އެމެރިކާ ސިފައިން ހިންގާ އަސްކަރީ ތަމްރީނުތަކާއި، ތައުލީމީ ޕްރޮގްރާމުތަކުގައި ޕާކިސްތާނު ސިފައިން ބައިވެރިކުރަން އަލުން ފެށުމަށް ރައީސު ޑޮނާލްޑް ޓްރަމްޕްގެ ސަރުކާރުން ނިންމައިފިކަމަށް، އެމެރިކާގެ ސްޓޭޓް ޑިޕާޓްމަންޓް (ޚާރިޖީ ވުޒާރާ) ބުނެފިއެވެ. މި ނިންމުން މިއައީ މިފަދަ ތަމްރީނުތަކާއި، ޕްރޮގްރާމްތަކުގައި ޕާކިސްތާނު ބައިވެރި ނުކުރަން އެމެރިކާއިން ނިންމިތާ އެއް އަހަރު ފަހުންނެވެ.
އެމެރިކާއިން ހިންގާ އިންޓަނޭޝަނަލް މިލިޓަރީ އެޑިޔުކޭޝަން އެންޑް ޓްރެއިނިންގް ޕްރޮގްރާމް (އައިއެމްއީޓީ) ގައި ޕާކިސްތާނު ސިފައިން ބައިވެރިކުރަމުން އަންނަތާ 10 އަހަރަށްވުރެ ގިނަ ދުވަސް ވެފައި ވަނިކޮށް، ދެ ގައުމުގެ އަސްކަރީ ގުޅުން ހީނަަރުވެ ފާއިތުވި އަހަރު ޕާކިސްތާނު އެ ޕްރޮގްރާމުން ބޭރުކުރިއެެވެ. އެެހެންނަމަވެސް، މިއަހަރުގެ ކުރީކޮޅު ރައީސު ޓްރަމްޕްއާއި ބޮޑުވަޒީރު އިމްރާން ޚާން ބައްދަލުކުރެއްވުމަށް ފަހު، ދެގައުމުގެ ގުޅުން ވަނީ ރަނގަޅުވާން ފަށާފައެވެ. މި ނިންމުމަކީވެސް އެކަމުގެ ހެއްކެކެވެ.
އެމެރިކާ ސިފައިން އަފްޣާނިސްތާނުން ފޭބުމާ ބެހޭގޮތުން ޠާލިބާން ޖަމާއަތާއެކު ޓްރަމްޕް ސަރުކާރުން މިހާރު ކުރިއަށް ގެންދާ ވާހަކަތަކަށް މަގުފަހިކޮށްދިނުމުގައިވެސް ޕާކިސްތާނުން ވަނީ އިސް ދައުރެއް އަދާކޮށްފައެވެ. އެމެރިިކާއިން ގަބޫލުކުރާ ގޮތުގައި ޠާލިބާން ލީޑަރުންނަށް ރައްކާތެރިކަމާއި، އެހެނިހެން އެހީ ދެނީ ޕާކިސްތާނުގެ ސިއްރު ފުލުހުންގެ އިދާާރާއިންނެވެ. އެހެންނަމަވެސް، ޕާކިސްތާނުން އެކަން ދޮގުކުރެއެވެ.
އަސްކަރީ ތަމްރީނުތަކުގައި ޕާކިސްތާނު ސިފައިން ބައިވެރިކުރަން ފެށި ނަމަވެސް، ޖަނަވަރީ 2108 ވަނަ އަހަރު ކުއްލިގޮތަކަށް އަސްކަރީ އެހީ އަދިވެސް އޮތީ މެދު ކެނޑިފައެވެ. އެމެރިިކާގެ އިސް އޮފިޝަލުންނަށްވެސް ހައިރާންކަން ލިިިބިގެން ދިޔަ މި ކުއްލި ނިންމެވުމުގައި ރައީސު ޓްރަމްޕް ވަނީ އެމެރިކާއިން ޕާކިސްތާނަށް އަހަރަކު ދެމުން އައި 2 ބިލިއަން އެމެރިކާ ޑޮލަރުގެ އަސްކަރީ އެހީ މެދުކަނޑުއްވާލައްވާަފައެވެ. އެއީ، އިންޑިޔާއާއި ހަނގުރާމަކުރަމުންދާ ހަތިޔާރު އެޅި ޖަމާއަތްތަކަށް ޕާކިސްތާނުން އެހީތެރިވުން ހުއްޓާނުލާތީކަމަށް ވިދާޅުވެއެވެ.
2001 ވަނަ އަހަރު އެމެރިކާއިން ފެށި 'ޓެރަރިޒަމާ ދެކޮޅަށް ކުރެވޭ ހަނގުރާމަ'އިގައި ޕާކިސްތާނަކީ މުހިއްމު ބައިވެރިއެކެވެ. އޭރުގެ ރައީސު މުޝައްރަފުގެ ވެރިކަމުގައި އެ ހަނގުރާމައިގައި އެމެރިިކާއެކު ބައިވެރިވާން ޕާކިސްތާނުން ނިންމުމަށްފަހު، ޕާކިސްތާނުގެ ވެރިން ބަދަލުވަމުުން އައިސްފައިވީ ނަމަވެސް، އެ ބައިވެރިވުން ހުއްޓާލާފައި ނުވެއެވެ.
