އުއްތަރް ޕްރަދޭޝްގެ އުއްނާއުގައި 2017 ވަނަ އަހަރު ޒުވާން އަންހެން ކުޖެއްގެ އިއްފަތް ފޭރިގަތް މައްސަލައިގައި، އުއްތަރު ޕްރަދޭޝްގެ ގާނޫނުހަދާ މަޖިލީހުގެ މެންބަރު ކުލްދީޕް ސިންގް ސެންގަރް އުމުރަށް ޖަލަށްލުމަށް ދިއްލީގެ ކޯޓަކުން ހުކުމް ކޮށްފިއެވެ. އޭނާއަކީ އުއްތަރް ޕްރަދޭޝްގެ ގާނޫނުހަދާ މަޖިލީހުގައި ބަންގަރްމާއު ދާއިރާ ތަމްސީލުކުރާ މެންބަރެވެ. އޭނާ ހޮވުނީ ވެރިކަން ކުރާ ބާރަތިޔާ ޖަނަތާ ޕާޓީ (ބީޖޭޕީ) ގެ ފަރާތުންނެވެ. ނަމަވެސް އިއްފަތް ފޭރިގަތުމުގެ މައްސަލަ ފެންމަތިވެ، އޭނާއާ ދެކޮޅަށް އަޑުއުފުލާ މީހުންގެ އަޑު ގަދަވުމާ ގުޅިގެން ބީޖޭޕީން ވަނީ އޭނާ ބޭރުކޮފައެވެ.
"ކުލްދީޕް ސިންގް ސެންގަރް އުމުރަށް ޖަލުގައި ބެހެއްޓުމަށް ހުކުމް ކުރަން. އޭގެ މާނައަކި އިންޑިޔާގެ ގާނޫނުލް އުގޫބާތުގެ 376 ވަނަ މާއްދާގެ 2 ގައި ވާ ފަދައިން، އޭނާގެ ޠަބީޢީ ހަޔާތުގެ ބާކީ އޮތް ބައި ޖަލުގައި ހޭދަކުރުން." ޑިސްޓްރިކްޓް ކޯޓުގެ ފަނޑިޔާރު ދަރްމޭޝް ޝަރްމާ އިއްވެވި ހުކުމުގައި ވެއެވެ.
ހުކުމް އިއްވަވަމުން ފަނޑިޔާރު ޝަރްމާ ވިދާޅުވި ގޮތުގައި، ކުލްދީޕް ސިންގަކީ އާއްމުންގެ ޚިދުމަތުގައި ހުރި މީހެކެވެ. އާއްމުން ވަނީ އޭނާއަށް އިތުބާރުކޮށްފައެވެ. އެހެންނަމަވެސް، އޭނާ ވަނީ އެމީހުން އޭނާއަށް ކުރި އިތުބާރު ގެއްލުވައިލާފައެވެ. "އާއިލާގެ ވިސްނުން އަނބުރާލަން ކުރެވުނުހާ މަސައްކަތެއް ކޮށްފައިވޭ. އާއިލާއަށް ހިތްދަތިކަން ލިބުނު. އެމީހުންނަށް ގެއްލުން ދޭނެކަމުގެ ބިރު ދައްކާފައިވޭ." ފަނޑިޔާރު ވިދާޅުވެފައި ވެއެވެ.
ޖަލު ހުކުމުގެ އިތުރަށް ކޯޓުން ވަނީ ސެންގަރް 25 ލައްކަ ރުޕިސް (5 ލައްކަ 43 ހާސް ދިވެހި ރުފިޔާ) އިން ޖުރުމާނާކުރުމަށް ވެސް ހުކުމް ކޮށްފައެވެ. ޖުރްމާނާގެ ފައިސާގެ ތެރެއިން 10 ލައްކަ ރުޕީސް (2 ލައްކަ 17 ހާސް ދިވެހި ރުފިޔާ) ދޭނީ އަންހެން ކުއްޖާގެ އާއިލާއަށެވެ. ބާކީ 15 ލައްކަ ރުޕީސް (3 ލައްކަ 26 ހާސް ދިވެހި ރުފިޔާ) ދޭނީ އުއްތަރް ޕްރަދޭޝްގެ ސަރުކާރަށެވެ. އެއީ ސެންގަރްއާ ދެކޮޅަށް ދައުވާކޮށް ޝަރީއަތް ހިންގުމަށް ހިނގި ޚަރަދުގެ ބަދަލެއްގެ ގޮތުގައެވެ.
ކުލްދީޕް ސިންގް ސެންގަރްގެ މައްޗަށް ސާބިތުވީ 2017 ވަނަ އަހަރުގެ ޖޫން މަހުގެ 4 ވަނަ ދުވަހު އުމުރުން 17 އަހަރުގެ އަންހެން ކުއްޖެއްގެ އިއްފަތް ފޭރިގަތުމުގެ ކުށެވެ. އޭނާ އެ ޖަރީމާ ހިންގި އިރު އޭނާއަކީ ހަތަރު ވަނަ ދައުރަށް ބަންގަރްމާއު ދާއިރާގެ ގޮނޑިއަށް ހޮވިފަހުރި މެންބަރެވެ. ބީޖޭޕީން އޭނާ ބޭރުކުރި ނަމަވެސް އަދިވެސް އެނާއަކި ގާނޫނުހަދާ މަޖިލީހުގެ މެންބަރެކެވެ.
ހުކުމް އިއްވިމާއެކު ސެންގްރް ވަނީ ކޯޓު ތެރޭގައި ބާރަށް ރޮއެފައެވެ. އޭނާ ހުއްޓުވައި، ހިތްވަރުދޭން ކައިރީގައި އިނީ އޭނާގެ އަންހެން ދަރިފުޅެވެ.
އިއްފަތް ފޭރިގަތުމުގެ މި މައްސަލަ ވަޅުޖެހިފައި އޮތުމަށް ފަހު ގިނަ ބައެއްގެ ސަމާލު ކަމަށް އައީ، މައްސަލައިގައި ކަމާބެހޭ ފަރާތްތަކުން އެކަށީގެންވާ ގޮތުގައި ހަރަކާތްތެރި ނުވާކަމަށް ބުނެ، ސެންގަރްގެ ވަހުޝީ އަމަލުގެ ޝިކާރައަކަށްވި ކުއްޖާ އަމިއްލައަށް މަރުވާން އުޅުމުންނެވެ.
ފާއިތުވި ޖުލައި މަހު، އެ އަންހެން ކުއްޖާ ދަތުރުކޮށްފައި ދިޔަ ކާރުގައި ލޯރީއަކުން ޖައްސުމުގެ ސަބަބުން، އެ ކުއްޖާގެ ދެ ބޮޑުދައިތަ ވަނީ މަރުވެފައެވެ. އެތަނުން އެކަކީ އިއްފަތް ފޭރިގަތް މައްސަލައިގެ ހެއްކެކެވެ. މި އެކްސިޑެންޓުގައި އެ ކުއްޖާވެސް ވަރަށް ބޮޑަށް ޒަޚަމްވިއެވެ. މި ކަމުގެ ފަހަތުގައި ވެސް ވަނީ ސްންގަރްކަމަށް ގިނަ ބަޔަކު ތުހުމަތުކުރެއެވެ.
2017 ވަނަ އަހަރު އިންޑިޔާގައި އިއްފަތް ފޭރިގަތުމުގެ 33 ހާސް މައްސަލަ ފެންމަތިވެފައި ވާކަަމަށް ނޭޝަނަލް ކްރައިމް ރެކޯޑްސް ބިއުރޯގެ ހިސާބުތަކުން ދައްކައެވެ. މިއީ އެވްރެޖްކޮށް ދުވާލަކު 90 މައްސަލައެވެ.
