދިރިއުޅޭ މީހުންނަށް އެކަންޏެެވެ. އެހެންކަމުން، އެ މިސްކިތަށް ހުކުރު ނަމާދަށް ދެވުނީ ހާހެއްހާ މީހުންނަށެވެ.
ޖާމިޢު މަސްޖިދަކީ ސުލްޠާން ސިކަންދަރުގެ ރަސްކަމުގައި މީލާދީން 1402 ވަނަ އަަހަރު ހުޅުވުނު މިސްކިތެކެވެ. މިހާރު 617 އަަހަރުވެފައިވާ މި މިސްކިތަކީ ހުކުރު ދުވަސް ދުވަހު ފުރި ބާރުވެފައި އޮންނަ މިސްކިތެކެވެ.
